Նիկոլը կես տարի տակն էր դրել ականապատ դաշտերի քարտեզները․ Հայկ Մամիջանյան (video)

Արցախի համար պայքարելու ամենաճիշտ տեղը Ֆրանսիայի հրապարակն է, որովհետեւ եթե մենք չանենք այն, ինչ հիմա ենք անում, աշխարհը կասեր՝ հայերը համակերպվել են, իսկ հայերն այս արդյունքի հետ երբեք չեն համակերպվելու։ Այս մասին այսօր՝ մայիսի 31-ին, Ֆրանսիայի հրապարակում «Դիմադրություն» շարժման հանրահավաքի ժամանակ հայտարարեց «Պատիվ ունեմ» խմբակցության քարտուղար Հայկ Մամիջանյանը։

«Անցնող օրերի ընթացքում մեր ամբողջ ներքաղաքական կյանքը պտտվում է երկու ընդդիմադիր խմբակցությունների հայտարարությունների շուրջ, որովհետեւ Հայաստանի ներքաղաքական օրակարգը պետք է պտտվի հայկական օրակարգի շուրջ։ Անցնող օրերին շարժման անդամները տարբեր կոլիբրի ՔՊ-ականներից փորձում էին ստանալ պատասխան՝ կանգնած են հայտարարության կողքին, թե՝ ոչ։ Ես չեմ պատկերացնում աշխարհում մեկ հայ, որն այդ հայտարարությունը չկիսի»,- ասաց Մամիջանյանը։

Մամիջանյանն անդրադարձավ ներկայացված փաստաթղթի մի քանի կետերի՝ հիմնավորելով դրանք։

«Դուք հասցրել եք այն բանին, որ խոսում են Ղարաբաղում էթնիկ հայ բնակչության մասին, որ մեր Արցախը համարում են Ղարաբաղի մարզ։ Ըստ կապիտուլյացիոն փաստաթղթի՝ Հայաստանի եւ Արցախի միջեւ ցամաքային միջանցքի երկարությունը հինգ կմ է։ 5 կմ-ը կարելի է խոցել ծանր գնդացիրով։ Սա խայտառակություն է։ Հայաստանի Հանրապետությունը պատերազմից հետո Արցախի համար դարձել է սոցիալական հաբ, որը ցուցաբերում է սոցիալական աջակցություն, սակայն զրո անվտանգություն»,- ընդգծեց Հայկ Մամիջանյանը։

Հայկ Մամիջանյանի խոսքով՝ այս պայքարի մասնակիցները պետք է զինված լինեն փաստերով, որպեսզի մյուս հայրենակիցներին բացատրեն՝ ինչի համար մղվում պայքարը։

«Նիկոլը կես տարի տակն էր դրել ականապատ դաշտերի քարտեզները եւ դրանք փոխանցեց ընտրություններից առաջ միայն՝ մինչդեռ Բաքվի բանտերում տանջվում էին մեր տղաները։ Նիկոլը մարդու կյանքով քվե հավաքող է։ Մայիսի 12-ն էլ ոչ միայն մնաց անպատիժ, այլեւ եղավ նոյեմբերի 16-ը»,- ասաց Մամիջանյանը։

Հայկ Մամիջանյանն արձագանքեց իշխող խմբակցության պատգամավորների՝ իրենց հասցեին հնչած քննադատություններին։

«2016 թվականին նկար էիք գցում, ասում էիք՝ Աղդամն իմ հայրենիքն, հիմա էլ վախենում եք ասել՝ Արցախը չի լինելու Ադրբեջանի կազմում։ Իսկ Արցախը չի լինելու Ադրբեջանի կազմում։ Սրանք այդպես էլ չհասկացան, որ Արցախը մեզ համար իշխանություն պահելու տարբերակ չէ։ Ու եթե Նիկոլը մի փոքր նորմալ բանակցող լիներ, կօգտագործեր սա։ Բայց ինքը սա փորձում է կոտրել։ Ինքը փորձում է Ալիեւից ավելի Ալիեւ լինել»,- ամփոփեց պատգամավորը։