Բատկան Փաշինյանի Հայաստանի մասին ասել է այն, ինչ, շատերը մտածում են, բայց լռում են

Բելառուսի նախագահ Ալեքսանդր Լուկաշենկոն Վլադիմիր Սոլովյովին տված հարցազրույցում կարծիք է հայտնել, որ Բելառուսի և Ռուսաստանի Միութենական պետությանը կարող են միանալ հետխորհրդային տարածության նաև այլ հանրապետություններ, և մեծ հավանականությամբ՝ Հայաստանը, որովհետև «ոչ մեկին պետք չէ»: «Դե, Հայաստանը գնալու տեղ չունի: Կարծում եք նրանք ինչ-որ մեկին պե՞տք են: Նրանք դա տեսան: Նիկոլ Վովաևիչը դա տեսավ: Ադրբեջանը ինչ-որ կերպ դուրս է գալիս այդ խմբից, քանի որ մենք էլ ենք շատ սխալներ գործել: Առանձին թեմա է: Անտեղ Թուրքիան, իհարկե շատ լուրջ աջակցություն է ցուցաբերում Ադրբեջանին: Թուրքիայով են անցնում գազը, նավթը: Իսկ Թուրքմենստանը, Ուզբեկստանը և Տաջիկստանը, կարծում եմ, անհրաժեշտությունից, առաջին հերթին տնտեսական (անհրաժեշտությունից-խմբ.) դրդված, նույնպես կմիանան»,- ասել է Լուկաշենկոն: Նա նաև նշել է, որ դրան կմիանա նաև Ղազախստանը, որի համար «լավ դաս եղավ», իսկ Ուկրաինան, եթե «սխալներ չգործենք» 15 տարվա կտրվածքով նույնպես կիմանա:

Այսօր արդեն խորհրդարանում իշխանական պատգամավորները Լուկաշենկոյի «պորտը տեղն են դնում»... Մեկը՝ անընդունելի է համարում, որ Հայաստանի վերաբերյալ նման տոնով է խոսում Հայաստանի դաշնակից երկրի ղեկավարը, մի երկիր, որը վերջերս Ղազախստանում տեղի ունեցած դեպքերի օրերին կազմակերպեց ՀԱՊԿ-ի արագ արձագանքը:

Իշխանական Հովիկ Աղազարյանն էլ Լուկաշենկոյին որոշել է այսպես «դաստիարակել». «Լուկաշենկոները և Մարգարիտա սիմոնյանները իրենց գործունեությամբ արջի ծառայություն են մատուցում ՌԴ-ի իշխանություններին: Լավ կլինի Լուկաշենկոն այդպիսի գնահատականներ տալուց առաջ մի հատ իր Մինսկի օդանավակայանը մտնի, որը ավելի շատ հիշեցնում է խոզանոց»:

Դե ինչ, Փաշինյանականները պատասխանեցին Բատկային, հիմա Լուկաշենկոն, հավանաբար, «դարդից» չգիտի գլուխը որ կողմ փախցնի...

Եվ ի՞նչ, Լուկաշենկոյի բավական կոպիտ որակումների բովանդակությունն այն չէ՞, ինչի մասին մեր երկրի ներսում մեր երկրի քաղաքացիներն էլ են մտածում...

Կամ, Հայաստանի մյուս գործընկեր պետությունների ղեկավարները, պաշտոնյաները, կամ կառույցների աշխատակիցները նույն կերպ չե՞ն մտածում Հայաստանի մասին... Նրանք չեն ասում այն, ինչ ասել է Լուկաշենկոն, բայց որևէ մեկը կասկածում է, որ Հայաստանն այսօր Փաշինյանի իշխանության օրոք հայտնվել է հենց այս վիճակում:

Իսկ թե Հայաստանը կարո՞ղ է մաս կազմել Ռուսաստան-Բելառուս միութենական պետությանը, հարցին, միանշանակ կարելի է պատասխանել, որ եթե Փաշինյանն իր իշխանությունը պահպանելու հարցում միակ ելք տեսնի այդ ճանապարհը, Հայաստանն այդ ուղով էլ կտանի: Դրանում կասկած կարելի է չունենալ: Նա աշխարհաքաղաքական բոլոր կենտրոններին պատրաստ է ծառայել, միայն թե իր իշխանությանը ոչինչ սպառնա...

Այնպես որ, այո՛, Բելառուսի նախագահի հայտարարությունները Հայաստանի համար վտանգավոր են, որովհետև ԵԱՏՄ-ի, ՀԱՊԿ-ի շրջանակներում Հայաստանի դաշնակից ներկայացող Բելառուսը ոտնձգություն է անում ՀՀ ինքնիշխանության նկատմամբ, բայց Լուկաշենկոն ասել է այն, ինչի մասին մտածում են շատերը, բայց չեն ասում:

Ամբողջ խնդիրն այն է, որ 44-օրյա պատերազմից հետո Հայաստանը չի անում քայլեր, որոնք այլոց Հայաստանի մասին թույլ կտան մտորել փոքր-ինչ այլ կերպ...

Մետաքսյա Շալունց