Հայաստանի և Ադրբեջանի միջև սահման չկա. «պասերով» ՀԱՊԿ-ից՝ Բաքվին
ՀԱՊԿ գլխավոր քարտուղար Ստանիսլավ Զասն այսօր հայտարարել է, որ Հայաստանի և Ադրբեջանի միջև սահման, ըստ էության, չկա, և հույս է հայտնել, որ պատերազմի դարաշրջանն ավարտվում է: Հայ-ադրբեջանական հարաբերությունների հեռանկարների մասին Զասը խոսել է «Վալդայ» ակումբի կազմակերպած «Հավաքական անվտանգությունը նոր դարաշրջանում. ՀԱՊԿ փորձը և հեռանկարները» համաժողովում:
«Անկասկած, լարվածության օջախներ կան, և այդպիսիք կան նաև հայ-ադրբեջանական սահմանին: Ես այնտեղ եղել եմ, տեսել եմ սեփական աչքերով, թե ինչ է այնտեղ կատարվում: Բայց ըստ էության, այնտեղ սահման՝ որպես այդպիսին, չկա, կա շփման գիծ, կան հենակետեր, դիտակետեր: Պարբերաբար լինում է փոխհրաձգություն: Այդպես չպետք է լինի»,- ասել է նա և հավելել.- Կա զգուշավոր լավատեսություն , որ ավարտվում է պատերազմի մի ողջ դարաշրջան, և սկսվում է նոր դարաշրջան: Ես կարող եմ սխալվել այդպիսի լավատեսությամբ, բայց այնուամենայնիվ, պետք է ողջունել այն քայլերը, որոնք այժմ արվում են խաղաղության հաստատման ուղղությամբ»:
Փաստորեն, ՀԱՊԿ-ի «կուրությունը» շարունակվում է...
Օրինակ, ՀԱՊԿ-ական պետությունները չեն տեսնում, որ Ադրբեջանն ու Թուրքիան շարունակում են ռազմական համագործակցությունը, որ Անկարան շարունակում է զինել Ադրբեջանին:
Բառացիորեն այսօր Ադրբեջանի պաշտպանության նախարար Զաքիր Հասանովը հայտարարել է, որ շարունակելու են նոր սպառազինություն ձեռք բերել: Ելույթ ունենալով անձնակազմի առջև՝ Հասանովն ասել է, որ ադրբեջանական բանակի բարեփոխումների շրջանակում կշարունակվի ժամանակակից սպառազինության, ռազմատեխնիկայի և սարքավորումների ձեռքբերման գործընթացը:
Չեն տեսնում նաև, որ Ադրբեջանը շարունակում է շանտաժի ենթարկել Հայաստանին՝ կրկին սպառնալով պատերազմով: Չեն նկատում, որ արդեն 8-9 ամիս ադրբեջանական ստորաբաժանումները գտնվում են Հայաստանի տարածքում:
Այս ամենով հանդերձ՝ «նոր դարաշրջանի» մասին են խոսում ՀԱՊԿ-ից, ու մշտապես նույն «փորացավը» տեսնում՝ «ախր, սահման չկա, դե ուրեմն, արագ դելիմիտացիա, դեմարկացիա արեք, արագացրեք...»
ՀԱՊԿ-ից նետված «գնդակն» անմիջապես բռնել են Բաքվում...
Բաքուն պատրաստ է սկսել Հայաստանի հետ սահմանի դելիմիտացիան ու դեմարկացիան՝ առանց նախապայմանների, Մոլդովայի ԱԳ նախարարի մասնակցությամբ ճեպազրույցի ժամանակ հայտարարել է Ադրբեջանի արտգործնախարար Ջեյհուն Բայրամովը։ «Ադրբեջանը պատրաստ է դելիմիտացիայի ու դեմարկացիայի հարցերով հանձնաժողովի աշխատանքին՝ առանց որևէ նախապայմանի, բայց Հայաստանը փորձում է պայմաններ առաջ քաշել հանձնաժողովի աշխատանքն սկսելու համար», - ասել է Բայրամովը։
Փաստորեն, ՀԱՊԿ-ն ու պաշտոնական Բաքուն «պասերով» Հայաստանին ճնշում են՝ արագացնելու դելիմիտացիայի ու դեմարկացիայի գործընթացը:
Մետաքսյա Շալունց
Հետևեք մեզ Viber-ում
