Իսկ Ռոբերտ Քոչարյանը մտածե՞լ է
Այսօր հրապարակվել է Հայաստանի երկրորդ նախագահ Ռոբերտ Քոչարյանի հարցազրույցը «Ազատություն» ռադիոկայանի ռուսական ծառայության «Ռուսաստանն ու ես» խորագրին: Դեռեւս անցած տարվա սեպտեմբերին կայացած հարցազրույցի առանձին դրվագներ հրապարակվել էին ավելի վաղ, իսկ այժմ հարցազրույցը հրապարակվում է ամբողջությամբ: Նախապես հայտարարվում էր, թե հարցազրույցը ամբողջությամբ կհրապարակվի հոկտեմբեր-նոյեմբերին, սակայն հրապարակվեց, փաստորեն, մի քանի ամիս ուշացումով եւ հենց այս համատեքստում է, որ հետաքրքրական են դառնում ոչ այնքան հարցազրույցում արտահայտվող մտքերը, որոնց մեծ մասը այնքան էլ նորություն չեն, որքան ուշագրավ է այն, թե ինչու է հարցազրույցն ամբողջական կերպով հրապարակվում հենց այս օրերին՝ հայտնի ելույթից հետո, որով , ըստ քաղաքագիտական, կարծիքի Սերժ Սսարգսյանը բոլորին եւ այդ թվում Քոչարյանին զրկեց քաղաքական հենարանից ու քաղաքական պրոցեսներում այսպես կոչված <<խաղեր տալու>> հնարավորությունից: Այդպես է ուզել Ռոբերտ Քոչարյա՞նը, թե՞ այդպես է տնօրինել «Ազատություն» ռադիոկայանը քաղաքագետ Ստյոպա Սսաֆարյանը հստակ չի կարող ասել.<<Բայց, իհարկե, քաղաքական պահի ընտրությունը կարեւոր է>> ասաց նա: Այս առումով հետաքրքրական է. կարծես հաշվարկված է Քոչարյանի հարցազրույցի նոր հատվածի բովանդակությունը, որը Ռուսաստանին ուղղված աննկարագրելի ժեստ է ու կարծես երդում Քոչարյանից, որ ինքը Ռուսաստանի ամենաձեռնտու եւ հավատարիմ <<մարդն>> է: Քոչարյանը հայտարարում է, որ Ռուսաստանն իր համար ավելին է, քան պետությունը: «Ես ռուսական կրթություն ունեմ, դաստիարակությունս որոշակիորեն հայկական ավանդույթների ու ռուսական մշակույթի, արվեստի, գրականության խառնուրդն է: Այդ պատճառով ինձ համար Ռուսաստանն ավելին է, քան ուղղակի պետությունը, հարևանը, երկիրը, որի հետ մենք շատ սերտ հարաբերություններ ունենք: Ռուսաստանն առաջին հերթին ասոցացվում է հենց այդ՝ ռուսական մշակույթի, արվեստի, գրականության առումով: Ռուսաստանն ինձ դուր է գալիս»,- ասում է Ռոբերտ Քոչարյանը ու դրան հակադրում ՀՀ իշխանությունների ներկայիս ոչ այնքան ռուսամետ դիրքորոշումը: Մասնավորապես, անդրադառնալով Գյումրիում տեղակայված ռուսական ռազմաբազային, ռուս զինվորականի կողմից հայ ընտանիքի սպանությանը, Քոչարյանն ասել է․ «Ես չեմ կարծում, որ այդ ողբերգությունը լուրջ անդրադարձ կունենա հայ-ռուսական հարաբերությունների վրա, իսկ բողոքները չէր հասնի այդ ծավալի և երկարության, եթե ժամանակին համապատասխան միջոցառումներ ձեռնարկվեին։ Դա զինվորական հանցագործություն չէր և հայկական իրավապահ մարմինները պետք է զբաղվեին այդ գործով: Ալիքն էմոցիոնալ կլիներ, ոչ քաղաքական», ՀՀ իշխանություններին, ըստ էության, հակառուսական կրքեր հրահրելու մեջ է մեղադրել երկրորդ նախագահը: Գյումրիում տեղակայված ռուսական ռազմաբազայի հանդեպ իր վերաբերմունքի մասին հարցին Քոչարյանը պատասխանել է, որ դրա առկայությունը այս վտանգավոր տարածաշրջանում անվտագության զգացողություն է հաղորդում, եթե ոչ հենց անվտագություն է բերում: Քաղաքագետ Ստյոպա Սաֆարյանը ռազմաբազայի վերաբերյալ Քոչարյանի դիտարկումները մեկնաբանելով նկատեց, որ Ռոբերտ Քոչարյանին ամենեւին չի հետաքրքրում, որ նույն ռազմաբազային զինվորի կողմից մի ամբողջ հայ ընտանիք է ոչնչացվել.<<Ռոբերտ Քոչարյանը վատ գիտի հասարակական կարծիքը: Հասարակությունը չի հասկանում, թե այդ ռազմաբազան ինչի համար է, եթե սահմանին կանգնած չի, ավելին, սահմանին կանգնած չէ ու նման բաներ են տեղի ունենում, իսկ ի՞նչ պիտի լիներ սրանից ավելին, որպեսզի լուրջ անդրադարձ ունենար >> ասաց պարոն Սաֆարյանը: Նրա խոսքով, բնական է, որ Քոչարյանը պետք է արդարացնի ռազմաբազայի գոյության անհրաժեշտությունը.<<Չէ՞ որ իր պաշտոնավարման շրջանում բազմաթիվ պայմանագրեր են կնքվել, որոնք ուղղված էին ռուս-հայկական ռազմաքաղաքական այսպես կոչված անվտանգությունն ապահովելուն, բայց իրականում մենք տեսնում ենք, որ դրանք առանձնապես անվտանգության զգացողություններ չեն բերում>>: Սաֆարյանը հարցրեց.<<Իսկ Ռոբերտ Քոչարյանը մտածե՞լ է, թե տավուշցին ի՞նչ է մտածում ռուս-հայկական համագործակցության կամ ռազմաբազայի մասին, տավուշցին այսօր իր սահմանի պաշտպանության գործում տեսնում է բացառապես հայ զինվորին>>,- ասաց քաղաքագետը` շարունակելով.<< Չեմ ուզում նսեմացնել ու ասել, որ մենք սպառազինության խնդիր չենք լուծել, բայց անթույլատրելի է, որ երկրի երկրորդ նախագահը իր մտածելակերպով Ռուսաստանն ավելին է համարում, քան պետությունը>>: Թեպետ, Սաֆարյանի համար Ռուսաստանի մասին երկրորդ նախագահի հայտարարությունները նորություն չեն: Քաղաքագետը հիշեցրեց Քոչարյանի՝ տարիներ առաջվա հայտարարությունը, որ ինքը ռուսերեն է մտածում.<<Ես չեմ զարմանում հիմա, որ Հայաստանի անվտանգության խնդիրները իր համար փոքր խնդիրներ են, ինքը երեւի իրեն համարում է տիեզերական մակարդակի պետական գործիչ, դրա համար Տավուշի եւ այլնի խնդիրները փոքր մասշտաբի են>>: Անի Սահակյան