Նոր մերժում ու ապտակ Ալիևից՝ Հայաստանի իշխանությանը
Հայաստանի իշխանություններն այդպես էլ համառորեն չհստակեցրեցին, թե ինչ պայմաններով են պատրաստ խաղաղության բանակցություններ սկսել Ադրբեջանի հետ...
Բաքուն սեփական հինգ առաջարկներն արդեն հրապարակել է, Երևանը՝ դեռ ոչ։
Երկրորդ ամիսն է Հայաստանի իշխանությունը չի հստակեցնում, թե ինչ պայմաններով է պատրաստ խաղաղության բանակցություններ սկսել Ադրբեջանի հետ։ Բաքուն սեփական հինգ առաջարկները կետ առ կետ դեռ մարտին հրապարակել է, Երևանը՝ դեռ ոչ, ավելին՝ ԱԱԽ քարտուղար Արմեն Գրիգորյանն անցյալ շաբաթ հայտնեց, թե Հայաստանն էլ 6 կետ է առաջարկել ու իբր կողմերի միջև արդեն կա փոխըմբռնում։
Պաշտոնական Երևանի հայտարարություններից, մինչդեռ հստակ չէ՝ հայկական կողմը բացառո՞ւմ է Արցախի որևէ կարգավիճակ Ադրբեջանի կազմում, թե՞ ոչ։ Ընդդիմադիրները վստահ են, որ երբ Փաշինյանը խոսում էր կարգավիճակի նշաձողն իջեցնելու մասին, հենց դա նկատի ուներ։
Բաքուն մի քանի օր լռեց, և ահա այսօր պարզ դարձավ, որ Արմեն Գրիգորյանի նշած «փոխըմբռնումը» չկա: Ադրբեջանն անտեսում է Հայաստանի ավելացրած կետերը գալիք բանակցությունների օրակարգում, այսօր ասել է Ադրբեջանի արտաքին գործերի փոխնախարար Խալաֆ Խալաֆովը, որը հարկ է համարել հիշեցնել, որ ըստ բրյուսելյան հանդիպման արդյունքների՝ հայկական կողմը համաձայնել է խաղաղության համաձայնագրին և սահմանագծման գործընթացին։ Խալաֆ Խալաֆովը նշել է, որ խաղաղ պայմանագրերը կնքվելու են Ադրբեջանի 5 կետերից բաղկացած առաջարկությունների հիման վրա։
Գումարած այս «նորությանը» Ադրբեջանի արտգործնախարարն էլ իր հերթին այսօր հայտնել է, որ Բաքուն և Երևանը պայմանավորվել են սահմանազատման հանձնաժողովի կազմի շուրջ...
Ադրբեջանի արտգործնախարար Ջեյհուն Բայրամովը հայտարարել է, որ Բաքուն և Երևանը պայմանավորվել են ադրբեջանա-հայկական սահմանի սահմանազատման և անվտանգության համատեղ հանձնաժողովի կազմի շուրջ։
«Ադրբեջանական կողմը Երևանին առաջարկել է ավելի բարձր մակարդակով հանձնաժողով կազմակերպել։ Հաշվի առնելով սահմանազատման գործընթացի մի շարք առանձնահատկություններ և տարբերություններ՝ մեր առաջարկն այն էր, որ հանձնաժողովը պետք է կազմակերպվի այլ ձևաչափով, այն ղեկավարվի ավելի բարձր մակարդակով։ Ադրբեջանական կողմի առաջարկն այն էր, որ ադրբեջանական կողմից հանձնաժողովը ղեկավարողը լինի փոխվարչապետի մակարդակով», - ասել է նա։
Բայրամովի խոսքով՝ Բաքուն և Երևանը համաձայնության են եկել հանձնաժողովի կազմի շուրջ։ «Հայկական կողմն ընդունել է մեր առաջարկը։ Կողմերը պայմանավորվածություն են ձեռք բերել հանձնաժողովի կազմի շուրջ։ Սակայն, ինչպես արդեն նշել ենք, առաջին հանդիպումը դեռ չի կայացել։ Մենք պատրաստ ենք հանդիպմանը», - հավելել է արտգործնախարարը։
Բաքվից, այսպիսով, հերթական մերժման մասին լուր ստացանք: Ավելին՝ Ալիևի իշխանություններն ասացին Փաշինյանի իշխանությանը, որ իրենց հետ պետք է բանակցեն իրենց սեփական օրակարգով ու իրենց սեփական սկզբունքներով:
Այս լեզվով խոսում Ալիևը Փաշինյանի իշխանության հետ:
Մետաքսյա Շալունց
Հետևեք մեզ Viber-ում
