Բաքուն Հայաստանին հրավիրում է թուրքացման «բրենդինգի»
«Հայաստանի և Ադրբեջանի միջև խաղաղության պայմանագրի ստորագրման շուրջ բանակցությունները պետք է ընթանան միջազգային իրավունքին համապատասխան», - հայտարարել է Ադրբեջանի նախագահի աշխատակազմի արտաքին քաղաքականության հարցերի բաժնի ղեկավար Հիքմեթ Հաջիևը: «Այդ համաձայնագիրը պետք է հիմնված լինի միջազգային իրավունքի հիմնարար նորմերի և սկզբունքների վրա, մասնավորապես` երկրների տարածքային ամբողջականության և ինքնիշխանության սկզբունքների», - ելույթ ունենալով «ԱՄՆ-ի և Կասպիցի տարածաշրջանի միջև դիվանագիտական հարաբերությունների 30-ամյակը» վեբինարում՝ ասել է ադրբեջանցի պաշտոնյան։
Ադրբեջանցի պաշտոնյայի մակարդակով, փաստորեն, արձանագրվում է երկրների տարածքային ամբողջականության հետ միասին՝ ինքնիշխանության սկզբունքի մասին: Իսկ Փաշինյանի իշխանությունից որևէ մեկը լսե՞լ է միջազգային իրավունքի հիմնարար նորմերի և սկզբունքների հետ միասին՝ ինքնորոշման սկզբունքի մասին:
Պատերազմի ուժով Հայաստանին ու Արցախին պատերազմ պարտադրած երկիրն այսօր այնքան է ցինիկացել, որ ի լուրջ աշխարհի ասում են, թե Հայաստանի և Ադրբեջանի միջև խաղաղության պայմանագրի ստորագրման շուրջ բանակցությունները պետք է ընթանան միջազգային իրավունքին համապատասխան... Լեռնային Ղարաբաղի թեմայի մասին չեն էլ հիշատակում:
Այսինքն, Հայաստանի տարածքների վրա ակնհայտ հավակնություններով հիմա էլ Բաքուն Հայաստանին, իբր պարտադրում է իր պատկերացրած «միջազգային իրավունքը»:
Այդ ո՞ր միջազգային օրենքով են մայիս ամսից ադրբեջանական ստորաբաժանումները ներխուժել Հայաստանի տարածք...
Հաջիևի խոսքով՝ տարածաշրջանը բրենդինգի նոր ռազմավարության կարիք ունի, և Բաքուն պատրաստ է դերակատարում ունենալ Հարավային Կովկասի ինտեգրված տարածաշրջանի կառուցման գործում․ - «Ադրբեջանը գործընկերների և հարևան երկրների հետ աշխատում է Հարավային Կովկասը հակամարտություններից և պատերազմներից զերծ տարածաշրջանի վերածելու ուղղությամբ և ձգտում է ապահովել, որ Հարավային Կովկասը կողմնորոշվի դեպի ինտեգրում, տարածաշրջանային համագործակցություն՝ հիմնված փոխշահավետ հարաբերությունների վրա»։
Թե ինչ քայլեր է Բաքուն ձեռնարկում այդ ուղղությամբ, Ադրբեջանի նախագահի խորհրդականը չի մանրամասնել, փոխարենը նշել է, որ տարածաշրջանում բացվող նոր տրանսպորտային միջանցքները, «մասնավորապես՝ Զանգեզուրի միջանցքը, կարող են Հայաստանը դուրս բերել շրջափակումից և դարձնել զարգացած ցամաքային կապեր ունեցող երկիր»։
Ընդ որում, ըստ ադրբեջանցի պաշտոնյայի, «Զանգեզուրի միջանցքը չի բացառում այլ պոտենցիալ երթուղիները, որոնք Բաքուն ստեղծել է տարածաշրջանում հարևան Թբիլիսիի հետ»։ «Հայաստանը կարող է շահել վրաց-ադրբեջանական փոխշահավետ համագործակցությունից, որն օրինակելի է և հիմնված է փոխադարձ հարգանքի վրա», - հայտարարել է Հիքմեթ Հաջիևը։
Ադրբեջանի հետ միասին Թուրքիան ևս ջանքեր է գործադրում Կովկասում խաղաղություն և կայունություն ապահովելու համար։ Այս մասին Թուրքիայի պաշտպանության նախարար Հուլուսի Աքարն է նախօրեին հայտարարել ադրբեջանցի պաշտոնակցի հետ Անկարայում կայացած հանդիպումից հետո։ «Ադրբեջանն ու Թուրքիան՝ «երկու պետություն՝ մեկ ազգ», գործադրում են բոլոր ջանքերը Կովկասում խաղաղություն և կայունություն ապահովելու համար», - հայտարարել է Աքարը և կրկնել՝ Էրդողանն ու Ալիևը խաղաղության ձեռք են մեկնել Հայաստանին և սպասում են պատասխանի։
«Մեր ջանքերն ուղղված են ոչ միայն Ադրբեջանի և Հայաստանի, Թուրքիայի և Հայաստանի միջև, այլ նաև ամբողջ Կովկասում խաղաղության հաստատմանը», - ասել է թուրք բարձրաստիճան պաշտոնյան։ Տեղեկացնելով, որ ադրբեջանցի պաշտոնակցի հետ քննարկել են երկու երկրների զինված ուժերի զարգացմանն ու պաշտպանությանը վերաբերող հարցեր, Թուրքիայի ռազմական գերատեսչության ղեկավարը հավաստիացրել է, թե Ադրբեջանի և Թուրքիայի զինված ուժերի հզորացմանն ուղղված միջոցառումները վտանգ չեն ներկայացնում այլ երկրների համար։
Փաստորեն, Ալիևը տարածաշրջանի համար բրենդինգի նոր ռազմավարություն է մշակում, Թուրքիայի ուժով ոգևորված՝ Հայաստանին «հրավիրում» են իրենց հետ «կիսելու» թուրք-ադրբեջանական տանդեմի հզորացումը:
Մետաքսյա Շալունց
Հետևեք մեզ Viber-ում
