Սերժ Սարգսյանը լավ չի ճանաչել սեփական կլիենտին

ՀՀ երրորդ նախագահ Սերժ Սարգսյանը Հայոց ցեղասպանության հիշատակին վիրված ջահերով երթի ժամանակ մեկնաբանել է Նիկոլ Փաշինյանի այն հայտարարությունը, թե դեռ նախկինների ժամանակ միջազգային հանրության կողմից Արցախի նշաձողը իջեցնելու պահանջ է դրվել։ «Ձեր նախագահության ժամանակ այդպիսի պահանջ արդյոք եղե՞լ է»,- հարցրել է լրագրողը։
«Ո՛չ: Ի՞նչ է նշանակում դա: Ես կարծում եմ՝ այդպիսի հարցերին ոտի վրա պատասխանելն այդքան էլ հարիր չէ, բայց այդուհանդերձ, Ադրբեջանն էլ չէր ուզում 88-ից սկսած ընդհանրապես որևէ նշաձողի մասին խոսել, արդյո՞ք դա ինչ-որ այնպիսի մի փաստ է, որը մեզ պետք է ստիպեր հրաժարվել մեր նպատակներից, իհարկե, ո՛չ: Բոլոր այդ փաստաթղթերը կան, դուք պահանջեք Նիկոլ Փաշինյանից՝ թող հրապարակի, թե 2019թ. իրեն ինչ են առաջարկել, և ընդհանրապես իր համար ո՞րն է նշաձողը»:

Երրոդ նախագահն անդրադարձել է նաև 2018 թվականին տեղի ունեցած իշխանափախությանը՝ նշելով, որ եթե այն ժամանակ կարողանար կանխատեսել տեղի ունեցած ողջ արհավիրքը, միգուցե 2018-ի մարտ-ապրիլ ամիսներին այլ կերպ գործեր։
«Իհարկե, կցանկանայի, որպեսզի այսօր էլ մեր ժողովուրդը ցնծար հրապարակում, որպեսզի այդ ժամանակահատվածում ցնծար նրա համար, որ կառուցել է ավելի լավ երկիր, ավելի բերեկեցիկ Հայաստան, ավելի հզոր բանակ, ավելի ապահով Արցախ, բայց ցավոք սրտի, 2018թ. ցնծացող ժողովուրդը հիմա ողբում է. ողբում է կրկնապատկված, եռապատկված Եռաբլուրում, ողբում է Արցախի մի մասը կորցնելու համար, ողբում է մեր անպաշտպան սահմանների համար, կազմաքանդված բանակի համար, և այս առումով իհարկե ես ավելի շատ ցավ հիմա եմ ապրում, քան ապրել եմ 2018թ. այս օրը»:
Հարցին՝ չե՞ք փոշմանել, որ 2018թ. ուժ չեք կիրառել և թույլ եք տվել, որ տեղի ունենա այն, ինչ տեղի ունեցավ, նա պատասխանեց. «Ես այդ հարցին մի քանի անգամ պատասխանել եմ: Իրականության մեջ, ես չեմ փոշմանել, բայց եթե ես կարողանայի կանխատեսել այս ամբողջ արհավիրքը, միգուցե 2018թ. մարտ-ապրիլ ամիսներին այլ կերպ կգործեի, բայց իրոք չեմ փոշմանել, որ մեր խաբված ժողովրդի դեմ ուժ չեմ կիրառել: Ուղղակի կցանկանայի, որպեսզի այսօր էլ 2018թ. պահանջատեր ժողովուրդը նույն պահանաջատիրությամբ հանդես գար: Այդ ժողովրդին խոստացել էին կարճ ժամանակում Հայաստանը դրախտ դարձնել: Ցավոք սրտի, այն ժամանակվա ոգևորությունը այսօր վերածվել է հիասթափության, բայց մեր թիմը, մեր համակիրները, ողջախոհ մարդիկ պահանջատեր լինելուց առաջ հայրենասերներ են և ցանկացած պարագայում մենք կանգնելու ենք մեր ժողովրդի, մեր պետականության կողքին»,- նշել է Սերժ Սարգսյանը։
Փաստորեն, անգամ Ազատիչի նման շախմատիստը, որին միշտ հատուկ են եղել խորթափանցությունն ու իմաստությունը, մինչև վերջ չի ճանաչել սեփական կլիենտին։ Մինչև 2018 թվականը Հայաստանում քչերն էին կասկածում, որ Նիկոլ Փաշինյանը Բաղրամյան 26-ի, այսինքն՝ Սերժ Սարգսյանի քաղաքական հաճախորդն է։ Սա նույնքան հայտնի ճշմարտություն է, որքան այն, որ Նիկոլ Փաշինյանը Մարտի 1-ի հանցագործության հեղինակներից է։
Հայկ Դավթյան