Ովքե՞ր կարող են հայտնվել ԱԺ-ում այսօրվա ընդդիմադիր պատգամավորների փոխարեն

«Իրավունք» թերթը գրում է. «ԱԺ նախագահ Ալեն Սիմոնյանը ստորագրել է որոշում, համաձայն որի, արտահերթ նիստ կգումարեն եւ կդիմեն Սահմանադրական դատարան՝ ընդդիմադիրներին մանդատից զրկելու հարցով: Ըստ այդմ՝ մանդատներից ՍԴ-ի դրական որոշման դեպքում կզրկվեն խորհրդարանի ընդդիմադիր բոլոր պատգամավորները, բացի Թագուհի Թովմասյանից եւ Իշխան Զաքարյանից: Իսկ թե այս գործընթացն էլ «հորով-մորով» անելու դեպքում ինչ տեղի կունենա, «Իրավունքը» պարզեց սահմանադրական իրավունքի մասնագետ Գոհար Մելոյանից:

- Եթե ՍԴ-ն դրական որոշում կայացնի այս գործընթացի վերաբերյալ, հնարավո՞ր է, որ խորհրդարանում հայտնվեն այն քաղաքական ուժերը, որոնք, ընտրությունների արդյունքների համաձայն, «Պատիվ ունեմ» եւ «Հայաստան» դաշինքներից ավելի քիչ ձայն էին ստացել եւ չկարողացան անցողիկ շեմը հաղթահարել:

- Այդ մոտեցումը հատկապես շրջանառվում էր 2021 թվականի ընտրություններին անմիջապես հաջորդող շրջանում, որ եթե «Պատիվ ունեմ» եւ «Հայաստան» դաշինքի պատգամավորները հրաժարվեն մանդատներից, ավելի քիչ ձայն հավաքած ուժերը կհայտնվեն օրենսդիր մարմնում:

Սակայն սա բացառված է, որովհետեւ օրենսդիրը որեւէ կերպ նման հնարավորություն չի ստեղծել: Այլ ուժերի խորհրդարանում հայտնվելու միակ եղանակը նոր Ազգային ժողովի ընտրությունն է: Այս պահի դրությամբ` եթե պատգամավորների լիազորությունները դադարեցվեն, խորհրդարանում պատգամավորական մանդատ կարող են ստանձնել բացառապես իրենց նախընտրական ցուցակների հաջորդող համարները:

Ես լիահույս եմ, որ ցուցակներում ներառված մարդիկ բարոյական, գործընկերային գործելաոճ կդրսեւորեն եւ անձնական շահագրգռվածությամբ չեն առաջնորդվի եւ չեն ստանձնի մանդատները, ինչպես արդեն ունենք օրինակներ, որոնք պատրվակ են ներկայացնում «անկախ» պատգամավորի գործունեություն ստանձնելը»:

Առավել մանրամասն՝ թերթի այսօրվա համարում