Ռուսաստանը սկսել է գործի դնել սեփական սանկցիաները․ ովքեր կզրկվեն գազից, և ովքեր կկատարեն Պուտինի պահանջը

Ռուսական գազի մատակարար «Գազպրոմ» ընկերությունը հայտարարել է, որ դադարեցրել է Բուլղարիայի և Լեհաստանի գազի մատակարարումը։

««Գազպրոմ»-ն ամբողջությամբ դադարեցրել է գազի մատակարարումը Bulgargaz-ին (Բուլղարիա) եւ PGNiG-ին (Լեհաստան)՝ ռուբլով չվճարելու պատճառով»,- ասված է ընկերության տարարածած հաղորդագրության մեջ։
Նշվում է նաև, որ ապրիլի 26-ի աշխատանքային օրվա ավարտի դրությամբ «Գազպրոմ Էքսպորտ»-ը լեհական և բուլղարական ընկերություններից ապրիլին գազի մատակարարումների դիմաց ռուբլով վճարումներ չի ստացել։ Մինչդեռ ռուբլով վճարում կատարելու պահանջը սահմանված էրՌուսաստանի նախագահ Վլադիմիր Պուտինի մարտի 31-ի հրամանագրով։ Ընկերությունում հայտնել են, որ կոնտրագենտները ժամանակին տեղեկացվել էին մատակարարվող գազի դիմաց ռուբլով վճարելու անհրաժեշտության մասին։

«Գազպրոմ»-ում նաև զգուշացրել է, որ երրորդ երկրների կողմից տարանցիկ ճանապարհով ռուսաստանյան գազի չարտոնված դուրսբերման դեպքում տարանցիկ մատակարարումները կկրճատվեն համապատասխան ծավալով։ Գազի տարանցումն ընկերությունում խոստացել են վերսկսել այն պահից, երբ նշված ընկերությունները կկատաարեն ռուբլով վճարում։
Միաժամանակ ուշագրավ տեղեկություն է հրապարակել Forbes ամսագրի ռուսաստանյան հանդեսը՝ վկայակոչելով «Գազպրոմ»-ին մոտ կանգնած աղբյուրը ․ ռուսաստանյան բնական գազը գնող եվրոպական 10 ընկերություններ արդեն հատուկ հաշիվներ են բացել «Գազպրոմբանկ»-ում՝ գազի մատակարարումների դիմաց ռուբլով վճարելու նպատակով։

Ընդհանուր առմամբ, Մոսկվան սեփական գազատարներով հեղուկ գազ է մատակարարում եվրոպական 23 երկրների, որոնցից 21-ը ներառված են Ռուսաստանի կառավարության կողմից հրապարակված ոչ բարեկամական պետությունների ցանկում։

Հաղորդվում է նաև, որ եվրոպական չորս գնորդներ արդեն ռուսաստանյան գազի մատակարարումների համար վճարել են նոր սխեմայով, որն ենթադրում է ռուբլով հաշվի բացում «Գազպրոմբանկ»-ում։
Հիշեցնենք, որ Ռուս-ուկրաինական պատերազմի սկսվելուց հետո, երբ Եվրամիությունը պատժամիջոցներ սահմանեց Ռուսաստանի նկատմմաբ, որպես պատասխան քայլ՝ ՌԴ նախագահ Վլադիմիր Պուտինը հանձնարարեց եվրոպական և այլ ոչ բարեկամական երկրների համար ռուսաստանյան գազի մատակարարումների դիմաց վճարումները դարձնել ռուբլով: Այս կանոնն ուժի մեջ է մտել ապրիլի 1-ից։ Ըստ այդմ՝ օտարերկրյա գնորդները «Գազպրոմբանկ»-ում պետք է ունենան ռուբլով և արտարժութային հատուկ հաշիվներ՝ գազի դիմաց վճարելիս արժույթը ռուբլու փոխարկելու համար։ Եթե գազի դիմաց վճարումը ժամանակին չկատարվի, ապա գազի արտահանումը կարգելվի։

Երկու օր առաջ ՌԴ նախագահի խոսնակ Դմիտրի Պեսկովը հրաժարվել էր տվյալներ հրապարակել, թե որ երկրներն են համաձայնվել ռուսաստանյան գազի դիմաց վճարել ռուբլով։ Նա նշել էր, որ այս տեղեկությունը «հազիվ թե ենթակա է հրապարակման»։

Փաստորեն, այդ տեղեկատվությունն, ամեն դեպքում հրապարակվել է։Ըստ էության, ապագայում մենք ականատես կլինենք եվրոպական սանկցիաների ողջ հմայքին, երբ կպարզվի, որ պատժամիջոցների կիրառումը չի խանգարում Պուտինի՝ գազի դիմաց ռուբլով վճարելու պահանջի կատարմանը։ 

Հայկ Դավթյան