Չստացված «մեղրամիսի» հետևանքները
Թրամփը զրկվեց ՌԴ-ի դեմ պատժամիջոցները վերացնելու իրավունքից ԱՄՆ Ներկայացուցիչների պալատը ձայների գերակշիռ մեծամասնությամբ հավանություն տվեց Կրեմլի դեմ նոր պատժամիջոցներին, որոնք վերաբերում են տնտեսության առանցքային ճյուղերին՝ նավթագազայինից մինչև բանկային: Քվեների 419 կողմ, 3 դեմ հարաբերակցությամբ ընդունված օրինագծի հիմնական դրույթներից մեկը, սակայն, վերաբերում է Սպիտակ տան ղեկավարին: Ոչ միայն ընդդիմադիր դեմոկրատները, այլև Թրամփի կուսակից հանրապետականները այս օրինագծով զրկում են ԱՄՆ նախագահին Ռուսաստանի դեմ պատժամիջոցները վերացնելու իրավունքից, քանի դեռ նա չի ստացել Կոնգրեսի հավանությունը: «Սա խիստ անհրաժեշտ փաստաթուղթ է, որը կարևոր ուղերձներ է փոխանցում ոչ միայն Կրեմլին, այլև Սպիտակ տան ղեկավարին», - հայտարարում էր դեմոկրատ Խոաքին Կաստրոն: «Ռուսաստանը խայտառակ ձևով ոտնահարեց միջազգային իրավունքը՝ ներխուժելով Ուկրաինա և միջամտելով ամերիկյան ու եվրոպական ընտրություններին: Այս փաստաթուղթը հստակ ազդանշան է, որ նախագահ Պուտինն ու նրա մերձավորները հաշվետու են լինելու Միացյալ Նահանգների առաջ իրենց գործողությունների համար: Այս օրինագիծը նաև ամրագրում է՝ Կոնգրեսը կարո՛ղ է և կձեռնարկի՛ քայլեր նույնիսկ այն դեպքում, երբ նախագահ Թրամփը չցանկանա գնալ դրան»: Բարաք Օբամայի օրոք Ռուսաստանի դեմ սահմանված պատժամիջոցները մնում են ուժի մեջ, բացի այդ՝ նոր սահմանափակումներ են մտցվում ռուսաստանցի այն պաշտոնյաների նկատմամբ, որոնք մեղսակից են մարդու իրավունքների ոտնահարման դեպքերին: Առաջարկվում է նրանց ակտիվները Միացյալ Նահանգներում սառեցնել, մուտքը Ամերիկա՝ արգելափակել: Նույնատիպ սահմանափակումներ են նախատեսվում նաև կիբերհանցագործների ու կազմակերպությունների հանդեպ, որոնք զենք են տրամադրում Սիրիայի նախագահ Բաշար ալ-Ասադին: «Ժամանակն է, որ Կոնգրեսը խոսքից գործի անցնի», - հայտարարում էր դեմոկրատ Էդ Սիսիլինը: - «Մենք չենք կարող թույլ տալ, որ որևէ օտար կառավարություն միջամտի մեր ընտրական գործընթացներին: Եվ քանի որ մեր նախագահը ամենևին հակված չէ պատժել Ռուսաստանին հարձակումների համար, որոնք իրականում հարձակումներ էին՝ ուղղված Նահանգների դեմ, ուրեմն՝ Կոնգրեսն ինքը պիտի ասի իր խոսքն ու հասնի նրան, որ Ռուսաստանը ենթարկվի պատասխանատվության»: Ռուսաստանից բացի՝ փաստաթուղթը պատժամիջոցներ է սահմանում նաև Իրանի ու Հյուսիսային Կորեայի նկատմամբ: «Այս օրենքով մենք սաստկացնում ենք ճնշումը ԱՄՆ-ի ամենավտանգավոր հակառակորդների հանդեպ, որպեսզի երաշխավորենք ամերիկացիների անվտանգությունը», ասում էր