Մանուկի սպանությունից հետո Սարդարապատը շոկի մեջ էր՝ իմանալով, որ նրան սպանել են տղան ու կինը. գյուղապետ

Սարդարապատի գյուղապետ Բաբկեն Վարդանյանը Tert.am-ի հետ զրույցում խիստ պատկերավոր ներկայացրեց, թե ինչպես են ընդունել համագյուղացիներն այն, որ Արմավիրի մարզպետի նախկին խորհրդական Մանուկ Սիմոնյանին սպանել են որդին և կինը: «Էն ժամանակ սպանությունից շոկի մեջ էինք, հիմա սաղ Սարդարապատն ուշաթափված է»,-ասաց գյուղապետը: Հարցին էլ, թե Սիմոնյանները սիրո՞ղ ամուսիններ էին, խորհուրդ տվեց. «Գնացեք, կողքի հարևաններին հարցրեք»: Հիշեցնենք, որ երեկ շատ անսպասելի հայտնի դարձավ, որ օրեր առաջ անհետացած, ապա հուլիսի 25-ին՝ «Դալարիկի ձոր» կոչվող տարածքում փաթաթված ու կապկպված վիճակում հայտնաբերված Մանուկ Սիմոնյանին սպանելու կասկածանքով ձերբակալվել են նրա միակ որդին և կինը: Շատ դժկամությամբ Սարդարապատի գյուղապետը պատմեց, որ գյուղում այնուամենայնիվ շրջանառվում են վարկածներ, թե ինչու կարող էին որդին ու կինը սպանել ընտանիքի հորը: «Դե հետաքննությունը բոլոր հարցերին երևի ճշգրիտ կպատասխանի… ես ինչ իմանամ… էլ խանդի հող է, էլ՝ վաուչերի համար է...Չգիտեմ, ամեն ինչ փակ է… ոչ դիակն են տալիս, ոչ բան»,-ասաց նա։ Մանուկ Սիմոնյանի հուղարկավորության օրը ևս հայտնի չէ, քանի որ դատաբժշկական փորձաքննությունները դեռ չեն ավարտվել: Նշենք, որ գյուղում են Արմավիրի նախկին խորհրդականի՝ արտերկրում բնակվող եղբայրները։