ԱԺ փոխխոսնակ Իշխան Սաղաթելյանը հրապարակեց Նիկոլ Փաշինյանի հրաժարականի հանրային պահանջը. տեսանյութ

ԱԺ փոխխոսնակ, ՀՅԴ ԳՄ ներկայացուցիչ Իշխան Սաղաթելյանը Ֆրանսիայի հրապարակում ընթերցեց Նիկոլ Փաշինյանի հրաժարականի հանրային պահանջը:

«Հայաստանի վարչապետի պաշտոնը զբաղեցնող Նիկոլ Փաշինյանը տապալելով Արցախյան բանակցային գործընթացում հայկական շահերը պաշտպանելու գործը բերել է պատերազմ ու պարտություն»,- ասաց նա՝ ներկայացնելով տեքստը․

1․ ՀՀ վարչապետի պաշտոնը զբաղեցրած անձը, տապալելով արցախյան հակամարտության բանակցային գործընթացում հայկական շահերը պաշտպանելու գործը, բերել է պատերազմ ու պարտություն։

2․ Խոստովանել է, որ կարող էր կանխել պատերազմը, խուսափել հազարավոր զոհերից, բայց չի արել

3․2021թ․ հունիսին խոստացել էր 1-2 ամիս անց վերադարձնել գերիներին, բայց մինչ օրս գերիներ ունենք։

4․ Իր նախընտրական ծրագրով խոստացել էր, որ վարելու է Արցախի վերջնական կարգավիճակի հստակեցման քաղաքականություն՝ ինքնորոշման լիարժեք իրացման միջոցով։ Պնդել է, որ Արցախի ժողովուրդը չի կրող գոյատևել Ադրբեջանի ենթակայության տակ, բայց և հիմա գնում է այլ ճանապարհով։

5․ Խոստացել էր թռիչքաձև տնտեսական աճ, բայց աճում է երկրի արտաքին պարտքը, աղքատությունն ու մահերը

6․ Չի կատարել բազմաթիվ խոստումներ, որոնցից մեկը ողբերգական ավարտ ունեցավ․ «պադավատության» դեմ խոսող ներկայացող անձի շարասյունն օրը ցերեկով վրաերթի ենթարկեց հղի հայ կնոջը և, ինչպես միշտ, փախավ։

Ելնելով այս ամենից՝ Նիկոլ Փաշինյանը լեգիտիմ չէ, չունի մեր պետությունը նոր զիջումների տանելու մանդատ և պետք է հրաժարական տա։
Պահանջը հնչեցնելուց հետո Սաղաթելյանը, դիմելով հանրահավաքի մասնակիցներին, հայտարարեց, որ կազմակերպված շարժվում են դեպի ԱԺ։ Զգուշացրեց, որ հանրահավաքի որևէ մասնակից հանկարծ չտրվի որևէ սադրանքի։