Հնչել են հայհոյանքներ

ՀՀ ոստիկանությունը հաստատում է՝ Երևանի նախկին քաղաքապետ Հայկ Մարությանը զանգահարել է ոստիկանություն և հայտնել, որ ՃՈ մեքենաներն ուղեկցում են մասնավոր անձանց, որոնք կարմիր լույսի տակ են անցնում և որ մեքենաներից հայհոյանքներ են հնչել։

Նշենք, որ այսօր մամուլում տեղեկություններ են տարածվել, համաձայն որի՝ ՀՀ ոստիկանության օպերատիվ կառավարման կենտրոն է զանգահարել Հայկ Մարությանը և հայտնել, որ Ծովակալ Իսակովի պողոտայում ճանապարհային ոստիկանության ավտոմեքենան ուղեկցում է մասնավոր անձանց, որոնք կարմիր լույսի տակով են անցնում՝ ստեղծելով վտանգավոր իրավիճակ, ինչպես նաեւ ավտոմեքենաներից մեկից հայհոյանքներ են հնչեցրել։ Մամուլում շրջանառվող լուրերի համաձայն՝ ոստիկանություն զանգող քաղաքացին Երևանի նախկին քաղաքապետ Հայկ Մարությանն է։

ՀՀ ոստիկանությունից այս առնչությամբ պարզաբանում են տարածել՝ ըստ էության հաստատելով ահազանգը և նշելով, որ ուղեկցումն իրականացվել է ճանապարհային ոստիկանության ուղեկցող հատուկ վաշտի ծառայողների կողմից՝ ըստ նախատեսված կարգի և ոլորտը կարգավորող իրավական ակտերի։ Ավտոմեքենաներից հայհոյանքներ հնչեցնելու մասով Մալաթիայի քննչական ստորաբաժանումում կատարվում է նախաքննություն։