Կրեմլը քավոր է կանգնում Նիկոլ Փաշինյանի խաղաղության դարաշրջանին

Նիկոլ Փաշինյանի Մոսկվա կատարած այցի ընթացքում՝ Պուտինի հետ հանդիպումից հետո հրապարակվել է համատեղ հայտարարության ընդգրկուն տեքստ։
Շուրջ 30 կետանոց հայտարարության մեջ խոսովում է տարբեր ոլորտներում հայ-ռուսական համագործակցության խորացման մասին։ Այդ տեքստում անդրադարձ է արվում նաև Հայաստանի՝ Սյունիքի տարածքով նախանշվող նոր կոմունիկացիաների, ինչպես նաև հայ-թուրքական հարաբերությունների վերաբերյալ։
Համատեղ հայտարարության 29-րդ կետում մասնավորապես նշվում է․ <<Ն.Վ.Փաշինյանը և Վ.Վ.Պուտինը ողջունեցին ռուսաստանյան աջակցությամբ մեկնարկած հայ-թուրքական հարաբերությունների նորմալացման գործընթացը>>։

Հայտարարության տեքստում խոսվում է նաև ռուս խաղաղապահների հետագա գործունեության մասին, նոյեմբերի 9-ի եռակողմ համաձայնագրի, սահմանազատման և հաղորդուղիների բացման մասին։
Հաղորդագրության մեջ նշվում է, որ կողմերը շեշտել են ռուսաստանյան խաղաղապահ զորակազմի որոշիչ ներդրումը Լեռնային Ղարաբաղի անվտանգության ապահովման, բնակչության կյանքի համար բարենպաստ և անվտանգ պայմանների ստեղծման գործում: Ընդգծեցին հումանիտար անհետաձգելի հարցերի հրատապ լուծման և քաղաքական-դիվանագիտական միջոցներով Լեռնային Ղարաբաղյան կարգավորման պահանջվածությունը:
<<Այդ համատեքստում հաստատեցին ԵԱՀԿ Մինսկի խմբի համանախագահության ինստիտուտի ներուժի և փորձի օգտագործման կարևորությունը՝ նրա միջազգային մանդատին համապատասխան։
Ն.Վ.Փաշինյանն և Վ.Վ.Պուտինը ընդգծեցին Հարավային Կովկասում բոլոր տնտեսական կապերի և տրանսպորտային ուղիների ապաշրջափակման հարցով եռակողմ աշխատանքային խմբի գործունեության ակտիվացման կարևորությունը՝ Ադրբեջանի, Հայաստանի և Ռուսաստանի փոխվարչապետների համատեղ նախագահությամբ:
Ռուսաստանյան կողմը պատրաստ է մասնակցել Հայաստանի երկաթուղային ենթակառուցվածքների, այդ թվում Հայաստանի Հանրապետության Սյունիքի և այլ մարզերում երկաթուղու վերականգնման նախագծերում:
Կողմերը պայմանավորվեցին, համաձայն 2021թ. նոյեմբերի 26-ի եռակողմ պայմանավորվածությունների, արագացնել հայ-ադրբեջանական սահմանի շրջանում սահմանազատման և անվտանգության հարցերով երկկողմ հանձնաժողովի ստեղծումը՝ Կողմերի հարցումով Ռուսասատանի Դաշնության խորհրդատվական աջակցությամբ>>,- նշվում է հայտարարության մեջ:
Կրեմլն, այսպիսով, շեշտում է տարածաշրջանում իր ներկայությունը՝  վավերացնելով և ք Նիկոլ Փաշինյանի հռչակած խաղաղության դարաշրջանի քաղաքականությունը, որն ենթադրում է թուրքական ազդեցության շրջանակի ընդլայնում Հարավային Կովկասում՝ ի հաշիվ Հայաստանի։ Ռուսաստանը չի ուզում ձեռքերը լվանալ հայ-թուրքական հարաբերություններից՝ թերևս հասկանալով, որ Հայաստանի այսօրվա իշխանությունը անդառնալիորեն քայլում է դեպի Թուրքիա։ Նման իրավիճակում ավելի շահեկան է քավոր կանգնել գործարքին, քան թե հրաժարվել նրանից։
Արցախի կարգավիճակի հարցն այս փուլում Ռուսաստանի համար առաջնային չէ, իսկ Հայաստանի անունից բանակցող Նիկոլ Փաշինյանը չի կարողացել այդ թեմայով անգամ քննարկում ծավալել։ Այս պահին Ռուսաստանի առանցքային հետաքրքրությունը մեր տարածաշրջանում սեփական խաղաղապահ զորքի հետագա ներկայության ապահովումն է։ Մնացած հարցերը Կրեմլը գերադասել է թողնել հետոյին՝ որոնց միգուցե կանդրադառնա Ուկարինայի պատերազմի ավարտից հետո։

Իսկ թե ինչ է լինելու հայկական հարցի հետ՝ շարունակում է մնալ առավել մտահոգիչ, քան երբևէ եղել է։

Հայկ Դավթյան