Շիրակի պետհամալսարանի պրոռեկտորի հարսի տարկետումն անօրինակա՞ն է

Շիրկի պետհամալսարանում 2021-2022 թվականների ուսումնական տարվա 1-ին կիսամյակի սկզբից լուրեր էին շրջանառվում, որ ուսումնամեթոդական գործընթացի կառավարման կենտրոնի պրոռեկտոր-տնօրենի ՊԿ Նազելի Ավետիսյանի մագիստրանտ հարսը` որդու կինը (անուն-ազգանունը Նառա Ալոյան), գտնվել է Ռուսաստանում և դասերին չի հաճախել: Հաճախումները մագիստրանտի գնահատման կարգում առանձին թվային գործոն չեն, բայց մագիստրանտները, ըստ իրենց ուսանողական պայմանագրի և «Շիրակի Մ. Նալբանդյանի անվան պետական համալսարան» հիմնադրամի ներքին կարգապահական կանոնների (հաստատված 20.12.2016թ.) 5.2.16. կետի դ) ենթակետի՝ «ուսումնական կիսամյակի ընթացքում լսարանային ժամերի 30% և ավելի (բակալավրի կրթական ծրագրով նախատեսված լսարանային 120, իսկ մագիստրոսի կրթական ծրագրով 90 և ավելի ժամեր) անհարգելի բացակայության դեպքում» Նազելի Ավետիսյանի ուսանողուհի հարսը պետք է հեռացված լիներ համալսարանից: Ըստ ՇՊՀ-ի կանոնադրության 126 կետի 3. ենթակետի՝ «սովորողները պարտավոր են անշեղորեն կատարել սույն կանոնադրության, ՇՊՀ-ի ներքին կարգապահական կանոնների և ներքին իրավական ակտերի պահանջները», 4. ենթակետի՝ «հաճախել ուսումնական ծրագրերով նախատեսված դասընթացներին», ինչը չի կատարել Նազելի Ավետիսյանի ուսանողուհի հարսը: ՇՊՀ-ի կանոնադրության 127 կետի 2. ենթակետով սովորողները պարտավոր են «կատարել Հայաստանի Հանրապետության օրենսդրությամբ, ՇՊՀ-ի կանոնադրությամբ, ներքին կարգապահական կանոններով, ՇՊՀ-ի այլ ներքին իրավական ակտերով և ուսումնառության պայմանների վերաբերյալ կնքված պայմանագրով նախատեսված պարտականություններ», 128 կետով՝ «այն ուսանողները, ովքեր չեն կատարում սույն կանոնադրությամբ, այլ ներքին իրավական ակտերով սահմանված պարտականությունները, ցուցաբերում են անբավարար ակադեմիական առաջադիմություն, խախտում են ՇՊՀ-ի ներքին կարգապահական կանոնները, ռեկտորի կամ նրա կողմից լիազորված անձի հրամանով կարող են ենթարկվել կարգապահական տույժերի` ընդհուպ մինչև ՇՊՀ-ից հեռացվելը` իրավական ակտերով սահմանված դեպքերում և կարգով»: Սակայն Նազելի Ավետիսյանի ուսանողուհի հարսը չի հեռացվել համալսարանից ու ըստ լուրերի՝ 2021 թվականի դեկտեմբերի կեսերին հղիության և ծննդաբերության արձակուրդի հիմքով տարկետում է վերցրել, ինչը, նույնպես, ըստ համալսարանում շրջանառվող լուրերի, կեղծ հիմքով է տրամադրվել:

ՇՊՀ-ի աշխատակից Հովհաննես Խորիկյանը ֆեյսբուքյան իր էջում սույն թվի ապրիլի 18-ին տարածել էր Նազելի Ավետիսյանին ուղղված իր դիմումը (տե՛ս https://www.facebook.com/photo.php?fbid=4889793984466394&set=pb.100003075227004.-2207520000..&type=3 ), ինչը անպատասխան է մնացել: Հետևաբար ենթադրելի է, որ Նազելի Ավետիսյանը կոծկում է իր անմիջական մասնակցությամբ կատարված ենթադրյալ անօրինական գործողությունները: Եթե իրոք Նազելի Ավետիսյանի հարսը սեպտեմբերից-դեկտեմբեր գտնվել է Ռուսաստանի Դաշնությունում, ապա նա բացակայությունների պատճառով պետք է հեռացված լիներ համալսարանից, հետևաբար դեկտեմբերին տարկետում վերցնելու խնդիր այլևս չէր լինի:
Իրավապահ մարմիններն այս հրապարակումը թող ընդունեն հաղորդում ենթադրյալ հանցագործության մասին և գործողություններ իրականացնեն՝ ստուգելով Նազելի Ավետիսյանի հարսի՝ Ռուսաստանի Դաշնությունում գտնվելու հանգամանքը և տարկետման հիմքերի օրինականությունը: