Ռուսները Խզմալյանի 10 հոգանոց ցույցը Երևանում նկատում են, թուրքական Բայրաքթարները Ուկրաինայում՝ ոչ

«Մենք գնահատում ենք ԵՄ ջանքերը Ուկրաինայի անդամակցության համատեքստում։ Սա հրաշալի իրադարձություն է։ Բայց նույնպիսի զգայունություն ցուցաբերեք նաև Թուրքիայի նկատմամբ։ Ինչո՞ւ եք դեռ կասկածում մեզ հետ կապված։ Թե՞ պետք է մեզ վրա հարձակում կատարվի, որպեսզի ԵՄ-ին անդամակցությունը հայտնվի ձեր օրակարգում», երեկ հերթական անգամ դժգոհել է Թուրքիայի նախագահ Էրդողանը, հիշեցնելով, որ տարիներ շարունակ ԵՄ-ն հապաղել և ձգձգել է հանրապետության անդամակցության գործընթացը։

Թուրքիայի նախագահը նշել է, որ ԵՄ շատ երկրներ նաև Թուրքիայի՝ ՆԱՏՕ-ի գծով դաշնակիցներն են, սակայն ռազմարդյունաբերական համալիրի գծով Թուրքիայի հետ համագործակցության ոլորտում «նրանք իրենց անկեղծ չեն պահում, նրանք միայն խոսում են»:

Անկարայում կայացած մամուլի ասուլիսում Եվրամիությանն անդամակցելու Ուկրաինայի հայտի մասին հարցին Էրդողանը պատասխանել է, որ Թուրքիան, որը տասնամյակներ շարունակ ԵՄ անդամակցության թեկնածու է, կաջակցի ՆԱՏՕ-ի և ԵՄ-ի ցանկացած ընդլայնմանը:

Հստակ կանգնելով ի աջակցություն Ուկրաինայի՝ պաշտոնական Անկարան բոլոր իր քայլերով հստակ գիծ է քաշել: Էրդողանը շարունակում է զինել Ուկրաինային «Բայրաքթարներով», և Թուրքիան արգելել է ռուսական ռազմանավերին հատել նեղուցները:

Թուրքիան զգուշացրել է բոլոր երկրներին Բոսֆորի և Դարդանելի նեղուցներով ռազմանավերի անցնելու անթույլատրելիության մասին, նախօրեին հայտարարել է ԱԳ նախարար Մևլութ Չավուշօղլուն, փոխանցում է Anadolu-ն։ «Թուրքիան զգուշացրել է ափամերձ և ոչ ափամերձ բոլոր երկրներին նեղուցներով ռազմանավերի անցնելու անթույլատրելիության մասին»,- ասել է նա։ Նրա խոսքով՝ Ուկրաինայում Ռուսաստանի գործողության սկզբից նեղուցներով ռազմական նավերի անցնելու հայտեր չեն եղել։ Դիվանագետն ընդգծել է, որ Անկարան կշարունակի խստորեն հետևել Մոնտրյոյի կոնվենցիայի դրույթներին։ «Մինչ այսօր ռուսները հարցնում էին, թե անհրաժեշտության դեպքում կիրականացնե՞նք մենք Մոնտրյոն։ Մենք նրանց ասում էինք, որ խստորեն հետևելու ենք պայմանավորվածությանը»,- ասել է նա։

Երեկ տեղեկատվություն տարածվեց այն մասին, որ Թուրքիան փետրվարի 27-28-ին 3 ռուսական ռազմանավերի արգելել է հատել նեղուցները։

Սա դեռ ամենը չէ: Մեծ Բրիտանիայում Ուկրաինայի դեսպան Վադիմ Պրիստայկոն՝ պատասխանելով բրիտանական լրատվամիջոցների հարցերին արձանագրել է, որ Ուկրաինան շտապ կգնի էլ ավելի շատ «Բայրաքթարներ»։ Նրա խոսքով՝ Ուկրաինայի իշխանություններն արդեն կապի մեջ են Թուրքիայի հետ՝ կապված հարվածային ԱԹՍ-ների հավելյալ մատակարարումների հետ։

Նա հավելել է, որ Ուկրաինայում անօդաչու թռչող սարքերի բավարար թվով օպերատորներ կան, և այժմ նրանք վերապատրաստվում են Թուրքիայում։
Իսկ ահա Թուրքիայի ՆԳ նախարար Սուլեյման Սոյլուն խոսել է Ուկրաինայում թուրքական ԱԹՍ–ների հաջողության մասին։ Թուրքական Cumhuriyet–ի փոխանցմամբ՝ Թուրքիայի ՆԳ նախարար Սուլեյման Սոյլուն, Անթալիայիում մի միջոցառման ժամանակ հայտարարել է, թե Թուրքիայի «Բայրաքթարները» Ուկրաինայում եղանակ են փոխում։ «Այսօր մեր ԱԹՍ–ները աշխարհում ուժային հավասարակշռություններն են փոխում»,–ասել է նա։

Թուրքական ԱԹՍ-ային աջակցության վերջակետը դրել է Ուկրաինայի պաշտպանության նախարար Ալեքսեյ Ռեզնիկովը, ով հայտնել է, որ Թուրքիայից Ուկրաինա է ժամանել Bayraktar TB2 հարվածային անօդաչուների նոր խմբաքանակը և դրանք արդեն պատրաստ են մարտական օգտագործման։

Ահա Էրդողանի երկերեսանի քաղաքականությունը «բարեկամ Ռուսաստանի» ու «իր ընկեր Պուտինի» նկատմամբ: Պաշտոնական Մոսկվան, սակայն լուռ է...

Կրեմլի խոսնակ Պեսկովն ու ԱԳՆ ներկայացուցիչ Զախարովան նման «տրամաչափի» փաստերով չեն զբաղվում: Լուռ է նաև ռուսական քարոզչամեքենան: Իսկ այն «մեդիագիգանտները», որոնք Երևանում Ռուսաստանի դեսպանատան առջև Տիգրան Խզմալյանի կազմակերպած 10 հոգանոց բողոքի ցույցի լուսանկարները պտտում են ռուսական տելեգրամյան ալիքներում, քննարկում իրենց թոք-շոուների ընթացքում ու ստորացում Հայաստան պետությունը՝ այսօր չեն նկատում, թե ինչպես է Թուրքիան զինում Ուկրաինային՝ «Բայրաքթարներով» ու չեն տեսնում թուրքական պետական TRT- լրատվականի տեսահոլովակները, որոնցում ցույց են տալիս, թե ինչպես են թուրքական «Բայրաքթարները» ոչնչացնում Ռուսաստանի ԶՈՒ-երին պատկանող զինտեխնիկան:

Մետաքսյա Շալունց