Ում աչքին է թոզ փչում դաշնակցական նախարարը

Սևանից հավելյալ 100 մլն խորանարդ մետր ջրի բացթողնման հարցն, ինչպես ասում են, շատ ջուր վերցրեց: Ոչ միայն բնապահպաններն են շարունակում ահազանգել, որ դա բնապահպանական մեծ աղետ է լինելու Սեւանի մակարդակի հաշվեկռի խախտման առումով, այլեւ բնապահպանության դաշնակցական նախարար Արծվիկ Մինասյանն է իր որոշման մեջ հետողորմեա արել: Հիշեցնենք, որ նախագիծը խորհրդարանն ընդունեց այս ամսվա սկզբին: Հիշեցնենք նաև, որ բնապահպանության դաշնակցական նախարար Արծվիկ Մինասյանը ևս սկզբնապես առարկություններ էր ներկայացրել Սևանից հավելյալ 100 միլիոն խորանարդ մետր ջուր բաց թողնելու՝ կառավարության նախագծի հետ կապված: Ընդ որում, խորհրդարանական հանձնաժողովում կառավարության առաջարկի քննարկման ժամանակ ՀՅԴ-ն դեմ էր քվեարկել դրան: Տարածքային կառավարման, բնապահանության մշտական հանձնաժողովի ՀՅԴ-ական անդամ Սուրեն Մանուկյանն էր դեմ քվեարկողը: Դրանից մի քանի օր հետո, սակայն, երբ հարցը քննարկվում էր խորհրդարանի արտահերթ նիսում, իշխանական կոալցիայի մաս կազմող ՀՅԴ-ի ներկայացուցիչ ները հայտարարեցին, թե տեղի է ունեցել թյուրիմացություն եւ որ ՀՅԴ-ական նախարար Արծվիկ Մինասյանը ամենեւին էլ դեմ չէ նախագծին: Խորհրդարանական խմբակցությունը բնականաբար կողմ քվեարկեց: Բայց, ահա, հուլիսի 18-ին բնապահպանության նախարար Արծվիկ Մինասյանը ԱՄՆ ՄԶԳ կազմակերպած ջրային ռեսուրսների կառավարման թեմայով քննարկմանը հայտարարել է, որ չնայած կա Սեւանից լրացուցիչ ջրառի անհրաժեշտություն, այդուհանդերձ դա ունի լճի մակարդակի վրա բացասական ազդեցության ռիսկ: Այսինքն, Մինասյանը մեկ ամսվա ընթացքում, ըստ էության, մի քանի անգամ փոխեց իր դիրքորոշումը՝ վերջին հայտարարության համաձայն ռիսկային համարելով ջրառի պարագան Սեւանի համար: Թե ինչով է պայմանավորված նման շրջադարձը, արդեն դժվար չէ կռահել: Երբ նախագիծը դեռեւս հաստատման փուլում էր, բնականաբար ՀՅԴ-ականները պետք է առաջնորդվեին ոչ թե բնապահպանական նպատակահարմարությունից, այլ քաղաքական, ինչն էլ արեցին՝ թքած ունենալով Սեւանին սպասվող հնարավոր աղետի վրա, ինչի մասին ահազանգում են բնապահպանները: Հիմա, երբ նախագիծն արդեն ընդունվել է եւ օրենքի ուժ է ստացել, ՀՅԴ-ականները կարող են սովորության համաձայն <<կողմ ըլլալով՝ դեմ ըլլալ>>, կամ կույս մնալով հաճույք ստանալ՝ հանրային կորցրած վստահությունը վերականգնելու ապարդյուն հնարքներ գործադրելով: Կա նաեւ մեկ ուրիշ վարկած, որը կարող է որոշակիորեն հիմնավորել Արծվիկ Մինասյանի դիրքորոշման փոփոխությունը: Ինչպես հայտնի է այս օրերին սփյուռքյան դաշնակցականները Հայաստանում են եւ կան տեղեկություններ, որ նրանք լուրջ դժգոհություններ ունեն հայաստանյան ընկերների հանդեպ, մասնավորապես, ՀՀԿ-ի հետ կոալիցիայի հարցում, ինչի առիթով Հրանտ Մարգարյանի արդարացումները հայտնվեցին լրատվամիջոցներում, ով սփյուռքի ընկերներին բացատրել էր, որ կոալիցիան ինքնանպատակ չէ: Չի բացառվում, որ Արծվիկ Մինասյանը քննադատում է իշխանության վտանգավոր նախագիծը՝ ցույց տալու, որ իրենք իսկապես ինքնանպատակ չեն կոալիցիայում եւ նպատակադրված են համակարգային փոփոխությունների: Սակայն գնացքն արդեն գնացել է եւ նույնիսկ միամիտ սփյուռքի ներկայացուցիչների աչքին թոզ փչել հնարավոր չէ: Անի Սահակյան