Արարատ Միրզոյանի պատասխանը Լուկաշենկոյին (video)
Հայաստանի համոզմամբ՝ Բելառուսի նախագահի ձևակերպումները ուղղված են եղել սպասարկելու Բելառուսի նախագահի ներքին քաղաքական օրակարգը, այս մասին Ազգային ժողովում հայտարարեց ՀՀ արտաքին գործերի նախարար Արարատ Միրզոյանը:
«Ուզում եմ կրկին հաստատել՝ Ալեքսանդր Գրիգորևիչի ինքնատիպ աշխարհաքաղաքական վերլուծությունները, մեկնաբանություններն առաջին անգամ չէ, որ արժանանում են միջազգային տարբեր գործընկերների ուշադրությանը, քննարկման առարկա են դառնում տարբեր երկրներում, այդ թվում, մեր երկրում: Մեր խորին համոզմամբ՝ այդ ձևակերպումները ուղղված էին սպասարկելու Բելառուսի նախագահի ներքին քաղաքական օրակարգը: Վստահ կարող եք լինել, որ այն ՀՀ արտաքին քաղաքական օրակարգի հետ այն որևէ առնչություն չունի», - ասաց Միրզոյանը:
Նա հաստատեց տեղեկությունը, որ ՀՀ-ում Բելառուսի դեսպանը հրավիրվել է ԱԳ նախարարություն:
«Դեսպանին են փոխանցվել մեր համոզմունքներն այն մասին, որ մեր հայտարարությունները միմյանց մասին պետք է հաշվի առնվեն և հիմնված լինեն փոխադարձ հարգանքի վրա, հաշվի առնենք միմյանց շահերը, միմյանց սուվերենությունը, ինչու չէ, նաև այն իրավապայմանագրային և մյուս դաշտը, որոնց հիման վրա մեր երկրների միջև կա համագործակցությունը: Այնուամենայնիվ, մենք հետայսու ևս համապատասխան պաշտոնական հայտագրերի դեպքում պատրաստ ենք հնարավորինս աջակցել Բելառուսին զանազան միջազգային հարթակներում», - ասաց ՀՀ ԱԳ նախարարը:
Նա ընդգծեց, որ երկու երկրներն ունեն բավականին հարուստ իրավապայմանագրային բազա և համագործակցությունն այդ բազայի հիման վրա է ընթանում:
«Կարծում եմ՝ լավ կլինի, որ հետայսու նաև բարձրագույն մակարդակով հնչող հայտարարությունները համապատասխանեն նշածս իրավապայմանագրային և բարեկամական ոգու գնահատականներին», - ասաց Միրզոյանը:
Հետևեք մեզ Viber-ում
