44-օրյա պատերազմի քննիչ հանձնաժողովի 1-ին նիստը սկսվեց լարված. ընդդիմությունը լքեց դահլիճը (video)

Մեկնարկել է 44-օրյա պատերազմի հանգամանքներն ուսումնասիրող ՀՀ ԱԺ քննիչ հանձնաժողովի առաջին նիստը։

«Պատիվ ունեմ» խմբակցության պատգամավոր Տիգրան Աբրահամյանը հայտարարեց, թե ընդդիմությունը չի մասնակցի հանձնաժողովի աշխատանքներին, քանի որ իշխանությունը մի կողմից հայտարարում է, որ պատերազմի հետևանքով ստեղծված իրավիճակի պատասխանատուն ինքն է ու այս պայմաններում իշխանության գլխավորությամբ հանձնաժողվի աշխատանքների իրականացումը չի կարող լինել օբյեկտիվ։

«44-օրյա պատերազմի հանգամանքների բացահայտումը շարունակում է մնալ մեր առաջնահերթություններից մեկը, բայց մենք համարում ենք, որ դրա աշխատանքները պետք է իրականացվեն այն ժամանակ, երբ այս իշխանությունը չի լինի իշխանության», - ասաց նա։

«Հայաստան» խմբակցության պատգամավոր Գեղամ Նազարյանն էլ հայտարարեց, թե իրենք նույնպես չեն մասնակցի հանձնաժողովի աշխատանքներին։

«Իմ հիմնական նապատակներից մեկն այս պատերազմի հանգամանքերը բացահայտելն է, բայց խնդիրն այն է, որ այն քաղաքական ուժը, որը պատերազմի ժամանակ ղեկավարել է երկիրը, այս ուժի ղեկավարությամբ հանձնաժողովը կաշկանդված է ամբողջ ճշմարտությունը բացահայտել», - նշեց նա։

«Հայաստան» խմբակցության պատգամավոր Գեղամ Մանուկյանն էլ նշեց, թե օբյեկտիվ քննություն հնարավոր է, երբ քննիչ հանձնաժողովի մեծամասնությունը չի պատկանում այն քաղաքական ուժին, որի իշխանության օրոք սանձազերծվել է պատերազմ։

Ընդդիմադիր պատգամավորները լքեցին դահլիճը։