Մարդու իրավունքների պաշտպանը՝ Սևանի 4–րդ դպրոցում տեղի ունեցած աղմկահարույց դասի մասին (video)

ՀՀ մարդու իրավունքների պաշտպան Քրիստիննե Գրիգորյանն այսօր՝ հունիսի 2-ին, ԱԺ-ում լրագրողների հետ զրույցում անդրադարձավ Սևանի N4 հիմնական դպրոցում բաց դասին, որտեղ ներկայացվել էր Ադրբեջանի և հարևան մյուս երկրների աշխարհագրական առանձնահատկությունները, մշակույթը, պատմությունը և ավանդույթները։

«Սևանի 4-րդ հիմնական դպրոցում տեղի ունեցած դեպքը մենք ուսումնասիրել ենք, նշված դպրոցում անցկացվել է բաց դաս, դասի թեման եղել է հարևան պետությունները։ Ես որևէ վատ բան չեմ տեսնում, որ հարևան պետությունների վերաբերյալ մեր գիտելիքները, կրթական բովանդակությունը ներառի նրանց դրոշի մասին տեղեկություն, նրանց ազգային առանձնահատկությունների վերաբերյալ պատմությունը, նաև խոհանոցը, ես դրանում որևէ վատ բան չեմ տեսնում, հակառակը՝ պատկերացնում եմ, որ երեխայի կրթության, զարգացման, իրազեկման տեսանկյունից շատ կարևոր է պատկերացնել այն միջավայրը, որում երեխան ապրում է»,- ասաց նա։

Հարցին՝ դպրոցի աշխարհագրության ուսուցչուհին իր ազգակա՞նն է, թե՞ ոչ, Գրիգորյանը ասաց․ «Այո, իմ ազգականն է, ինձ հետ իմ որևէ ազգական իր մասնագիտական գործունեությունը իրականացնելիս չի խորհրդակցում և դա կարծում եմ լավ է։ Ինչ վերաբերում է նրան՝ արդյո՞ք խոհանոցը պետք է ներգրավված լինի ուսումնական պրոցեսի ընթացքում, հարցի հասցեատերը կրթության նախարարությունն է։ Որպես ՄԻՊ ինձ համար լրիվ տրամաբանական է իմանալ հարևանների դրոշները, նրանց հետ մեր պատմությունը և այնպիսի օգտակար տեղեկություններ, որոնք կօգնեն մեզ որպես քաղաքացի դրսևորվել և կայանալ։

Համաձայն չեմ այն մտքի հետո, որ աշխարհագրության դասի ընթացքում պետք է ներկայացնել հարևան բոլոր պետությունների դրոշները բացառությամբ մեկ պետության։ Չափազանց ամոթալի եմ համարում նման տեսակի թիրախավորումը, նման նյութի մանիպուլյացիան՝ երեխաների ու դրոշների նկարներով, դա էժան մանիպուլյացիա է»,-ընդգծեց Քրիստինե Գրիգորյանը։

Վերջինս կոչ արեց որևէ կերպ քաղաքական խոսակցություններում չօգտագորել որևէ երեխայի պատկեր, որովհետև դա երեխայի շահից չի բխում:

Նշենք, որ Սևանի N4 հիմնական դպրոցն այս թեմայի վերաբերյալ պարզաբանում էր տարածել ու շեշտել. «Ի վերջո, մեր սերունդը հնարավորինս պետք է ճանաչի իր թշնամուն․․․»: