Հայաստանի իշխանության իմպոտենտությունը և Ադրբեջանի երազած խաղաղությունը․ վտանգավոր զարգացումներ
Ադրբեջանցի հաքերները կոտրել են Արցախի Հանրապետության Ազգային ժողովի ֆեյսբուքյան էջը և այնտեղ տեղադրել են Ադրբեջանի դրոշը։
Հաքերները նաև գրություն են թողել, որում Ասկերանում ապրող բոլոր հայերին կոչ են անում «168 ժամվա ընթացքում լքել Ասկերանը»: Արցախի ԱԺ–ն անմիջապես հանդես է եկել հայտարարությամբ, որում ասվում է․ «Սիրելի հայրենակիցներ, մենք արդեն սովոր ենք մեր հարևանների կեղտոտ սադրանքներին, այնպես որ՝ այս քայլը ընդունեք որպես դրանցից հերթականը։ Բնականաբար, համապատասխան աշխատանքներ են տարվում էջը վերականգնելու համար»։
Ընդհանրապես, Արցախից եկող լուրերը խիստ մտահոգիչ են։ Վերջին օրերին ադրբեջանական կողմը շարունակում է խախտել հրադադարի պահպանման ռեժիմը Ասկերանի շրջանի Խրամորթ, Փառուխ և Խնապատ գյուղերի ուղղություններով՝ խաղաղ բնակչության նկատմամբ օգտագործելով ականանետեր և խոշոր տրամաչափի հրաձգային զենքեր։ Այս մասին հաղորդագրություն է տարածել Արցախի ներքին գործերի նախարարությունը: «Ակնհայտ է, որ խաղաղ բնակչությանը թիրախավորելու և ականանետով գյուղերն արկակոծելու հերթական փորձերը նպատակաուղղված են առաջնահերթորեն խուճապ առաջացնելու հասարակության շրջանում: ԱՀ ՆԳ նախարարությունը հետևում է իրադարձությունների զարգացմանը և պարբերաբար տեղեկատվություն կտրամադրի իրավիճակի մասին»,- նշել էր Արցախի ՆԳ նախարարությունը՝ հորդորելով բոլոր լրատվամիջոցներին հետևել միայն պաշտոնական տեղեկատվությանը:
Գրեթե ամեն օր հակառակորդը կրակում է՝ կիրառելով նաև ականանետեր։ Զուգահեռաբար կիրառվում է նաև հոգեբանական ճնշում․ թշնամու կողմից բարձրախոսով դիմում են արցախցիներին՝ պահանջելով լքել իրենց բնակավայրերը։ Ավելին՝ Թաղավարդի ուղղությամբ թշնամու կողմից հրահրված ռազմական սադրանքի ժամանակ թիրախավորվել է նաև տեղում ծառայություն իրականացնող ռուս խաղաղապահների հենակետը։
Այսինքն՝ Ադրբեջանը որոշել է լիովին օգտագործել ստեղծված հարմար պահը և ուզում է աշխարհաքաղաքական ներկա խառը զարգացումների ընթացքում լուծել Արցախի հայաթափման հարցը, որից էլ կածանացվի Արցախն ամբողջությամբ զավթելու Բաքվի վաղեմի երազանքը։ Արցախի շուրջ զարգացումները գնալով ավելի վտանգավոր են դառնում։ Ադրբեջանի սադրանքները կարող են ավելի վտանգավոր դառնալ՝ վերաճելով ռազմական գործողությունների։ Նման վտանգի մասին զգուշացրել է ԳՇ նախկին պետ, գեներալ-գնդապետ Մովսես Հակոբյանը։ «Մոտ ապագայում Հայաստանի Հանրապետության և Արցախի սահմաններին ռազմական գործողություններ են սպասվում։ Ուղղությունները լինելու են՝ Սյունիքում, Վարդենիսում, Տավուշում, չի բացառվում նաև՝ այլ ուղղությամբ»,- «Փաստինֆո»-ի հետ զրույցում նշել էր Մովսես Հակոբյանը։
Այս խիստ վտանգավոր զարգացումներին Հայաստանի իշխանությունն առայժմ արձագանքում է իմպոտենտության հասնող չեզոքությամբ։ Կառավարության վերջին նիստում Նիկոլ Փաշինյանը հայտարարեց, որ Արցախում մտահոգիչ զարգացումներ են սկսվել, սակայն ինքը չի ուզում գնահատականներ տալ։ Երևի չի ուզում կիրթ գործընկերոջն ու նոր մեծ եղբորը նեղացնել։ Իսկ Հայաստանի նախագահի պաշտոնը ստանձնած տխրահռչակ Վահագն Խաչատուրյանը, որին սահմանադրությամբ վերապահված է պետության գլխի կարգավիճակ, հայտարարեց, որ իրենք խաղաղություն են ուզում՝ անկախ այն հանգամանքից, որ ադրբեջանական կողմը կրակում է։ Փաստորեն կարևորը խաղաղությունն է, եթե անգամ դրա համար պահանջվի հայաթափել Արցախն ու Հայաստանը։ Կարելլի է չկասկածել, որ Նիկոլ Փաշինյանն ու Վահագն Խաչատուրյանը պատրաստ են այդպիսի խաղաղության։
Հայկ Դավթյան
Հետևեք մեզ Viber-ում
