Կազմակերպված սադրանք. Ռուսները չեն նկատում հրադադարի խախտումները

Օգոստոսի 1-ի լույս 2-ի գիշերը և առավոտյան 09:00-ի դրությամբ, իրադրությունը շփման գծում էական փոփոխությունների չի ենթարկվել, հայտնում է Արցախի պաշտպանության նախարարությունը՝ նշելով՝ կայուն-լարվածությունը պահպանվում է: «Հանրապետության ղեկավարությունը ՊԲ հրամանատարության ու ռուսական խաղաղապահ զորակազմի հրամանատարության հետ համատեղ, քայլեր են ձեռնարկում լարվածության լիցքաթափման և հետագա սրացումներ թույլ չտալու համար», - ասված է հաղորդագրությունում:

Արցախի պաշտպանության բանակը երեկ երեկոյան հաղորդեց՝ առավոտից Արցախի հյուսիսային և հյուսիս-արևմտյան սահմանագոտու մի շարք հատվածներում ադրբեջանական ստորաբաժանումները «դիմել են սադրանքի՝ կատարելով շփման գիծը հատելու փորձեր, որոնք կասեցվել են ՊԲ ստորաբաժանումների ուժերով»: Բաքուն հերքեց հայկական կողմի պնդումները՝ դրանք որակելով «սադրանք և սուտ»։

Ավելի ուշ Արցախի պաշտպանության նախարարությունը հայտնեց, որ ադրբեջանական ստորաբաժանումների կողմից ձեռնարկված սադրանքի հետևանքով վիրավորում է ստացել Պաշտպանության բանակի զինծառայող Ալբերտ Վլադիկի Բախշիյանը։
Հետաքրքրականն այն է, որ Ռուսական խաղաղապահ առաքելությունն էլ երեկ հրադադարի «ոչ մի խախտում չի արձանագրել»: Մինչդեռ երեկ զինծառայող է վիրավորվել է՝ ադրբեջանական ստորաբաժանումների կողմից ձեռնարկված սադրանքի հետևանքով։ Իսկ սույն փաստը ռուս խաղաղապահները «չեն նկատել»:

Պաշտպանության բանակի վիրավոր զինծառայող Ալբերտ Վլադիկի Բախշիյանի վիճակը բավարար է, նրա կյանքին վտանգ չի սպառնում, հայտնում է Արցախի պաշտպանության նախարարությունը:

Արցախի պաշտպանության բանակը երեկ երեկոյան հայտարարեց՝ առավոտից Արցախի հյուսիսային և հյուսիս-արևմտյան սահմանագոտու մի շարք հատվածներում ադրբեջանական ստորաբաժանումները «դիմել են սադրանքի՝ կատարելով շփման գիծը հատելու փորձեր, որոնք կասեցվել են ՊԲ ստորաբաժանումների ուժերով»:

Այսինքն, Մոսկվան ու Բաքուն հայկական կողմի պնդումները՝ հերքում են: Սա կազմակերպված սադրանք է, թե ոչ՝ պարզ չէ, փաստը մնում է հետևյալը, Ադրբեջանը դիմում է հստակ սադրանքների, ապա՝ հերքում, ինչն էլ արժանանում է Մոսկվայի համարժեք «ռեակցիային», այսինքն, արդարացնում են Բաքվի՝ հերքումները:

Իսկ ընդհանուր առմամբ, պարզ է, որ շփման գծում լարվածություն ստեղծելով՝ Ադրբեջանը փորձում է Հայաստանին ստիպել ցավոտ զիջումների գնալ, և այս էսկալացիային Ադրբեջանը վաղուց և հետևողականորեն նախապատրաստվում էր:

Վերջին մի քանի շաբաթներին Ադրբեջանն անընդհատ մեղադրում էր հայկական կողմին հենց այս հատվածում, այսինքն՝ Քելբաջարի շրջանի հարավից մինչև Լաչինի շրջանի հյուսիս ձգվող հատվածում, հրադադարի ռեժիմը խախտելու մեջ: Հստակ երևում էր, որ տեղեկատվական ֆոն էր նախապատրաստվում։

Մետաքսյա Շալունց