Ադրբեջանը պահանջու՞մ է Մոսկվայից, որ վերջինս աջակցի Փաշինյանին

Երեկվանից Ադրբեջանում որոշել են մկաններ ցույց տալ Կրեմլին: Ֆորմալ պատճառն այն է, որ ռուսական РИА «Новости»-ին հարցազրուց էր վերձրել ԼՂՀ պետնախարար Արտակ Բեգլարյանից և նրան ներկայացրել էր, որպես «ԼՂ Հ պետնախարար» ձևակերպմամբ:

Այդ առիթով Բաքուն որոշել է նույնիսկ պաշտոնապես արգելափակել այդ գործակալության գործունեությունն Ադրբեջանի տարածքում:

Այդ երկրի ԱԳ նախարարության ներկայացուցիչը մտահոգություն է հայտնել այդ առիթով, հատկապես արձանագրելով այն հանգամանքը, որ ռուսական այդ գործակալության վրա հղումներ են տարածվել նաև այլ ռուսական ԶԼՄ-ներում: Ադրբեջանցիները հետևություն են արել, ըստ որի նման տեսակետը կիսում է ոչ միայն РИА «Новости»-ին, այլև ռուսական մյուս ԶԼՄ-ները:

Ադրբեջանի նման դեմարշի տրամաբանության մեջ կա նաև մեկ այլ իմաստ: Հաշվի առնելով, որ ռուսական սույն գործակալությունը ղեկավարում է ռուսաստանցի հայազգի Մարգարիտա Սիմոնյանը, Բաքուն իր այդ քայլով փորձում է թուլացնել Սիմոնյանի դիրքերը ռուսական վերնախավում, նրան համարելով «սեպարատիստներին աջակցող անձ»:

Սակայն ադրբեջանցիներին ամենաշատը նյարդայնացրել է Արտակ Բեգլարյանի կողմից ներկայացրած որոշ թեզեր, որում Բաքուն նկատել է վտանգավոր մեսիջներ իր համար:

Մասնավորապես Բեգլարյանը խոսել է այն մասին, որ միջնորդական առաքելություն պիտի իրականացնի բացառապես Մոսկվան, իսկ Բրյուսելի առաքելությունը անիմաստ զբաղմունք է: Եվ ամենակարևորը, որ Բեգլարյանը կարծիք է հայտնել, որ ռուս խաղաղապահները պիտի մնան երկար տարածաշրջանում, իսկ Լեռնային Ղարաբաղն էլ վերջում պիտի ստանա կարգավիճակ՝ Ադրբեջանից դուրս:

Ադրբեջանցիները Բեգլարյանի այս թեզերը համեմատել են Հայաստանում ընթացող ներքին զարգացումների հետ և կարծիք կազմել, որ հայաստանյան ընդիմության գործողությունները աջակցություն են ստանում Մոսկվայի որոշ ազդեցիկ շրջանակների կողմից:

Ըստ Բաքվի, եթե Նիկոլ Փաշինյանը Հայաստանում հեռացվի իշխանությունից, ապա հնարավոր է, որ բրյուսելյան գործընթացը կանգ առնի և մենաշնորհը կմնա Մոսկվայի ձեռքը: Որից հետո, Արցախի հարցը կարող է «սառեցվել» օրակարգում մնալով միայն երկողմ հայ-ադրբեջանական հարաբերությունների կարգավորման խնդիրները, առանց Արցախի:

Ըստ ադրբեջանցիների դրանով իրենք իրենց «պատմական շանսը» կարող են կորցնել:

Փաստացի Ադրբեջանի դեմարշն ընդդեմ Մոսկվայի, ոչ այնքան ֆորմալ ձևակերպումներն էին, որքան այն մտավախությունը, որ ռուսական իշխանության համակարգում կան շրջանակներ, ովքեր չեն ցանկանում, որ Փաշինյանը պահպանի իր իշխանությունը, և ուրեմն Ադրբեջանը կարող է հերթական անգամ խափված դուրս գալ:

Սա է իրականությունը:

Արտակ Հակոբյան

zham.am