Ներկայացուցիչների պալատի խոսնակ Փոլ Ռայանը: Ակնկալվում է, որ առաջիկա շաբաթներին օրինագիծը քվեարկության կդրվի Կոնգրեսի վերին պալատում՝ Սենատում, ապա կուղարկվի Սպիտակ տուն: ԱՄՆ վարչակազմն առայժմ չի հստակեցնում՝ Թրամփը մտադիր է վավերացնե՞լ այն, թե՞ կիրառել վետոյի իր իրավունքը: «Նախագահը դեռ դիտարկում է՝ արդյոք Ռուսաստանի դեմ այս նոր պատժամիջոցները բխում են Ամերիկայի ժողովրդի շահերից», - ավելի վաղ հայտարարել էր Սպիտակ տան խոսնակ Սառա Սանդերսը: Պաշտոնական Մոսկվան, սակայն, արդեն նախազգուշացնում է՝ ամերիկյան պատժամիջոցները անպատասխան չեն մնա: «Մեզ համար Վաշինգտոնը վտանգի աղբյուր է, դա պետք է հասկանալ և գործել այդ տրամաբանությամբ՝ կշռադատված, սառնասիրտ և առանց ավելորդ զգացմունքների», - հայտարարել է Ռուսաստանի փոխարտգործնախարար Սերգեյ Ռյաբկովը՝ հավելելով. - «Կրեմլը պատրաստ է հենց այդպիսի գործողությունների»: Մոսկվան խստորեն քննադատել է ԱՄՆ Կոնգրեսի նոր պատժամիջոցները Փոխարտգործնախարար Սերգեյ Ռյաբկովը, ով Ռուսաստանի ԱԳՆ-ում համարվում է ԱՄՆ-ի հետ կապերի գլխավոր պաշտոնյան, ասել է, որ Ռուսաստանի դեմ պատժամիջոցներն ընդլայնող օրինագիծը Վաշինգտոնի և Մոսկվայի միջև հարաբերությունները կարգավորելու հեռանկարները ոչնչացնող քայլ է: «Մենք բազմիցս ասել ենք, որ նման գործողությունները անարձագանք չեն մնա», - ասել է նա: Մոսկվան ընկալում է Վաշինգտոնին որպես վտանգի աղբյուր և ընդունում է որոշումներ՝ ելնելով այդ գիտակցումից, նշել է ՌԴ փոխարտգործնախարար Սերգեյ Ռյաբկովը։ Նրա խոսքով՝ օրինագծի ընդունումն ԱՄՆ-ում ՌԴ թշնամիների գիտակցված ընտրությունն է։ Ռուսաստանի խորհրդարանի վերին պալատի՝ Դաշնության խորհրդի միջազգային հարաբերությունների հանձնաժողովի ղեկավար Կոնստանտին Կոսաչևը ասել է, որ ԱՄՆ-ի օրենսդիրները լրացուցիչ վնաս են հասցնում ԱՄՆ-Ռուսաստան հարաբերություններին: Կոսաչևը ԱՄՆ-ի համար «ցավոտ» արձագանքի կոչ է արել: Այսպիսով, պաշտոնական Մոսկվան Վաշինգտոնի գործողությունները համարում է քայլ՝ ուղղված Մոսկվայի հետ հարաբերությունների նորմալացման հեռանկարների ոչնչացմանը։ ԱՄՆ Ներկայացուցիչների պալատում քվեարկությունն ընդդեմ Ռուսաստանի փաստում է, որ ռուս-ամերիկյան հարաբերություններում ճգնաժամը ոչ միայն մոտ ապագայում չի հարթվի, այլև կարող է էլ ավելի խորանալ: Վերհիշելով մինչ Թրամփի ընտրությունը Մոսկվայի ոգևորությունը, կարելի է պարզապես արձանագրել, թե որքան սխալ էին ռուսական քաղաքական էլիտայի հաշվարկները, երբ Թրամփի անձով պայմանավորված ոգևորված պայծառ ապագա էին գուշակում ռուս-ամերիկյան հարաբերություններում: Մետաքսյա Շալունց
Հետևեք մեզ Viber-ում
