Կոմպրոմատներ մեր սեղանից ձեր սեղանին

Ազգային ժողովն արտահերթ նիստում ընդունեց Կառավարության կառուցվածքում փոփոխություններ կատարելու հարցը, որով Տարածքային կառավարման և արտակարգ իրավիճակների նախարարությունները տարանջատվելու են:Կողմ քվեարկեց 68, դեմ՝ 20, ձեռնպահ՝ 1 պատգամավոր: Նախքան քվեարկությունը ՀԱԿ և ԲՀԿ խմբակցությունները հայտարարել էին, որ իրենք դեմ են քվեարկելու, իսկ ՕԵԿ-ը բոյկոտել է նիստը:Հիշեցնենք, որ տարածքային կառավարման նախարարության պորտֆելը տրվելու է ՀՅԴ-ին, իսկ նախագծի քննարկումն անցավ բավական թեժ մթնոլորտում ուզավեշտալի մթնոլորտում, ընդդիմադիր պատգամավորները թուք ու մուր չխնայեցին իշխանության որոշման առիթով եւ հեգնանք՝ ՀՅԴ-ին ուղղված: «Հասկացանք քաղաքական գործարք է, ի՞նչն էր խանգարում ամբողջ նախարարությունը տալ Դաշնակցությանը», - քննարկման ժամանակ նման հարցով արդարադատության նախարար Արփինե Հովհաննիսյանին դիմեց ԱԺ ՀԱԿ խմբակցության ղեկավար Լևոն Զուրաբյանը: «Քաղաքական պայմանավորվածություններն են այդպիսին եղել և որոշվել է համագործակցել` քաղաքական համագործակցության նպատակահարմարությունից ելնելով, հաշվի առնելով գործընկեր քաղաքական ուժի ռեսուրսը ու նրանց պատկերացումները» պատասխանեց նախարարը:Անդրադառնալով Զուրաբյանի դիտարկմանը, թե ՀՀԿ-ն կարող էր որոշումները կայացնել բացարձակ մեծամասնություն ունենալով, Հովհաննիսյանն ասաց, որ իրենք համագործակցությունը շատ ավելի լայն են պատկերացնում: «Քաղաքական համագործակցության մասին որոշումը կայացվում է` ելնելով ունեցած զարգացման տեսլականից ու դրան համահունչ որոշակի ձևաչափից»,-հավելեց Հովհաննիսյանը: «Դուք գիտե՞ք`, թե հենց նոր ինչ ասացիք, ասացիք, որ այդ ամբողջ նախարարությունը Դաշնակցությանը տալը շատ կլիներ: Այո, դուք հենց նոր դա ասացիք», -արձագանքեց Զուրաբյանը ու շնորհակալություն հայտնեց նախարարին անկեղծության համար: Հովհաննիսյանը անպատասխան չթողեց ու հստակեցրեց. «Դուք միշտ հասկանում եք այն, ինչ ձեռնտու է ձեզ», բարձրախոսի մոտ ելույթից հետո Արփինե Հովհաննիսյանի նյարդերը տեղի տվեցին. «Ա~յ, մամա ջան» քթի տակ ասված նրա խոսքերը լսելի դարձան: «Այս նախագծի առավելությունը այն է, որ հնարավորություն է տրվում ոչ միայն նախարար նշանակել Դավիթ Լոքյանին, այլ նաև նախարարի պաշտոնից չհանել գործող նախարար Արմեն Երիցյանին» փոխարենը հեգնեց Նիկոլ փաշինյանը: Շարունակելով ելույթը նույն ոճով, Փաշինյանը հայտարարեց, որ մտահոգիչ է նաև այն, որ Դաշնակցությանը տրվելիք երկու նախարարությունների` Կրթության, գիտության և Էկոնոմիկայի նախարարներ Արմեն Աշոտյանն ու Կարեն Ճշմարիտյանը ազատվելու են պաշտոններից: Ըստ պատգամավորի, կարելի է ուղղակի նախարարությունները կիսել և բոլորին պաշտոն կհասնի:«Սա թույլ տվեք ասել, որ անթույլատրելի անարդարություն է և ոչ կառուցողական մոտեցում: Ինչու գնալ նման ոչ կառուցողական ճանապարհով, երբ մենք ունենք նախարարությունները միացնելու և դրանից հետո հանուն բազմամյա նպատակների դրանք կիսելու գեղեցիկ ավանդույթ: Կարելի է, օրինակ, կրթության և գիտության նախարարությունները կիսել ու դարձնել կրթության նախարարություն, լուսավորության նախարարություն. Աշոտյանին