Իվանիշվիլին փորձում է փակել Վրաստանում միակ ազատ հեռուստաալիքը. Սաակաշվիլի

Հատուկ նշանակության ջոկատը հրաժարվել է կատարել «Ռուսթավի 2» հեռուստաընկերությունը գրավելու հրամանը: Այս մասին հայտարարել է Վրաստանի նախկին նախագահ, Օդեսայի նահանգապետ Միխեիլ Սաակաշվիլին «Ռուսթավի 2» հեռուստաալիքի եթերում «Այլ շեշտադրումներ» հաղորդման ժամանակ: Սաակաշվիլիի խոսքով՝ Իվանիշվիլին մտադիր է եղել ուժի կիրառմամբ փակել «միակ ազատ հեռուստաալիքը: Նա իր խմբակցության անդամներին ասել է՝ վաղը մտնում եմ ու վերջ եմ տալիս «Ռուսթավի 2»-ին»: Սաակաշվիլիի խոսքով՝ Իվանիշվիլին փորձել է դրան հասնել բոլոր մեթոդներով, այդ թվում՝ ուժի կիրառմամբ և գաղտնի ձայնագրություններով, որոնք, Սաակաշվիլիի պնդմամբ, «ձեռք է բերել Անվտանգության դաշնային ծառայությունը, և որոնք օգտագործել է դրա մասնաճյուղը՝ Վրաստանի կառավարությունը»: Նա նաև նշել է, որ Անվտանգության դաշնային ծառայության՝ իր խոսակցությունների ձայնագրմանը մասնակցելու մասին իրեն պատմել են նաև ուկրաինացի ուժայինները: Սաակաշվիլիի խոսքով՝ ինքն անձամբ դեմ է ուժային մեթոդներին, իսկ հրապարակված ձայնագրություններում իր խոսքերը բացատրել է նրանով, որ «ազատության համար պետք է պայքարել, և երբ գործ ունես բավական բիրտ ուժի հետ, այդպիսի բաների պետք է պատրաստ լինել»: Սաակաշվիլին անհանգստություն է հայտնել առ այն, որ կարող էր բռնություն լինել, բայց վստահություն է հայտնել, որ «եթե ժողովուրդը մոբիլիզացվի, ուժային սցենարը Վրաստանում չի անցնի»: Նա վստահություն է հայտնել, որ Վրաստանի ներկայիս իշխանություններն ի վիճակի չեն ոչ մի նախագիծ իրականացնել, այդ թվում՝ նրանք, որոնք սկսվել են իր իշխանության օրոք, որոնցից հրաժարվել է «Վրացական երազանքը» և վերջերս վերադարձել է դրանց: Սաակաշվիլիի կարծիքով՝ Վրաստանի իշխանությունը չի կարողանա իրականացնել Անակլիայում և Լազիկիում նավահանգիստ կառուցելու նախագծերը: Նրա խոսքով՝ իշխանությունը ճիշտ տեսլական չունի: Նա նաև հիշել է թունելի կառուցման ծրագրերը, որը պետք է կրճատեր մինչև Սվանետի ճանապարհը: Վրաստանի նախկին նախագահը նաև պատմել է Ցկալտուբոյում հյուրանոցի կառուցման ծրագրերի մասին, որը, նրա խոսքով, նման կլիներ Բադեն-Բադենի բուժական-զբոսաշրջային ենթակառուցվածքին և յուրահատուկ հնարավորություն կտար: «Մենք ներդրողներ ու փող ունեինք, բայց տեսնո՞ւմ եք՝ նրանք ինչ արեցին»,- հայտարարել է Սաակաշվիլին: