ՔՊ-ն զավթում է Պաշտպանության հանձնաժողովը․ Արծվիկ Մինասյան (video)
Ազգային ժողովն առաջին ընթերցմամբ ընդունեց «Քաղաքացիական պայմանագիր» խմբակցության պատգամավոր Վիլեն Գաբրիելյանի ներկայացրած օրենքի նախագիծը, որը նպատակ ունի կարգավորել ԱԺ հանձնաժողովի նախագահի տեղակալի ընտրության հարցը:
Առաջարկվում է օրենքում լրացում անել և սահմանել՝ եթե մշտական հանձնաժողովի նախագահի տեղակալը չի ընտրվում, ապա իրավասու խմբակցությունը քվեարկությունից հետո 5 աշխատանքային օրվա ընթացքում առաջադրում է նոր թեկնածու:
Նախագիծը քվեարկությամբ ստացավ 68 կողմ, 33 դեմ ձայն: Ի դեպ, նախագծին կողմ քվեարկեց նաև «Հայաաստան» խմբակցության պատգամավոր Արթուր Ղազինյանը:
«Հայաստան» խմբակցության քարտուղար Արծվիկ Մինասյանն ասաց, թե, նկատի ունենալով, որ նախագիծը վերաբերում է ԱԺ աշխատանքների կազմակերպմանը, ապա ավելի հիմնարար քննարկումների կարիք կա:
«Հակառակ դեպքում, այն, ինչ ներկայացված է, ընդամենը ընդդիմությանը վերապահված որոշակի պաշտոնների զավթման գործընթաց է ընկալվում: Եթե ուզում եք հիմնարար լուծել այդ հարցը, հրաժարվեք այդ մտքից, ավելի լավ է հիմա դեմ քվեարկեք, նստենք իրար հետ քննարկենք, հակառակ դեպքում, կստացվի, որ փոփոխություն է արվում այդ պաշտոնը ընդդիմությունից խլելու համար», - ասաց Արծվիկ Մինասյանը:
Հետևեք մեզ Viber-ում