նշանակել լուսավորության նախարար, իսկ Լևոն Մկրտչյանին` կրթության նախարար», -հայտարարեց Փաշինյանը: Նա հիշեց նաև նույն համագործակցության շրջանակներում մարզերի կառավարման բաշխումը և նույն մեթոդը առաջարկեց նաև մարզերի դեպքում` դրանց անունները կիսելով: «Այո, կարելի է կիսել նաև մարզերը: Կարելի է, չէ՞: Թող լինի առանձին Արագածի մարզ և առանձին Ոտնի մարզ, թող լինի առանձին Գեղարի մարզ և առանձին Ունիքի մարզ, իսկ թե կիսված մարզերի որ մասում հանրապետական մարզպետ կնշանակվի, որում դաշնակցական, դա արդեն կարծում եմ, սուգուբը ՀՅԴ-ՀՀԿ ներկուսակցական հարաբերությունների հարց է», -հավելեց պատգամավորը՝ ծիծաղ մտցնելով դահլիճում: «Ժառանգության» պատգամավոր Զարուհի Փոստանջյանը ՀՀԿ-ՀՅԴ համագործակցության արդյունքում առաջացած այս իրավիճակը համեմատեց ամուսնության հետ.«Հարս եթե բերում եք, պարզ է, որ գումարներ պետք է ծախսվեն, բայց դա մեր հարկատուների հաշվին է, մեր հաշվին է տեղի ունենում այս կեղծ ամուսնությունները: Ես դեմ եմ քվեարկելու, կոչ եմ անում բոլորին դեմ քվեարկել՝ ցույց տալով, որ մեր՝ հարկատուներիս գումարները իրենց քաղաքական ամուսնությունների համար չենք պատրաստվում վատնել»: «Ես ի սկզբանե չէի ցանկանա, որ այս նախագիծը ներկայացներ Արփինե Հովհաննիսյանը, բայց ես հիմա հասկանում եմ, թե ինչու է նա ներկայացնում, որովհետև նման պրոֆեսիոնալ կերպով հիմնավորել անհիմնավորելին, թերևս, այս կառավարությունում կարող էր միայն տիկին Հովհաննիսյանը» իր ընկերուհուն պատգամավորների հարցեից անհարմար վիճակից փորձեց հանել ԲՀԿ խմբակցության ղեկավար Նաիրա Զոհրաբյանն՝ անդրադառնալով Տարածքային կառավարման և արտակարգ իրավիճակների նախարարությունն անջատելու փաստին: Նա ընթերցեց, թե ինչպես էր երկու նախարարությունների միավորումը հիմնավորում Արդարադատության նախկին նախարար Հովհաննես Մանուկյանը: Այդ հինավորման մեջ, մասնավորապես, խոսվում է, որ նախարարությունների միավորման նպատակն է ապահովել էլ ավելի արդյունավետ կառավարման համակարգ, ինչպես նաև երկու նախարարությունների միաձուլումը կնպաստի բյուջեի առավել խնյողաբար օգտագործելուն: Պատգամավորն ընդգծեց, որ ըստ էության` չի հերքվում, որ այո, նախարարությունների միաձուլումն արդյունավետ է եղել, բայց այսօր նման որոշում է կայացվում` մեզ այդպես է պետք տեսակետից ելնելով: «ԲՀԿ-ն դեմ է քաղաքական այս առևտրին ինչ-որ կերպ իր մասնակցությունը բերել: Մենք ՀՀԿ-ին և ՀՅԴ-ի ի սրտե ցանկանում ենք, որ այդ համագործակցությունը հաջողվի հանուն Հայաստանի Հանրապետության, ցանկանում ենք, որ համագործակցության արդյունքում հնարավոր լինի լուծել երկրի առաջ ծառացած խնդիրները: ԲՀԿ-ն քվեարկելու է դեմ»,- եզրափակեց Նաիրա Զոհրաբյանը: Իսկ ՀՀԿ խմբակցության ղեկավար Վահրամ Բաղդասարյանը իր ելույթում բոլորին տեղը դրեց, հիշեցրեց բոյկոտող ՕԵԿ-ին, որ ԱԻՆ-ը 2008-ի կոալիցիայի շրջանակներում հենց իրենց համար ստեղծվեց, մյուսների մասով էլ նետեց.«Աղվեսի դունչը խաղողին չի հասնում, ասում են՝ թթու է»: ՀԱԿ-ի մասին էլ ակնարկեց, թե գործարքի իրենք են գնացել ժամանակին, դրա համար էլ մեկ օրում փկուզվեցին, թերեւս նկատի ուներ Ծառուկյանի հետ համագործակցությունը: Անի Սահակյան