Բա որ ՀՅԴ-ն «քցի»
ՀՀԿ-ՀՅԴ հնարավոր համագործակցության մասին գաղտնազերծման առաջին իսկ պահից շատերին է հետաքրքրում, թե ՀՀԿ-ի ինչին է պետք մինչեւ վերջին խազը վարկաբեկված խորհրդարանի ամենափոքրաթիվ խմբակցության հետ համագործակցությունը: Երբ որոշակի դարձան զիջելիք պաշտոններն ու դրանց թիվը, կատարվելիքը աբսուրդի հասավ: Բայց քաղաքական վերջին իրադարձություններից ու Սերժ Սարգսյանի հայտնի ելույթից հետո հասկանալի դարձավ, որ հին ընկերների հետ համագործակցությունը Սերժ Սարգսյանին հարկավոր է նախեւառաջ ընդդիմադիր ջլատված դաշտը վերջնականապես փոշիացնելու, ինչպես նաեւ ներթիմային որոշակի հարցեր լուծելու, մասնավորապես, իշխանության ըմբոստ թեւերի դեմ գործակցությունն իբրեւ մահակ կիրառելու նպատակներով: Այս ամենից բացի քաղաքագիտական շրջանակները հանդես եկան վերլուծություններով, որ արտաքին քաղաքական զարգացումների համատեքստում ապագա կոալիցիան եւս բխում է Հայաստանի իշխանությունների շահերից: Շահը` շահ, բայց կա նաեւ գրքի հակառակ կողմը. ի՞նչ երաշխիք, որ համագործակցության կես ճանապարհից ՀՅԴ-ն, այսպես ասած, չի <<քցի>> ՀՀԿ-ին: Իհարկե, դժվար է հավատալ, որ ՀՅԴ-ն կարող է այնքան ազատություն ստանալ, որպեսզի ինչ-որ պահի վերականգնի նախկին կապերը նախկին նախագահի հետ, ում իշխանության ժամանակ դաշնակցականները ապահովություն և հույսեր վերագտան: Խոսքը դաշնակցությանը բնորոշ մանր-մունր քցոցիի մասին է, որը վարկաբեկման գործընթաց է կոչվում: Բանակցությունների հենց սկզբից ՀՅԴ-ականները հրապարակավ սկսեցին վարկաբեկել ու մեղադրանքներ ներկայացնել ՀՀԿ-ին, միայն թե կարողանա նրանից ավելին կորզել: Հենց այդ պատճառով էլ ՀՅԴ խմբակցության ղեկավար Արմեն Ռուստամյանն ամենաանհարմար պահին հայտարարեց, թե իշխող ուժը վարկաբեկված է, ասել է թե՝ անկման եզրին ու միայն փրկիչ հրեշտակ դաշնակներն են, որ կարող են գալ ու փրկել Հանրապետականի վարկը: Այս իմաստով Ռուստամյանն էլ ավելի հեռուն գնաց ՝ հավելելով, որ իրենք էլ հեղինակազրկվում են իշխող ուժի հետ համագործակցելով: Այլ կերպ ասած՝ մեծ զոհաբերումների են գնում, իսկ ամեն զոհաբերում իր գինն ունի: Երկրորդ փոքրիկ <<ուրացումը>> եղավ օրեր առաջ, կրկին Ռուստամյանի կողմից: Բանակցությունները դեռ ավարտին չհասցրած, ՀՀԿ ԳՄ նիստից առաջ Ռռուստամյանը հարցազրույց տվեց ու հաստատեց ՀՀԿ-ի հետ համագործակցության արդյունքում Դաշնակցության երեք նախարարների մասին մամուլի տեղեկությունները. Դավիթ Լոքյանը՝ տարածքային կառավարման, Արծվիկ Մինասյանը՝ էկոնոմիկայի, իսկ Լևոն Մկրտչյանը՝ կրթության ու գիտության: Արմեն Ռուստամյանը հաստատել է նաև, որ ՀՅԴ-ն ՀՀԿ-ի հետ կնքելու է քաղաքական երկարատև համագործակցության համաձայնություն: Մինչդեռ մի քանի ժամ անց ԳՄ նիստից հետո Շարմազանովը հայտարարեց, որ դեռ բանակցությունները շարունակվում են, այդ պատճառով էլ ինքը չխոսեց ՀՅԴ-ին տրվելիք պաշտոնների մասին: Ստացվեց, որ մինչեւ Սերժ Սարգսյանի ու կուսակիցների վերջնական քննարկումը իրենց արդեն ասվել է, թե ինչ տրվելու, ասել է թե՝ՀՀ նախագահը դաշնակներին ավելի է արժեւորել, հաշվի նստել, քան կուսակիցներին… Այն, որ մի կաթսայի մեջ երկու գլուխ չի եփվի, սա արդեն հստակ է: Պարզ չէ միայն, թե նման իրավիճակում որքան երկար կտևի կոալիցիան: Անի Սահակյան
Հետևեք մեզ Viber-ում
