Բանկային ոլորտը հայտնվել է Նիկոլ Փաշինյանի թիրախում

Պետական եկամուտների կոմիտեի նախագահ Ռուստամ Բադասյանը խորհրդարանում հայտարարել է, որ ՊԵԿ-ը պետք է բանկային գաղտնիքի որոշակի հասանելիություն ստանա: Նրա խոսքով` Հայաստանն այսօր բազմակողմ կոնվենցիայի անդամ է, ինչն ենթադրում է այլ պետության հարկային մարմնի հարցմանը տալ պատասխան, այդ թվում նաև` բանկային գաղտնիք ներկայացնող տեղեկատվության տրամադրմամբ։ «Եթե այդ կոնվենցիայի շրջանակներում օտարերկրյա պետության հարկային մարմինը դիմում է մեզ, ապա մենք պարտավոր ենք բանկային գաղտնիք տրամադրել: Սակայն այդ բանկային գաղտնիքը հարկային մարմնին հասանելի չէ հարկային վարչարարության գործիքակազմի տեսանկյունից։ Այնուամենայնիվ, միջազգային փորձը հուշում է, որ բանկային գաղտնիքը հարկային մարմիններին հիմնականում հասանելի է։ Այս հարցում մենք ապավինում ենք Կենտրոնական բանկին։ Մենք չենք ուզում ԿԲ-ի հետ չհամաձայնեցված ինչ-որ կարգավորում առաջարկել, քանի որ դա բավականին նուրբ ոլորտ է»,- նշել է ՊԵԿ ղեկավարը:
ՊԵԿ նախագահի այս հայտարարությունը վստահաբար կարժանանա բանկային համակարգի դիմադրությանը։ Բանկային գաղտիքը ողջ աշխարհում պաշտպանված է օրենքով և պետությունը որևէ անձի բանկային գաղտիքներ պարունակող տվյալների հանդեպ հասանելիություն կարող է ստանալ միայն ու բացառապես դատարանի որոշմամբ։ Բայց արի ու տես, որ մասնագիտությամբ իրավաբան Ռուստամ Բադասյանն ուզում է բանկային գաղտիք պարունակող տվյալների տիրապետել՝ շրջանցելով դատարաններով։ Սաա էլ դեռ քիչ է, ուզում է այդ տվյալները փոխանցել երրորդ երկրի՝ սեփական հայեցողությամբ՝ առանց դատական ակտի։
Սա անձի մասնավոր սեփականության հանդեպ ոտնձգության փորձ է, որը կարող է անդառնալի հետևանք ունենալ կապիտալ շուկայի և բանկային համակարգի վրա։
Բայց սա Բադասյանի՝ բանկային ոլորտ մտնելու միակ նախաձեռնություն չէ։ Նրան խիստ անհանգստացնում է նաև կրիպտոակտիվների միջոցով գործարքներ անելու խնդիրը:
«Ունեցել ենք օպերատիվ հետախուզական միջոցառումներ, որտեղ արձանագրվել է մեծ գումարի կանխիկի տրամադրման դիմաց կրիպտոակտիվի ձեռքբերում և էլեկտրոնային դրամապանակի և այլ միջոցների վրա կրիպտակտիվի բացում: Բայց այդ գործողությունները չեն ունեցել որևէ արդյունք նաև այն պատճառով, որ կարգավորված չէ, թե կրիպտոակտիվներն ինչ իրավական կարգավիճակ ունեն, դրանով գործարքները ինչպես են իրականացվում»,- նշել է Ռուստամ Բադասյանը:
ՊԵԿ նախագահի խոսքով`աշխարհը գնացել է այդ խնդրի կարգավորման ճանապարհով և իրենք բազմիցս խնդրել են ԿԲ-ին, որ ոլորտը կարգավորի։
«Չկարգավորելով մենք թույլ ենք տալիս բազմաթիվ ստվերային գործարքներ, մինչդեռ աշխարհում դրա փորձը կա: Կրիպտոակտիվների միջոցով թե՛ հարկերից խուսափելու, թե՛ փողերի լվացման ռիսկերը, բնական է, որ կան, և շուտափույթ պետք է կարգավորել այդ հարցը: Չկարգավորվածությունը առավել ևս խնդիրներ է առաջացնում»,- ասել է Բադասյանը:
Ըստ էության՝ բանկային ոլորտը հայտնվել է իշխանության թիրախում։ Նրանք ամեն կերպ ուզում են վերահսկել բոլորի փողերը և այդ նպատակի համար ելքեր են փնտրում։
Հայկ Դավթյան