Որոշումն ընդունելու են Հայաստանի իրավասու մարմինները, ոչ թե միջազգայինները. Քրմոյան

ՀՀ արդարադատության նախարարի տեղակալ Սուրեն Քրմոյանը, անդրադառնալով Human Rights Watch-ի հայտարարությանը, որտեղ ասվում էր, որ իշխանությունները պարտավոր են «Սասնա ծռեր» խմբի գործով դատավարության ընթացքում ենթադրյալ ծեծի մասին օպերատիվ, մանրակրկիտ ու արդյունավետ հետաքննություն  իրականացնել ու պատասխանատվության կանչել այն անձանց, ովքեր պատասխանատու են դաժան վարվեցողության համար, նախ շնորհակալություն հայտնեց միջազգային կառույցներին, այնուհետև ասաց. «Որոշումն ընդունելու են Հայաստանի իրավասու մարմինները, ոչ թե միջազգայինները: Բազմաթիվ անգամներ իրավապահ մարմինները նշել են, որ համապատասխան քրեական գործ է հարուցվել, համապատասխան քննություններ են ընթանում: Չմոռանանք նաև անմեղության կանխավարկածի մասին, մենք չենք կարող ասել՝ այս անձին արդեն մեղավոր ենք ճանաչում, և այս անձը չպետք է կատարի իր ծառայողական պարտականությունները»։ Ս. Քրմոյանը նշեց, որ Արդարադատության նախարարությունը՝ որպես քաղաքականություն մշակող մարմին, միանշանակ կողմ է, որ բոլոր հանցագործության դեպքերը, կատարված  լինեն ֆիզիկական թե պաշտոնատար անձանց կողմից, անխտիր պատասխանատվության ենթարկվեն։