Ֆլեշի Բարսեղը ընդլայնում է իր ազդեցությունը

Վարչապետ Կարեն Կարապետյանն այսօր որոշում է կայացրել Վահրամ Մկրտչյանին նշանակել ՀՀ կրթության եւ գիտության փոխնախարար: ԿԳ դեռեւս գործող փոխնախարար Կարինե Հարությունյանը տեղափոխվելու է Երեւանի Բրյուսովի անվան համալսարան` ռեկտորի կարգավիճակով:Իսկ Վահրամ Մկրտչյանը թեեւ ՀՀԿ համամասնական ցուցակում էր, սակայն հերթը չհասավ նրան եւ չանցավ Ազգային ժողով։ՀՀԿ խմբակցության նախկին պատգամավոր Վահրամ Մկրտչյանը խորհրդարանում հայտնի էր որպես Ֆլեշի Բարսեղի հովանավորյալ, Բարսեղ Բեգլարյանը «Ֆլեշ» ընկերության սեփականատերն է։ Սակայն մինչ այդ նա ճամբարափոխ կարերիստի համբավ ուներ։ Մկրտչյանը ժամանակին ղեկավարում էր ՀԺԱՄ կուսակցությունը, շատերն են հիշում Մկրտչյանի սուր քննադատությունները առ Սերժ Սարգսյան, նա հայտարարում էր, որ «աղոթում են նրա մեղքերի համար»։ Տարիներ հետո, երբ Մկրտչյանը դարձավ ՀՀԿ-ական, ապա՝ պատգամավոր, նույն էնտուզիազմով Սերժ Սարգսյանի գովքն էր անում։ Իսկ դրանից առաջ էլ նա ԱԺՄ-ի անդամ էր։ Մկրտչյանը 2014-ին հայտնվել էր դատարանում՝ տարադրամի ու փոխանակման կետերի համատեղ բիզնեսում գործընկերոջ հետ ունեցած տարաձայնությունների պատճառով նրան առևանգելու ու ծեծելու համար։Հրապարակումների համաձայն տուժողը պետական տնտեսագիտական համալսարանի դասախոս, գիտությունների թեկնածու Արտակ Ղուկասյանն էր: Մկրտչյանը հերքել է իր մասնակցությունն այդ դեպքին, իսկ Ղուկասյանի հարազատները` կրկին պնդել:Ըստ նախկինում հրապարակված հայտարարագրերի՝ նորանշանակ փոխնախարարը բավականին մեծ ունեցվածքի տեր է։ Դեռ 2014-ին, ըստ հայտարարագրի, նրա դրամական միջոցները կազմում էին 100 մլն դրամ, 180 հազար դոլար և 30 հազար եվրո: Նա 28 մլն դրամով բազմաբնակարան շենքի ոչ բնակելի տարածք էր վաճառել, ինչպես նաև նոր ավտոմեքենա գնել: Ստացվում է, որ նախկին վարչապետ Տիգրան Սարգսյանի հետ նախկինում անասելի ջերմ հարաբերություններ ունեցող Բարսեղ Բեգլարյանը ոչ միայն  ջերմ կապեր է հաստատում բոլոր վարչապետերի հետ, այլեւ ընդլայնում իր ազդեցությունը Կրթության եւ գիտության ոլորտում։ Գաղտնիք չէ, որ ԿԳ փոխնախարար Մանուկ Մկրտչյանը Բեգլարյանի հարազատն է, բոլորը գիտեն, թե ինչ առանցքային գործառույթ ունի Մկրտչյանը կրթական ոլորտում եւ իր ազդեցությունն ունի հատկապես ընդունելությունների յուղոտ գործընթացի ժամանակ։ Վահրամ Մկրտչյանը ««Բարեպաշտ սերունդ» հիմնադրամի ղեկավարն է նաեւ, այն կազմավորվել է 2006թ.՝ գործարար Բարսեղ Բեգլարյանի եւ Մանուկ Մկրտչյանի մտահղացմամբ՝ նպատակ ունենալով ստեղծել այնպիսի կազմակերպություն, որը կնպաստի «հայության հարատեւմանը»: Ըստ նորանշանակ փոխնախարարի կենսագրական տվյալների, ֆիզիկամաթեմատիկական գիտությունների թեկնածու է, 42 գիտական աշխատությունների եւ հոդվածների հեղինակ: Անի Սահակյան