Ընդդիմության վարչապետի թեկնածուն հայտնի է

Քաղաքական շրջանակներում նոր թափ է հավաքում Սերժ Սարգսյանի 2018-ից հետո վարչապետի պաշտոնը զբաղեցնելու հարցը, որտեղ նա կդառնա երկրի փաստացի ղեկավար։ Այդ մասին խոսում ու նրա թեկնածությունն աջակցում են նաեւ ընդդիմադիրները։ Այսօր ԱԺ «Ելք» խմբակցության պատգամավոր Սասուն Միքայելյանը խորհրդարանում հայտարարեց, որ ճիշտ կլինի` Սերժ Սարգսյանը 2018 թվականին ստանձնի Հայաստանի վարչապետի պաշտոնը: Օրերս ՀՀԿ-ական պատգամավոր Գալուստ Սահակյանն էր բաց տեքստով հայտարարեց, թե ազգը պետք է ընդունի, որ Սերժ Սարգսյանն է լինելու երկրի ղեկավար:Միքայելյանն ասաց, թե վերջերս եկել է այն եզրակացության, որ Սերժ Սարգսյանը լինի վարչապետ: «Ավելի ճիշտ կլինի ինքը լինի, որ վերջ ի վերջո մի անգամ պարտավորություն վերցնի իրա վրա, թե չէ տարիների ընթացքում եսիմ քանի վարչապետ ա փոխվել, և ինքը իրա վրա պարտավորություն չի վերցրել: Վերջերս եկել եմ այն եզրակացության, որ թող ինքը լինի»,- ասաց Միքայելյանը:Թե ինչպե՞ս դրան կարձագանքի ժողովուրդը, Ս.Միքայելյանը պատասխանեց. «Իսկ այս ձևի ապրելակերպին, որ ժողովուրդը հաշտվել ա, լա՞վ ա: Վերջնական` եթե էդ մարդը կարա անի, թող անի»: Ս.Միքայելյանի խոսքով` տարիների ընթացքում միշտ այն իրավիճակն է ձևավորվել, որ պետք է փոփոխություն լինի, հարցի լուծում լինի: «Դրել, վարչապետ են փոխել: Հասկանո՞ւմ եք: Իսկ Սերժ Սարգսյանը չի կարա ինքն իրան փոխի: Գոնե էդ ինստիտուտն էլ կվերանա»,- ասաց նա: Հիշեցնենք՝ օրերս էլ Ծառուկյան դաշինքի անդամ Միքայել Մելքումյանը լրատվամիջոցներից մեկի հետ զրույցում նշել էր. «Վարչապետի փոփոխությունը այս պահին ակտուալ չեմ համարում։ Դա քաղաքական մեծամասնության խնդիրն է։ Կառավարության ծրագրի իրականացման կրողը քաղաքական մեծամասնությունն է, անձերից վերանանք, ինքը կգտնի՝ ով կլինի։ Ես չեմ տեսնում որևէ խնդիր, որ Սերժ Սարգսյանը 2018–ից լինի վարչապետ»: Իհարկե, երկու դաշինքներից էլ շտապեցին սրբագրել թիմակցի հայտարարությունը, մասնավորապես, Վահե Էնֆիաջյանը հայտարարեց․․.«Միքայել Մելքումյանի խոսքը որոշակիորեն խեղաթյուրված էր: Պետք է իրադարձություններին սպասել և ճիշտ ժամանակին կարծիք հայտնել: Այս պահի դրությամբ ՀՀ քաղաքական դաշտում թիվ մեկ օրակարգային հարցն այդ խնդիրը չէ: Երբ գա այն ժամանակը, որ պետք լինի «Ծառուկյան» խմբակցությունն իր դիրքորոշումը հայտնի, ամեն ինչ ճիշտ ժամանակին կարվի»։ Հիշեցնենք, որ վերջերս ԱԺ-ում Նիկոլ Փաշինյանը հայտարարել էր, որ իրենք, այսինքն ԵԼՔ դաշինքն այն շրջանակների թվում չէ, որոնք պահանջում են, որ վարչապետ լինի Սերժ Սարգսյանը: «Ելքը» չի մտնում այն մարդկանց եւ այն ցուցակի մեջ, որոնք Սերժ Սարգսյանին համոզում են վարչապետի պաշտոնը»,- մասնավորապես ասաց նա։ Սասուն Միքայելյանի հայտարարությունից հետո մեկնաբանություն տվեց նաեւ Ալեն Սիմոնյանը․«Կարծում եմ` մեկնաբանությունը թերի է հնչել։ Պարոն Միքայելյանը կարծում է, որ վարչապետներին փոխելով` Սերժ Սարգսյանը խուսափում է պատասխանատվությունից, և ստացվում է, որ ստեղծված իրավիճակի մեղավորը հերթական վարչապետն է, այլ ոչ ինքը։ Այնուամենայնիվ, այս կարծիքը չի արտացոլում «Ելք» դաշինքի դիրքորոշումը»,- Araratnews.am-ի հետ զրույցում ասաց դաշինքի անդամ Ալեն Սիմոնյանը։ Ակնհայտ է մի բան, որ ընդդիմադիր շարքերում քիչ-քիչ պայթում են «ականները» ու եթե որեւէ մեկը անկեղծ բարձրաձայնում է շարքերում տիրող իրական մթնոլորտի մասին, ապա պետք է չէ խմբագրման ենթարկել տվյալ անձի խոսքերը, ի վերջո, ամեն ինչ տեսանելի էր իսկզբանե, իշխանությանը լեգիտիմ համարող ընդդիմությունը մի օր էլ պետք է աջակցեր Սերժ Սարգսյանի թեկնածությունը վարչապետի պաշտոնում։ Անի Սահակյան