Այդ մարդը ստում է. Քոչարյանը՝ Փաշինյանի հայտարարության մասին (video)

Մի մարդ, որը դեռ ոչ մի ճիշտ խոսք ասած չկա, արել է հայտարարություն և որևէ մեկը չի փորձել կարդալ այդ փաստաթուղթը՝ հասկանալու համար, թե այս մարդը հերթական անգամ ստում է, թե գոնե մեկ անգամ իր ամբողջ կյանքում ճշմարտություն է ասում։ Այս մասին հրավիրված մամուլի ասուլիսին ասաց ՀՀ երկրորդ նախագահ Ռոբերտ Քոչարյանը՝ անդրադառնալով Փաշինյանի այն հայտարարությանը, թե Հայաստանը ճանաչել է Ադրբեջանի տարածքային ամբողջականությունը։

«Ստամբուլյան փաստաթուղթը որեւէ մեկը կարդացե՞լ է, թե՝ ոչ։ Իսկապես, սա թեմա է, որը Հայաստանում քննարկվում է ավելի քան երկու ամիս։ Մի մարդ, որը դեռ մեկ ճիշտ խոսք ասած չկա, արել է հայտարարություն, եւ ոչ մեկը չի փորձել կարդալ այդ փաստաթուղթը հասկանալու համար՝ այս մարդը հերթական անգամ ստում է, թե՝ գոնե մեկ անգամ իր ամբողջ կյանքում ճշտմարտությունն է ասել»,- նշեց Ռոբերտ Քոչարյանը։

«Ես այդ փաստաթուղթը ստորագրողն եմ եղել։ Այդ մարդը ստում է։ Ստամբուլյան փաստաթուղթը մեր դիվանագիտական ամենալուրջ հաղթանակներից մեկն է եղել այդ տարիների ընթացքում։ Ես ուղղակի բոլոր այն մարդկանց, որոնք հետաքրքրվում են քաղաքականությամբ և ընդհանրապես ԼՂ հարցի կարգավորմամբ, կառաջարկեի կարդալ այդ փաստաթղթի առաջին 48 էջը, որտեղ անդրադարձ կա բոլոր հետխորհրդային կոնֆլիկտների վերաբերյալ »,- նշեց Ռոբերտ Քոչարյանը՝ հավելելով, թե ինչ աստիճանի էր հասել մեր դիվանագիտությունը, բանակցային գործընթացը, որ Լիսաբոնից հետո, որտեղ Ադրբեջանի տարածքային ամբողջականությունը շեշտվում էր և Տեր-Պետրոսյանն այդ ժամանակ իր վետոյի իրավունքն օգտագործեց, հենց Ստամբուլում մենք ստացանք այն փաստաթուղթը, որտեղ, ի տարբերություն մյուս կոնֆլիկտների, նման բան չկար նշված:

Նշենք, որ Ստամբուլյան խարտիան ընդունվել է 1999 թվականի նոյեմբերի 9-ին ԵԱՀԿ Ստամբուլում տեղի ունեցած գագաթաժողովում: