Կադրային ջարդ և լարված իրավիճակ՝ «Քանաքեռ-Զեյթուն» բժշկական կենտրոնում. աշխատակիցներն ահազանգում են

Երևանի «Քանաքեռ-Զեյթուն» բժշկական կենտրոնի աշխատակիցներն այսօր ահազանգել են hayeli.am` տեղեկացնելով, որ հիվանդանոցում սկսվել է կադրային ջարդ, ինչպես նաև այնտեղ տիրում է ապօրինի և մասնագիտական էթիկայից դուրս իրավիճակ:

Բուժքույրերից մեկը հայտնեց, որ խոսքս վերաբերում է նոր ղեկավարությանը, որը եկել է Գրիգոր Լուսավորիչ բժշկական կենտրոնից։ «Սկսած առաջին իսկ օրվանից, բուժանձնակազմին պահում են լարված վիճակում` նսեմացնեմով, վիրավորելով, անգրագետ անվանելով, թե սխալ եք աշխատում»,- ասաց նա՝ և վրդովված հավելեց,- «Փաստորեն 30,40 տարիների բազմավաստակ փորձ ունեցող բժիշկները, քույրերը մինչև այժմ սխալ են աշխատել, որոնք էլ կանգնած են աշխատանքը կորցնելու եզրին»:

Մեկ այլ աշխատակից էլ նշեց, որ իրենց բացահայտ ասվում է՝ դիմում գրեք ազատվեք աշխատանքից։ Նա ավելացրեց նաև, որ հիվանդանոցում բոլորը գտնվում են նյարդային, գերլարված և սթրեսային վիճակում, չգիտեն՝ իրենց ինչ է սպասվում:
Ինչպես աշխատակիցները տեղեկացրեցին՝ փետրվարից ընկերության տնօրեն է նշանակվել Սերգեյ Միրզոյանը, իսկ գլխավոր բժիշկ՝ Աննա Մարտիրոսյանը, որոնք իրենց աշխատանքի գրեթե առաջին իսկ օրերից որդեգրել են կադրային ջարդի քաղաքականություն:

Մեզ ահազանգած աշխատակիցները նշեցին, որ փոխվել են շատերի աշխատանքային պայմանները, ռեժիմը, աշխատավարձը, ինչպես նաև հանձնարարվում է աշխատանքային պայմանագրով չսահմանված վայրում աշխատել, որի համար չեն վճարվում:
«Երբ մեր բողոքի մասին ուզում էինք բարձրաձայնել, արժանանում էինք անհարգալից վերաբերմունքի: Նորանշանակ գլխավոր բուժքույրն այցերի ժամանակ մեզ անգրագետ էր անվանում»,- ասաց աշխատանքից ազատված աշխատակիցներից մեկը՝ փաստելով, որ իրենց փոխարեն նոր մարդկանց են ընդունում աշխատանքի,- «Երևի իրենց մարդկանց են բերում»:

Նշենք, որ Երևանի «Քանաքեռ-Զեյթուն» բժշկական կենտրոնը հավատարմագրային կառավարման է հանձնվել “Մեդիքալ Ինվեստ” ՍՊԸ- ին։ Վերջինս պատկանում է նախկին քաղաքապետ, Կադաստրի պետական կոմիտեի նախագահ Երվանդ Զախարյանի դստերը։