Նախարարը՝ դպրոցներում Սերժ Սարգսյանի նկարի մասին
ՀՀ կրթության և գիտության նախարար Լևոն Մկրտչյանը դպրոցներում ՀՀ նախագահ Սերժ Սարգսյանի լուսանկարը փակցնելուն և դրա համար 15 միլիոն դրամ հատկացնելուն անդրադառնալով ասաց, որ ՀՀ նախագահի նկարը միշտ փակցվել է՝ անկախ նրանից, թե ով է եղել ՀՀ նախագահը: «Դպրոցներում փակցնում են ՀՀ սիմվոլները: Ես խոսում եմ ՀՀ խորհրդանիշների մասին և ՀՀ նախագահը խորհրանիշների համակարգում է: Աշխարհի բոլոր երկրներում այդ սկզբունքը կիրառվում է», - ասաց նա։ «Նկարի համար հատկացվող գներից տեղյակ չեմ:Ես չեմ կարծում, որ բյուջեում հատուկ գումար կա, որ տրամադրվում է դրա համար», - հավելեց նա: Անդրադառնալով դպրոցներում տնօրենների և աշխատողների բարեկամական կապին՝ կրթության և գիտության նախարարն ասաց, որ այդ առնչությամբ ընդունված է կառավարության կարգ: «Խոսքը չի վերաբերում գյուղական դպրոցին, որտեղ տնօրենի աղջիկը ուսուցչուհի է, այլ խոսքը վերաբերում է ադմինիստրատիվ համակարգին և ուղղակի ենթակայությանը: Այսինքն, եթե դպրոցի տնօրեն է, իր ուղիղ ենթակայության վարչական աշխատանքի մեջ չպետք է բարեկամներ լինեն` այգեպանից, վարորդից սկսած մինչև տեղակալներ», - ասաց նա:
Հետևեք մեզ Viber-ում
