Պետք է դրսից նման հայտարարություններ անեն՝ նոր հասկանա՞նք, որ պետք է տեր կանգնենք մեր լեզվին
ՌԴ պետդումայի խոսնակ Վյաչեսլավ Վոլոդինի՝ ռուսերենը Հայաստանում պետական լեզու դարձնելու առաջարկը կրկին հակառուսական կրքեր է բորբոքել։
Ռուս պաշտոնյան առաջարկել էր Հայաստանի իշխանություններին երկրում օրենսդրորեն պաշտոնական կարգավիճակ տրամադրել ռուսերեն լեզվին, որպեսզի Ռուսաստանի տարածքում հնարավոր լինի ճանաչել հայկական վարորդական իրավունքները: «Ես կարող եմ միայն մի բան ասել, ամրագրեք այն (ռուսերեն լեզուն) որպես պաշտոնական լեզու, և այդ ժամանակ օրենքն ավտոմատ կընդգրկի նաև Հայաստանի Հանրապետությունը»,- ասել է Վոլոդինը:՛
Ինչպես հայտնի է 2017 թվականի հունիսի 1-ից Ռուսաստանում ուժի մեջ է մտել օտարերկրյա վարորդական իրավունք ունեցող վարորդներին ՌԴ-ի տարածքում աշխատելն արգելող օրենքը։ Հուլիսի 14-ին Պետդուման օրենք է ընդունել, որի համաձայն՝ Ղրղզստանի, ինչպես նաեւ այլ երկրների քաղաքացիներին, որտեղ ռուսերենը պետական լեզու է, թույլատրվում է Ռուսաստանի տարածքում վարորդ աշխատել ազգային վարորդական իրավունքների հիման վրա։
Առաջարկը մեծ աղմուկ է բարձրացրել հայաստանյան հասարակական-քաղաքական շրջանակներում, քաղաքական գործիչներից ոմանք ընդհուպ առաջարկում են ԵԱՏՄ-ից դուրս գալու գործընթաց սկսել։
Գրողների միության նախագահ Էդուարդ Միլիտոնյանը կարծում է, որ նախեւառաջ երկրի ներսում պետք է տեր կանգնել մեր գրին ու մշակույթին, որպեսզի ամեն նման առաջարկը ծանր հարված չընդունենք: «Հայաստանում մենք մեր գրի ու լեզվի հանդեպ ունե՞նք հոգածություն, ինչ է՝ պիտի դրսից նման հայտարարություններ անեն, նոր հասկանա՞նք, որ պետք է տեր կանգնենք մեր լեզվին»,- վրդովված հարց է հնչեցնում նա ու շարունակում․«Մենք պետք է ինքներս տեր կանգնենք մեր գրին ու գրականությանը,ճանաչենք մեր մշակույթը, թող ուրիշներն էլ ինչքան ուզում են խոսեն, առաջարկություններ անեն»։
Գրողների միության նախագահը խոսլով ԵՊՀ բանասիրության ֆակուլտետում առաջացած իրավիճակին, որ աննախադեպ թափուր տեղեր են առաջացել եւ չկա հետաքրքրություն հայերենի ու հայ գրականության հանդեպ, ասաց․«Այդպես էլ պիտի լիներ, բա ուրիշ ինչ էիք պատկերացնում։ Եթե գրականության եւ լեզվի հանդեպ մենք չունենանք ընդհանուր հոգածություն, գրականության եւ լեզվի ուսուցիչ դառնալու համար հինգը տարի չեն սովորի էլի, առաջ գնում էին սովորում էին ինչպես Մկրտչյանն էր ասում՝ օժիտի համար։ Դե, երեւի հիմա էլ դրա կարիքը չկա։ Մեր հասարակությունը մշակութային, հոգեւոր արժեքների նկատմամբ ապատիայի մեջ է ընկած, նրան հետաքրքրում է տնտեսությունը, բիզնեսը եւ այլն»։
Չնայած Վոլոդինի առաջարկը զուտ քաղաքական բնույթ է կրում, սակայն Գրողների միության ղեկավարը վստահ է, որ եթե Հայաստանում մենք հայերենի ու հայ գրականության նկատմամբ ամուր հոգածություն ունենայինք, մեծ ուշադրություն չէինք ներկայացնի նրա առաջարկին․«Մենք պետք է մեր ամրությունն ունենանք, եթե ամուր չենք, ապա ամենաթույլ հողմն էլ կքանդի մեզ»։
Էդուարդ Միլիտոնյանը նշում է, որ նախեւառաջ ուշադրություն պետք է դարձնել փողոցներում փակցված օտարալեզու գովազդային վահանակներին, դպրոցներում լեզվի ուսուցմանը եւ այլն․«Սրանք պետական լուրջ մտածողության խնդիրներ են, այդ մտածողության հարցը պետք է լուծենք։ Ոչ թե այսպես թավաքյալի, տնայնագործական մեթոդներով, ժողովուրդը ոչ իր լեզուն կկարողանա պահպանել, ոչ մշակույթը, ոչ կրթությությունը»:
Անի Սահակյան
Հետևեք մեզ Viber-ում
