Խաչատուր Քոքոբելյանի հոր առեւանգման գործով մեղադրանք է առաջադրել ԱԺ նախկին պատգամավոր Սուրեն Մանուկյանին

««Ժողովուրդ» օրաթերթի տեղեկությունների համաձայն՝ երեկ երեկոյան՝ ժամը 23:00-ի սահմաններում, նախաքննական մարմինը ԱԺ նախկին պատգամավոր Խաչատուր Քոքոբելյանի հոր առեւանգման գործով մեղադրանք է առաջադրել ԱԺ նախկին պատգամավոր Սուրեն Մանուկյանին: Մեզ հայտնի դարձավ, որ նրան մեղադրանք է առաջադրվել ՀՀ քրեական օրենսգրքի 191-րդ հոդվածի 2-րդ մասի 5-րդ կետով (Անձի առեւանգում, որը կատարվել է խմբի կողմից): Վաղը՝ օրվա առաջին կեսին, նախաքննական մարմինը կալանքի միջնորդություն կտանի դատարան: Մեր բացառիկ տեղեկությունների համաձայն՝ Սուրեն Մանուկյանը, լսելով մեղադրանքը, հայտարարել է, որ իրեն մեղավոր չի ճանաչում:
Այս պահին գործով երեք անձ է ձերբակալված, իսկ նախնական վարկածով՝ ընդհանուր խումբը, որը կապ ունի առեւանգման հետ, բաղկացած է եղել 4 հոգուց:

Հիշեցնենք, որ օգոստոսի 11-ին ԱԺ նախկին պատգամավոր Խաչատուր Քոքոբելյանի հայրիկի առևանգման փաստով ձերբակալվել էին ՀՅԴ գերագույն մարմնի անդամ, ԱԺ նախկին պատգամավոր Սուրեն Մանուկյանը և ևս երկու հոգի, նույն գործով կա ևս երկու ձերբակալված արտերկրում. այս մասին հայտնել էր Խաչատուր Քոքոբելյանը։ Նա նաեւ նշել էր, թե տվյալ անձանց ո՛չ ինքը, ո՛չ էլ իր ընտանիքի անդամները չեն ճանաչել և որևէ առնչություն երբևէ չեն ունեցել:
Իսկ, ահա, ոստիկանությունը պաշտոնապես հայտնեց, որ նախկին պատգամավորի հորը առեւանգել են եւ գումար են պահաջել»:

Ամբողջությամբ հոդվածը` օրաթերթի այսօրվա համարում։