Հերթը հասավ «Պուտինի օլիգարխներին» ու նրանց ընտանիքներին

Ըստ Պուտինի՝ «ռազմական հատուկ գործողությունն ընթանում է ըստ պլանի»

Երեկ ելույթ ունենալով Անվտանգության խորհրդի նիստում՝ Ռուսաստանի նախագահ Վլադիմիր Պուտինը կրկին ասաց, թե ռուսներն ու ուկրաինացիները նույն ժողովուրդն են:

Պուտինը պնդել է, որ «ռազմական հատուկ գործողությունն» ընթանում է ըստ պլանի և գրաֆիկի, դրված բոլոր առաջադրանքները հաջողությամբ կատարվում են:

Ուկրաինան և Ռուսաստանը պայմանավորվեցին հումանիտար միջանցքներ ստեղծել
Միաժամանակ ուշ երեկոյան հայտնի դարձավ, որ Ուկրաինան և Ռուսաստանը պայմանավորվել են հումանիտար միջանցքներ ստեղծել՝ խաղաղ բնակիչներին տարհանելու համար․ համաձայնությունը ձեռք է բերվել այսօր կողմերի միջև տեղի ունեցած բանակցությունների արդյունքում։ «Ցավոք, Ուկրաինան դեռ չունի այն արդյունքները, որոնք անհրաժեշտ են: Որոշումներ կան միայն հումանիտար միջանցքների վերաբերյալ»,- ասել է Ուկրաինայի նախագահի խորհրդական Միխայլո Պոդոլյակը, հավելելով՝ երբ այդ միջանցքները ստեղծվեն, կողմերը մարդկանց տեղահանության ընթացքում հրադադար կպահպանեն։

Ռուս պատվիրակները ևս հաստատել են, որ համաձայնել են ելքեր ստեղծել խաղաղ բնակիչների համար։ Գլխավոր բանագնաց, մշակույթի նախկին նախարար Վլադիմիր Մեդինսկին հորդորել է քաղաքացիական անձանց օգտվել մարդասիրական այդ միջանցքներից, «եթե ռազմական գործողությունները շարունակվեն»։ Սա կողմերի միջև ձեռք բերված առաջին համաձայնությունն է Ուկրաինայի դեմ Ռուսաստանի՝ ութերորդ օրը շարունակվող պատերազմի ընթացքում։ Մինչ այդ Ուկրաինայի և Ռուսաստանի պատվիրակները ևս մեկ հանդիպում էին անցկացրել, որն ավարտվել էր անարդյունք։

ԱՄՆ-ն ու ԵՄ-ը կթիրախավորեն «Պուտինի օլիգարխներին»

Իսկ արեւմուտքի դաժան պատժամիջոցները շարունակվում են: Միացյալ Նահանգներն ու Եվրամիությունը հայտարարել են, թե թիրախավորելու են Ռուսաստանի նախագահ Վլադիմիր Պուտինի օրոք հարստություն և քաղաքական ազդեցություն դիզած օլիգարխներին, ըստ «Ազատության», հայտնում է Reuters-ը։ «Երկրները համատեղում են ջանքերը, որպեսզի ուսումնասիրեն, թե օլիգարխները ինչպես կարող են շրջանցել պատժամիջոցները, ինչպես նաև նպատակ կա սահմանափակել տրաստային ընկերությունների դերը՝ ակտիվների պահպանման գործում», - լրատվական գործակալությանը փոխանցել է Եվրամիության պաշտոնյան, ով չի ցանկացել հրապարակել իր անունը։ Միևնույն ժամանակ, Միացյալ Նահանգները նոր պատժամիջոցներ է սահմանել ռուսաստանցի 19 օլիգարխների և նրանց ընտանիքների 47 անդամների նկատմամբ։

Գերմանիայում կալանքի տակ է վերցվել ռուսաստանցի միլիարդատիրոջ զբոսանավը

Նախօրեին էլ հայտնի դարձավ, որ Գերմանիայի իշխանությունները Համբուրգում կալանքի տակ են վերցրել պատժամիջոցների տակ ընկած ռուսաստանցի միլիարդատեր Ալիշեր Ուսմանովի զբոսանավը։ Այս մասին հաղորդում է Forbes-ը՝ վկայակոչելով զբոսանավային բիզնեսի երեք տարբեր աղբյուրներ։ 156 մետր երկարությամբ «Դիլբար» շքեղ զբոսանավը գնահատվում է 600 միլիոն դոլար։ Անցած հոկտեմբերից այն վերանորոգվում էր Համբուրգի նավաշինական ձեռնարկությունում։ Ուսմանովի ներկայացուցիչներից դեռ մեկնաբանություն չկա։

Եվրամիության սանկցիաների նոր ցանկում միլիարդատերեր՝ Վլադիմիր Պուտինի շրջապատից և նրա մամլո խոսնակը

Հիշեցենենք, որ օրեր առաջ հայտնի դարձավ, որ Եվրամիությունը կազմել է պատժամիջոցների նոր ցուցակ, որում ընդգրկվել են «Ռոսնեֆտի» ղեկավար Իգոր Սեչինը, «Տրանսնեֆտի» ղեկավար Նիկոլայ Տոկարևը, «Պրոմսվյազբանկի» ղեկավար Պյոտր Ֆրադկովը: Միլիարդատերերից այդ ցուցակում են ներառվել Ալեքսեյ Մորդաշովը, Միխայիլ Ֆրիդմանը, Ալիշեր Ուսմանովը, Պյոտր Ավենը, թավջութակահար-գործարար Սերգեյ Ռոլդուգինը և ուրիշներ:

Պաշտոնատար գործիչներից սանկցիաների ցուցակում են փոխվարչապետ Դմիտրի Չերնիշենկոն, շինարարության և տրանսպորտի նախարարներ Իրեկ Ֆայզուլինը և Վիտալի Սավելևը, «Եդինայա Ռոսիա» կուսակցության գլխավոր խորհրդի քարտուղար, Դաշնային խորհրդի փոխնախագահ Անդրեյ Տուրչակը: Բացի այդ, սանկցիաներ են սահմանվել Կրեմլի խոսնակ Դմիտրի Պեսկովի և մի շարք լրագրողների նկատմամբ, նրանց թվում են Տիգրան Քեոսայանը, Անտոն Կրասովսկին, Արկադի Մամոնտովը, Օլգա Սկաբեևան, Ռոման Բաբայանը, պատմաբան, հրապարակախոս Մոդեստ Կոլերովը և գրող, «Սպրավեդլիվայա Ռոսիա» - «Զա պրավդու» կուսակցության համանախագահ Զախար Պրիլեպինը:

Մետաքսյա Շալունց