«Միռամը» ցանկանում է Շեկաղբյուրի ոսկու հանքը շահագործել, գյուղացիները՝ ոչ. «Փաստ»

«Փաստ» օրաթերթը գրում է. Օրեր առաջ Լոռու մարզի Արդվի համայնքի բնակիչները լրատվամիջոցներից տեղեկանալով իրենց համայնքի Շեկաղբյուր սարավանդում նախատեսվող հանքավայրի հետախուզական աշխատանքների և դրա հետ կապված հուլիսի 26–ին կայանալիք հանրային լսումների վերաբերյալ, արդեն երկու օր է ստորագրահավաքի աշխատանքներ են իրականացնում՝ ոչ ասելով իրենց գյուղում նման գործունեություն ծավալել պատրաստվող «Միռամ» ընկերությանը: Ստորագրահավաքի նամակում նաև կարդում ենք, որ արդվեցիները այս գործընթացներից բոլորովին անտեղյակ են եղել և չեն մասնակցել որևէ հանրային քննարկման: Մինչդեռ ըստ Բնապահպանության նախարարության՝ նշված համայնքում և նշված գործընթացի հետ կապված հուլիսի 26–ին կայանալիք հանրային լսումները թվով երկրորդն են: Այս ամենը բնականաբար շատ է զայրացրել գյուղացիներին, ովքեր արտահայտելով իրենց դժգոհությունը ստեղծված իրավիճակի վերաբերյալ՝ սկսել են ստորագրահավաքը, ինչպես նաև մակերեսորեն խորհրդակցելով ոլորտի մասնագետների հետ հասկացել, որ այն վատ հետևանքներով է հղի: Չնայած վերջինների համար առանց որևէ մասնագիտական կարծիքի էլ հասկանալի է, որ հանքի շահագործման արդյունքում լավ ավարտ ու առհասարակ ոչ մի լավ բան իրենց գյուղի համար չի լինելու: Նշենք, որ երեկվա դրությամբ ստորագրությունների թղթի տակ ստորագրել է համայնքի 240 բնակչի ուղիղ մեկ երրորդը՝ 81 հոգի: «Միռամ» ՍՊԸ–ն նախատեսում է Լոռու մարզի Շեկաղբյուրի ոսկի–բազմամետաղների հանքերևակումում օգտակար հանածոների երկրաբանական ուսումնասիրություններ կատարել 2017–2020 թթ. ընթացքում: Երկրաբանական ուսումնասիրության համար նախատեսված տեղամասը ներառված է Արդվի և Մղարթ համայնքներում: Հանքերևակման տարածքը ընդհանուր առմամբ զբաղեցնելու է մոտ 200 հա մակերես: Ըստ ընկերության կողմից ներկայացված նախնական գնահատման հայտի՝ երկրաբանական ուսումնասիրության աշխատանքների ժամանակ աղտոտված օդի արտանետումները շատ փոքր են լինելու: Ազդեցությունը շրջակա միջավայրի վրա հիմնականում պայմանավորված է լինելու հորատման հարթակների կառուցման և աշխատող մեքենաների և սարքավորումների շարժիչների հետ կապված վնասակար նյութերի արտանետումներով: Բացի այդ ընկերությունը պատրաստվում է բնապահպանական միջոցառումների համար տարեկան մասնահանել 350 հազար դրամ, ինչի վերաբերյալ Արդվի համայնքի բնակիչներից մեկը մեզ հետ զրույցում ասաց, որ դա պարզապես ծիծաղելի թիվ է, և ավելի լավ է չփչացնել, քան հետո վերականգնողական աշխատանքներ տանել: Խնդրի հետ կապված «Փաստը» զրուցել է արդվեցի մի բնակչի հետ, ով կիսում է համագյուղացիների մտահոգությունը և նույնպես ստորագրել է վերոնշյալ թուղթը: Նա ինչ–ինչ հանգամանքներով դեռևս չցանկացավ ներկայանալ: Սակայն հաստատեց, որ հուլիսի 26–ին ներկա է լինելու հանրային լսումներին: Արդվեցի բնակչի խոսքով՝ հիմնական խնդիրը կայանում է նրանում, որ հանքերևակման համար ընտրված հատվածը գյուղի անմիջապես վերևում է և արդյունքում ցանկացած փոշի գյուղի վրա է իջնելու: «Գյուղի 400 հա–ից 150–ն արդեն իսկ ընդգրկված է հետախուզման ենթակա տարածքում: Իրենք իհարկե կասեն, որ պիտի ծակենք, խոմ ավել բան չենք անելու: Բայց ամեն մի հետախուզման համար ճանապարհ ու հրապարակ է գցվում, ինչն արդեն իսկ վնաս է արոտավայրերին: Եթե անգամ այնտեղ 10–15 տարվա ոսկու պաշար լինի, այդ 15 տարվա համար գյուղը փչացնել ոչ ոք չի ուզում»,– ասաց նա: Ըստ նրա՝ գյուղացիներից միայն մեկն է ասել, որ պատրաստ է աշխատել հանքում, մնացած բոլորը միաձայն դեմ են: Նշենք, որ հանքերևակման տարածքից մի փոքր ներքև են գտնվում Հովհան Օձնեցու եկեղեցին և 3–4–րդ դարի խաչքարեր ու հուշարձաններ, ուր տուրիստների մեծաթիվ հոսք կա: Վերջինները գալիս են և՛ եկեղեցին, և՛ Օձի պորտ կոչվող հուշարձանը տեսնելու: Ինչի հետ կապված գյուղացիները մտադրություն ունեն տուրիստական կենտրոն ստեղծել: Սակայն ըստ մեր զրուցակցի՝ բոլորին է հասկանալի, որ այդ տարածքում հանք լինելու դեպքում, տուրիստն այդտեղ անգամ 10 րոպե չի մնա կամ գուցե և չգա: Շարունակությունը` «Փաստ» օրաթերթի այսօրվա համարում