Ալիևը Փաշինյանին մեղադրեց՝ «Ադրբեջանի նկատմամբ տարածքային պահանջներ ունենալու» մեջ. «Խաղաղության» գագաթնակետ
Հայաստանը պետք է հրաժարվի Ադրբեջանի նկատմամբ տարածքային պահանջներից՝ հարաբերությունները կարգավորելու համար, ասել է Ադրբեջանի նախագահի օգնական Հիքմեթ Հաջիևը։ Նա նշել է, որ երկու երկրների հարաբերությունները կարգավորելու համար ադրբեջանական կողմը հայկականին է փոխանցել հինգ կետից բաղկացած փաստաթուղթ, որը «ներառում է Հելսինկյան համաձայնագրերի սկզբունքները»։
«Մենք հայկական կողմին ներկայացրել ենք խաղաղության պայմանագրի հիմնարար սկզբունքները, պոտենցիալ խաղաղության պայմանագիր Հայաստանի և Ադրբեջանի միջև։ Դրանք ձևակերպված են միջազգային իրավունքի նորմերի և սկզբունքների հիման վրա և հիմք են հանդիսանում բարիդրացիական հարաբերությունների համար», - հայտարարել է Հաջիևը` շեշտելով, որ եթե Երևանը ցանկանում է այդ հարաբերությունները հաստատել, ամեն ինչ սկսվում է առաջին և ամենակարևոր որոշումից` այն է. «Հայաստանն ու Ադրբեջանը պետք է ճանաչեն միմյանց տարածքային ամբողջականությունը, ինքնիշխանությունը և սահմանների անձեռնմխելիությունը, ինչպես նաև զերծ մնան ուժի կիրառումից և ուժի սպառնալիքից տարածքային ամբողջականության դեմ»: Նրա խոսքով` այն ժամանակ, երբ «Հայաստանը վերջ տա Ադրբեջանի նկատմամբ տարածքային պահանջներին», հնարավոր կլինի առաջ շարժվել:
Բաքվի Երևանին փոխանցված առաջարկները Երևանը համարել է ընդունելի, բայց ոչ ամբողջական և լրացրել է առաջարկներով` բարձրաձայնելով իր պատրաստակամությունն անմիջապես սկսել բանակցությունները՝ այդ ամբողջական սկզբունքների հիման վրա՝ ԵԱՀԿ Մինսկի խմբի համանախագահության շրջանակներում:
Ղարաբաղի կարգավիճակի հարցը բանակցությունների օրակարգում ընդգրկելու Հայաստանի առաջարկին Ադրբեջանից այդպես էլ չէին արձագանքել, իսկ հինգշաբթի վարչապետի՝ Ղարաբաղում ստեղծված լարված իրավիճակի մասին ելույթից հետո միայն Բաքուն նորից հայտարարեց, որ կարգավորել է ղարաբաղյան հակամարտությունը։
Զավեշտն այն է, որ Ադրբեջանի իշխանությունները, փաստորեն, Փաշինյանի իշխանության հետ այս տոնով են խոսում, այլ կերպ ասած՝ դեռ Հայաստանին են ռազմատենչ որակում, մեղադրելով, թե իբր Հայաստանը Ադրբեջանի նկատմամբ տարածքային պահանջներ ունի:
Դե ինչ, ինչպես ասում են՝ վայելեք «խաղաղության դարաշրջանը»:
Ու Բաքվից այս շանտաժը հնչում է այն բանից հետո, երբ Փաշինյանի իշխանությունը վերջին մեկ շաբաթվա ընթացքում մի քանի անգամ հայտարարեց, թե շտապ պետք է խաղաղության համաձայնագիր կնքել Ադրբեջանի հետ:
Հիշեցնենք մարտի 28-ին Փաշինյանը Անվտանգության խորհրդի նիստ հրավիրեց ու հայտարարություն տարածեցին, որում մի կողմից, թեև արձանագրեցին, որ իրադրության վերլուծությունը ցույց է տալիս, որ Ադրբեջանը, փորձելով գտնել մտացածին հիմնավորումներ, հող է նախապատրաստում Լեռնային Ղարաբաղի ուղղությամբ նոր սադրանքներ և հարձակում սկսելու համար, այդ թվում՝ Հայաստանի Հանրապետությանը մեղադրելով խաղաղության պայմանագրի հարցում ապակառուցողական գործողությունների մեջ, մյուս կողմից նշեցին. «Անվտանգության խորհուրդը ստեղծված իրավիճակում հարկ է համարում ևս մեկ անգամ վերահաստատել Հայաստանի Հանրապետության ավելի վաղ հնչեցրած դիրքորոշումը և Ադրբեջանական Հանրապետությանն առաջարկում է անհապաղ բանակցություններ սկսել համապարփակ խաղաղության պայմանագրի շուրջ»:
Դուք անհապաղ խաղաղություն մուրացեք, ու համաձայնագիր ստորագրություն խնդրեք Ալիևից, իսկ նա ձեզ մեղադրի՝ «Ադրբեջանի նկատմամբ տարածքային պահանջներ ունենալու» մեջ:
Մետաքսյա Շալունց
Հետևեք մեզ Viber-ում
