Արյուն տեսած տղա է. ազատամարտիկ Կարինեն հացադուլ հայտարարած Աղասիի մասին

«Ազիզ տղա է «Տիգրան Մեծ»-ի Աղասը: Ճիշտ է, ես ՀԱԲ-ից եմ, բայց իրար հետ մարտական ճանապարհ ենք անցել»,-Հայելի.am-ի թղթակցի հետ զրույցում` անդրադառնալով փետրվարի 15-ից հացադուլ հայտարարած ազատամարտիկ Աղասի Մարտիրոսյանին,  ասաց ազատամարտիկ Կարինե Մինասյանը: Կարինե Մինասյանի խոսքով` Աղասի Մարտիրոսյանը արյան ու ցավի շնորհիվ հաղթանակի հասած տեսակ է: «Ազատամարտիկները չեն կարող մոռանալ ընկերոջը: Մեր Ապարը ու Աղասը ընկերոջ համար հոգի տվող տղաներ են եղել: Իրենց տեռորիստ որակավորումը չի կարելի տալ:Մենք բոլորս տեռորիստ ենք, բայց թուրքի համար: Մենք մեր ազգի համար պաշտպան կարող ենք լինել միայն»,-ընդգծեց Կարինե Մինասյանը: Նշենք, որ Արթուր Վարդանյանի ղեկավարած զինված հանցավոր խմբի գործով կալանավորված ազատամարտիկ Աղասի Մարտիրոսյանը, որը կալանքի տակ է երկու ամսից ավելի, հացադուլ է հայտարարել: Մեր զրույցում ՀՀ ԱՆ քրեակատարողական վարչության հանրային կապերի բաժնի պետ Գոռ Ղլեչյանն ասաց, որ Աղասի Մարտիրոսյանը հացադուլ է հայտարարել փետրվարի 15-ից, նա գտնվում է հացադուլավորների համար նախատեսված խցում, վիճակը գնահատվում է բավարար: Հիշեցնենք, որ Աղասի Սերյոժայի Մարտիրոսյանը «Մեծն Տիգրան» գնդի հետախուզական վաշտի անդամն էր եւ ձերբակալությունից երկու օր առաջ Սեյրան Օհանյանի կողմից պարգեւատրվել էր շքանշանով: Լուսինե Ղազարյան