Ադրբեջանական գազ՝ Եվրամիությանը. եվրոպացի չինովնիկների երկակի ստանդարտները

Էներգետիկայի հարցերով եվրահանձնակատար Կադրի Սիմսոնը վաղը՝ փետրվարի 4-ին կայցելի Ադրբեջան, իսկ փետրվարի 7-ին՝ ԱՄՆ՝ քննարկելու Եվրամիության տարածք լրացուցիչ ծավալի գազ մատակարարելու հնարավորությունը, հայտնել է Եվրահանձնաժողովի ներկայացուցիչ Թիմ Մաքֆին՝ Բրյուսելում ճեպազրույցի ժամանակ։

«Գազամատակարարման խնդրի շուրջ բանակցությունները կշարունակվեն։ Փետրվարի 4-ին եվրահանձնակատար Սիմսոնը կմեկնի Ադրբեջան՝ մասնակցելու Հարավային գազային միջանցքի երկրների նախարարների հանդիպմանը։ Փետրվարի 7-ին նա և Եվրամիության արտաքին քաղաքականության և անվտանգության հարցերով Բարձր ներկայացուցիչ Ժոզեպ Բորելը կմեկնեն ԱՄՆ՝ մասնակցելու ԵՄ-ԱՄՆ էներգետիկայի խորհրդի նիստին»,- ասել է նա։

Մաքֆին նշել է, որ ԵՄ-ն գազի ծավալներն ընդլայնելու հարցի շուրջ շարունակում է բանակցությունները նաև Ալժիրի, Քաթարի ու Նորվեգիայի հետ։ «Այդ բանակցությունները մի քանի ամիս է՝ ընթանում են և շարունակական կլինեն»,- ասել է նա։

Դեռ օրեր առաջ Ժոզեպ Բորելի մակարդակով էլ արձանագրվեց, որ ԵՄ-ն գազի ծավալներն ընդլայնելու հարցի շուրջ շարունակում է բանակցությունները նաև Ալժիրի, Քաթարի ու Նորվեգիայի հետ: Եվրոպան այսպիսով՝ Ադրբեջանի հետ բանակցություններում լուրջ նպատակներ ունի, որոնք կարող են առիթ դառնալ, որպեսզի հերթական անգամ ԵՄ երկրները աչք փակեն Ադրբեջանում այս կամ ապօրինությունների վրա:

ԵՄ-ն երկակի ստանդարտներ է կիրառում, երբ հարկ է: Իսկ ահա Ռուսաստանին քննադատելիս՝ նույն խնդիրները նրանք պարբերաբար տեսնում են:

Եվրամիության արտաքին քաղաքականության և անվտանգության հարցերով Բարձր ներկայացուցիչ Ժոզեպ Բորելը հայտարարել է, որ ԵՄ-ն կշարունակի կազմել Ռուսաստանի նկատմամբ նոր պատժամիջոցներ, ինչպես նաև այդ հարցում կակտվիվացնի համակարգումը Միացյալ Նահանգների, ՆԱՏՕ-ի և ԵԱՀԿ-ի հետ: Այդ մասին Բորելը հայտարարել է Ֆրանսիայում՝ Բրեստում, որտեղ գումարվել է ԵՄ արտաքին գերատեսչությունների ղեկավարների ոչ պաշտոնական հավաքը: Բորելի խոսքով, Եվրամիությունը պատրաստ է պատասխան տալ ցանկացած ագրեսիային, սակայն նախընտրում է երկխոսության և բանակցությունների ուղին:

«Նախարարների քննարկումների առանցքային թեման եվրոպական անվտանգության ճարտարապետությունն է: Եվրամիությունը պետք է գործի իբրև անկախ աշխարհաքաղաքական դերակատար: Մենք պետք է պատրաստ լինենք հետ մղել ագրեսիան, բայց գերադասում ենք դիվանագիտության ճանապարհը: Մենք մերժում ենք Եվրոպայում ազդեցության գոտիներ ստեղծելու Ռուսաստանի ցանկացած փորձ»,- ասել է Ժոզեպ Բորելը:

Մետաքսյա Շալունց