Սուրենյանցն ազատ կարձակվի՞

Քաղաքագետ Սուրեն Սուրենյանցն արդեն երեք օր է դադարեցրել է հացադուլը: 18 օր հացադուլի մեջ գտնված Սուրենյանցի վիճակը բավարար է: «Պահանջը չի բավարարվել, պարզապես Վերաքննիչ դատարանում մեր բողոքի հիման վրա դատ է նշանակվել, որը տեղի կունենա փետրվարի 25-ին: Մենք ամեն դեպքում փորձում ենք հավատալ»,-Հայելի.am-ի թղթակցի հետ զրույցում ասաց քաղաքագետի կինը՝ Արփի Սուրենյանցը: Նշենք, որ Արփի Սուրենյանցը մանկահասակ երեխա ունի: Նա հավատում է, որ ամուսինը շուտով կմիանա ընտանիքին: «Ամուսինս գործով տուժողներին գումարներ պետք է վճարի: Նա ասել է, որ եթե դա տեղի ունենա, ապա հնարավոր է, որ հենց  դատարանի դահլիճից ազատ արձակվի, կամ պայմանական ազատ արձակվի»,-ընդգծեց Արփի Սուրենյանցը: Արփի Սուրենյանցը տեղեկացրեց, որ Սուրենյանցի հացադուլին պատճառ դարձած՝ մեկ միլիոն դրամը, որը վճարվել է նրան գրավի դիմաց ազատ արձակելու համար, կվերադարձվի վերաքննիչ դատարանի որոշումից 10-ը օր հետո: Հիշեցնենք, որ Սուրեն Սուրենյանցը մեղավոր է ճանաչվել զգալի չափերով հափշտակություն կատարելու մեջ եւ դատապարտվել է 4 տարվա ազատազրկման: Ըստ մեղադրական եզրակացության՝ իր հանցավոր մտադրությունն իրականացնելու համար օգտագործելով ՀՀ պաշտպանության նախարարության կողմից ազատամարտիկների հատկացվող բնակարաններ ձեռք բերելու հարմար առիթը` գործընթացն արագացնելու ուղղությամբ սուտ խոստումներ է տվել Անուշ Աղաջանյանին եւ վերջինիս վստահություն չարաշահելու եղանակով վերջինիս վերցրել է 30.000 ՀՀ դրամ և 454.286 ՀՀ դրամին համարժեք 1.100 ԱՄՆ դոլար գումար եւ այդ ուղղությամբ որեւէ գործողություն չկատարելով` խաբեությամբ հափշտակել է զգալի չափերի` 484.286 ՀՀ դրամ գումար: Բացի այդ, Սուրենյանցը բժշկական փաստաթղթեր ձևակերպելու եւ Ազգանուշ Մուշեղյանի եղբորը ժամկետային զինվորական ծառայությունից ազատելու պատրվակը` այդ ուղղությամբ սուտ խոստումներ է տվել նրան եւ վստահությունը չարաշահելու եղանակով նրանից վերցրել է 400.000 եւ 800.000 ՀՀ դրամ գումար: Նա նաեւ ԱՄՆ դասընթացների ուղարկելու գործընթացը կազմակերպելու շուրջ սուտ խոստումներ է տվել երկու անձանց եւ նրանցից վերցրել է 500 եւ 400 ԱՄՆ դոլարին համարժեք ՀՀ դրամ: Աստղիկ Ավագյան