Ավելի լավ է ինձ դատեն, քան որպես միայն Շանթ Հարությունյանի որդի հրաժարվեն դիմումից
Այսօր հայտնի դարձավ, որ Ելք դաշինքի ավագանու անդամ Դավիթ Խաժակյանը Շանթ Հարությունյանի որդու՝ Շահեն Հարությունյանի հարցով դիմել է Երեւանի քաղաքապետ Տարոն Մարգարյանին։ Բանն այն է, որ 2017 թվականի մայիսի 18-ին քաղաքապետի կողմից հայցադիմում է ներկայացվել Հայաստանի Հանրապետության վարչական դատարան՝ Շահեն Հարությունյանին «Վարչական իրավախախտումների վերաբերյալ» ՀՀ օրենսգրքի 180.1-րդ հոդվածի 1-ին մասով վարչական պատասխանատվության ենթարկելու վերաբերյալ: Նշված հայցադիմումի առիթ է հանդիսացել առանց համայնքի ղեկավարին օրենքով սահմանված կարգով իրազեկելու 2017 թվականի մարտի 16-ից 19-ը հավաքներ անցկացնելը: Ինչպես հայտնի է, հավաքների առիթ է հանդիսացել Արթուր Սարգսյանի («Հաց բերողի») մահը, որը հասարակության կողմից ընդունվել է մեծ ափսոսանքով՝ զուգորդվելով հավաք-երթերով, այդ թվում և Շահեն Հարությունյանի մասնակցությամբ: Հավաքները տեղի են ունեցել ինքնաբուխ կերպով, կրել են հրատապ բնույթ և բացակայել է լիազոր մարմնին օրենքով սահմանված ժամկետներում իրազեկելու հնարավորությունը: «Նկատի ունենալով այն հանգամանքը, որ իրադարձությունները տեղի են ունեցել երիտասարդ և հանրությանը որպես ակտիվ քաղաքացի հայտնի Շահեն Հարությունյանի մասնակցությամբ, ելնելով հանրային համերաշխության համընդհանուր սկզբունքներից՝ դիմում ենք Ձեզ հրաժարվելու վարչական դատարան ներկայացրած դիմումից «Վարչարարության հիմունքների և վարչական վարույթի մասին» Հայաստանի Հանրապետության 2004 թվականի փետրվարի 18-ի ՀՕ-41-Ն օրենքի 50-րդ հոդվածի առաջին մասի բ) ենթակետի հիմքով վարչական վարույթը կարճելու նպատակով» մասնավորապես նշված է Ելք-ի հայտարարությունում։ Շահեն Հարությունյանը մեզ զրույցում մանրամասնեց, որ քաղաքապետ Տարոն Մարգարյանը իր հարցով «գործով» է դիմել դատարա․«Չորսը ընդունվել է որպես առանձին գործեր, բայց միջնորդել ենք, որ ընդհանուր մեկ գործ սարքեն»։ Ելք նախաձեռնության մասին, ասաց, որ ինքը դեմ չի եղել, երբ Ելք ԱԺ խմբակցության պատգամավոր Գեւորգ Գորգիսյանը հայտնել է նման մտադրության մասին, շեշտեց, որ իրեն դուր չի գալիս, որ հայտարարության մեջ ընդգծված է իր անձը․«Ես չէի ուզենա, որ հատուկ ընդգծվեր, թե «հաշվի առնելով, որ Շահեն Հարությունյանն է...»։ Ներեցեք, բայց ով է Շահեն Հարությունյանը այս երկրում», հարց է հնչեցնում մեր զրուցակիցը պատասխանելով․«Ինչու պետք է հենց այդ փաստով պայմանավորված ինչ-որ քայլեր անեն, խնդիրն այն է, որ եղել են ինքնաբուխ հավաքներ, որին կամ որտեղ եւ ես եմ մասնակցել։ Ինչո՞ւ որ Շահեն Հարությունյանը հանրությանը հայտնի է, մյուսն էլ անհայտ է, անհայտին պիտի դատե՞ն», - նշում է Շահեն Հարությունյանը եւ շեշտում, որ ինքը չէր ցանկանա, որ հայտարարությունը անձնավորվեր, սակայն մինչեւ ծանոթանալը բովանդակությանը, այն արդեն հրապարակվել էր։ Ակնկալիքների մասին հարցին Շահեն Հարությունյանն այսպես պատասխանեց․«Ես չեմ ուզում, որ իմ նկատմամբ վերաբերմունք դրսեւորեն որպես Շանթ Հարությունյանի որդի։ Թող ինձ դատեն ու իրենք էլ խայտառակ լինեն, որ ասեն բռնադատված Անդրանիկ Մարգարյանի որդին դատում է իր հոր կուսակցության հիմնադիրներից Շահեն Հարությունյանի թոռանը։ Անդրանիկ Մարգարյանը չէ՞ որ սովետի ժամանակ քաղբանտարկյալ է եղել, նույնն էլ հայրս է բռնադատվել հանուն ազատ եւ անկախ Հայաստանի։ Սերժ Սարգսյանը օրինակ պոպուլիստ է եղել, իր համար էական չի եղել սովետ է, թե ինչ, բայց Տարոն Մարգարյանի հայրը պայքարել է սովետի դեմ, անկախության, ազատության, լավ Հայաստան ունենալու համար, իսկ հիմա ինքը հոր պայքարը հաշվի չի առնում»։ Անի Սահակյան