Տվյալներ էին ձեռք բերվել Արթուր Սարգսյանի կողմից նոր հանցագործություն կատարելու բարձր հավանականության մասին. դատախազ
Կոռեկտ չեմ համարում Արթուր Սարգսյանի մահվան շահարկումը,խորհրդարանում հայտարարեց ՀՀ գլխավոր դատախազ Արթուր Դավթյանը՝ անդրադառնալով «Հաց բերողի» մահվան հանգամանքները: Արթուր Դավթյանը հիշեցրեց, որ գլխավոր դատախազությունն արդեն իսկ մանրամասն պարզաբանումներ տվել է Արթուր Սարգսյանի երկրորդ անգամ կալանավորվելու վերաբերյալ: Այնուամենայնիվ, գլխավոր դատախազը կրկին նշեց, թե ինչու առաջին անգամ կալանքից ազատվեց Արթուր Սարգսյանն ու ավելի ուշ կալանավորվեց: «Կոռեկտ չեմ համարում նրա մահվան շահարկումը, իսկ օրենքի շրջանակներում թույլատրելի է նրա մահվան հանգամանքները քննարկելը: Արթուր Սարգսյանի կալանքն առաջին անգամ վերացել է ոչ թե միջգերատեսչական հանձնաժողովի որոշման, այլ բժշկական կոնսիլիումի եզրակացության հիման վրա: Հավակնությունը նվազ էր, որ նա պատշաճ վարքագիծ չէր դրսեւորի: Ապա՝ եղավ նորից փորձաքննություն, ըստ որի՝ նրա մոտ հայտնաբերված հիվանդությունները լիարժեքորեն չէին համապատասխանում Կառավարության հաստատած ցանկի հետ: Բնականաբար, վարույթ իրականացնող մարմինը նշանակեց կրկնակի դատաբժշկական փորձաքննություն: Այս փորձաքննությունները, չէ, որ հիմք հանդիսացան Արթուր Սարգսյանի՝ 2-րդ անգամ կալանավորելու համար, երբ նրա խափանման միջոցը նշանակվեց ստորագրություն՝ հանրապետությունից չբացակայելու մասին: Արթուր Սարգսյանը խախտել էր խափանման միջոցի կիրառման պայմանները՝ չէր ներկայացել վարույթն իրականացնող մարմին: Նաեւ՝ տվյալներ էինք ստացել, որ նրա կողմից նոր հանցագործություն կատարելու բարձր հավանականության մասին»: Գլխավոր դատախազը հայտարարեց, որ բացի Ելք խմբակցության պատգամավորներից, խափանման միջոցի փոփոխման անձնական երաշխիք էին ներկայացրել նաեւ ԱԺ 5 խմբակցությունից 27 պատգամավոր:
Հետևեք մեզ Viber-ում
