Նախազգուշացնող կրակոցներ Պալաչի տան վրա, նա վերադարձե՞լ է

Հուլիսի 27-ին տեղեկություն հրապարակվեց, որ Աբովյան քաղաքում տան վրա են կրակել, տունը պատկանում է Պալաչ մականունով Արթուր  Հարությունյանին: Եւ ահա, երկամյա դադարից հետո կրկին մամուլում հայտնվեց Պալաչի անունը, ով հանրահայտ դարձավ 2012-ին Գագիկ Ծառուկյանի հետ հակամարտության արդյունքում: Հիշեցնենք, որ Պալաչը սովորական քրեական տարր է, ժամանակին անմոռաց ծառայել է ինչպես իր քավոր Գագիկ Ծառուկյանին, այնպես էլ նրա երիտասարդ  փեսա Կարո Գուլոյանին:Նա եղել է Ծառուկյանի թիկնազորի անդամ, ապա նաեւ վերջինիս սանիկը: Սակայն եկավ մի ժամանակ, երբ Պալաչը փորձեց դուրս գալ  Ծառուկյանի վերահսկողության սահմաններից՝ փորձելով ինքնադրսեւորվել ՀՀԿ-ի տիրույթում: Գաղտնիք չէ, որ իշխանությունները տարիներ շարունակ, բացահայտ կամ քողարկված մշտապես Ծառուկյանի համար այլընտրանք է փնտրել Կոտայքում, բայց մինչ օրս չի գտել: Այն պահին, երբ Պալաչը խիզախություն դրսեւորեց եւ պայքարեց երթուղային գծերի ու Ծառուկյանի անվճար բարեգործական ավտոբուսների դեմ, ՀՀԿ-ն պահը չկորցրեց ու որոշեց հեռվից սատարել պոտենցիալ այլընտրանքին: Հիշենք, որ  միայն Պալաչն է հանդգնել Նիկոլ Փաշինյանից հետո հրապարակավ արտասանել Գագիկ Ծառուկյանի մականունը: Այս պահվածքն անասելի գրավեց ՀՀԿ վերնախավին, դրա համար էլ նրան տեր կանգնեցին, որ հանկարծ Ծառուկյանը չնեղացնի Պալաչին, ընդունեցին կուսակցության շարքերը: Այդուհանդերձ, կարճ ժամանակ անց Հովիկ Աբրահամյանի ջանքերով ՀՀԿ-ն հայցեց Ծառուկյանի ներողամտությունը: Սակայն իշխանությունը Պալաչին բաց չթողեց եւ պարբերաբար որպես մահակ էր օգտագործում: Սակայն 2015-ին Աբովյանի քաղաքապետի ընտրությունների ժամանակ իշխանությունը ի դեմս Սերժ Սարգսյանի քաղաքական հստակ հաշվարկների արդյունքում կրկին նախընտրեց Ծառուկյանին եւ ընդդիմացավ Պալաչի՝ քաղաքապետի թեկնածու առաջադրելու որոշմանը: Իսկ վերջինս անդրդվելի ինքնագործունեություն ծավալեց, առաջադրեց իր թեկնածությունը անկախ այն փաստի, որ ՀՀԿ-ն իրեն հեռացրեց կուսակցության շարքերից: Ընտրություններից հետո, երբ հաղթեց Ծառուկյանի թեկնածու Վահագն Հարությունյանը, սկսվեց Արթուր Հարությունյանի համար աննախանձելի ժամանակներ: Նա արագ անհետացավ ասպարեզից եւ հեռացավ Հայաստանից: Տեղեկությունների համաձայն՝ նրա բացակայությունը  կապված էր  իր անվտանգության ապահովման հետ կապված մտահոգություններով: Բացի այդ, լուրջ ճնշման տակ  հայտնվեցին  Հարությունյանին պատկանող բիզնես կառույցները, ինչը բնականաբար առանց իշխանությունների համաձայնության և հանձնարարության չէր կարող լինել: Սա նշանակում է, որ իշխանությունը չցանկացավ ներել Պալաչին ինքնագործունեության համար:Արդեն երկու տարի է նա ընտանիքի հետ ապրում է արտերկրում, այնտեղ է բիզնես գործունեություն ծավալել: Մեզ պատմեցին, որ կինը երեխաների հետ տարվա ընթացքում մի քանի անգամ գալիս են Հայաստան, սակայն բնակվում են ոչ թե իրենց, այլ հարազատների տանը: Պալաչին խիստ զգուշացրել են, որ եթե ոտքը մտնի Հայաստան, կենդանի չի մնալու: Այս օրերին տեղեկություններ կան, որ նա գաղտնի Հայաստան է այցելել, ինչով էլ ըստ ամենայնի պայմանավորված են իր տան վրա կրակոցները: Անի Սահակյան