«Ճվճվ Արոյի» մահն ու կյանքի հետագիծը

Հուլիսի 7-ին արտակարգ դեպք է տեղի ունեցել Երևանում: Իր տանը մահացած են հայտնաբերել հանրությանը հայտնի «Ճվճվ Արո» մականվամբ 52-ամյա Արա Վարդանյանին, ով ըստ լրատվականների՝ մի քանի օր առաջ է Ռուսաստանից վերադարձել Հայաստան:Թե ինչն է եղել Ա. Վարդանյանի մահվան պատճառը, պարզ կլինի մի շարք փորձաքննություններ նշանակելուց հետո: Մինչ փորձաքննությունների արդյունքները պարզ կդառնան, հիշեցնենք, թե ով է եղել Արա Վարդանյանը եւ հանրությանը առավելապես ինչ դրվագներով է հայտնի: Այսպիսով՝ Արա Վարդանյանի մասին հանրության լայն զանգվածներ իմացան դեռեւս տասը տարի առաջ, երբ գործարարը ընդգրկվեց ԲՀԿ ավագանու ցուցակում եւ դարձավ ավագանի: Նա աղմկոտ պատմություններով պարբերաբար հայտնվեց մամուլի էջերում, իսկ վերջին տարիներին էստաֆետը փոխանցվել էր երկու որդիներին, որոնք վերջին տարիներին բազմաթիվ անգամներ են աչքի ընկել արկածային ավտովթարներով, բացի այդ ժամանակին գրվեց, որ ավագ որդուն՝Սարգիսին ոստիկանությունը բերման է ենթարկել նաև թմրանյութ պահելու և օգտագործելու կասկածանքով: Ամենաթարմ միջադեպը որդիների մասնակցությամբ այս տարվա գարնանն էր: Ծաղկաձորյան խաղատներից մեկում հնչած կրակոցների արդյունքում ոտքի վիրավորում ստացած Ճըվճըվ Արոյի որդին ոստիկաններին հայտնել էր, թե շունն է կծել, հետո փախուստի էր դիմել հիվանդանոցից: Իսկ Արա Վարդանյանի անունը վերջին անգամ շոշափվել է անցած տարվա աշնանը՝ նոյեմբերին: Չարբախում գտնվող «Լիա» գեղեցկության սրահում նոյեմբերի 13-ին տեղի ունեցած սպանության դրդապատճառների վերաբերյալ բազում վարկածներից մեկի համաձայն՝ առնչվում էր նաեւ Արա Վարդանյանը: Հիշեցնենք, որ հիշյալ գեղեցկության սրահի նկուղային հարկում հնչած կրակոցների հետեւանքով սպանվել է երկու անձ՝ 38-ամյա Մուշեղ Մուշեղյանն ու 25-ամյա Գեւորգ Ավետիսյանը: Սպանության մեջ մեղադրվում է հիշյալ գեղեցկության սրահի սեփականատերը՝ «Թոփալ Գեղամ» մականունով հայտնի Պետրոս Իսրայելյանը: Ըստ մամուլի հրապարակումների՝ վերջինս կրիմինալ աշխարհում համարվում է ՝ <<ստացող>>: Որպես սպանության պատվիրատու՝ նշվում էր գործով մեղադրյալ Ալիկ Բանդուրյանի անունը, ինչպես նաեւ՝ Արա Վարդանյանի, ըստ նույն լուրերի՝ սպանված Մուշեղ Մուշեղյանը Ճըվըվ Արոյի «քիլլերն» է: Հարկ է նշել, որ Ա. Վարդանյանի անունը որեւէ դրվագով չի հիշատակվում նախաքննության շրջանակներում: Կար նաեւ մեկ այլ վարկած, համաձայն որի՝ Արա Վարդանյանը ժամանակին պարտքով գումար է տվել ոսկու առեւտրով զբաղվող վարդենիսցի ինչ-որ «շիշկեքի». խոսքը 20 հազար ԱՄՆ դոլարի մասին է: Պարտքը վերադարձնելիս պարտապանները 20-ի փոխարեն 18 հազար են տվել՝ պարտք մնալով 2 հազար դոլար, սակայն խոստացել են, որ դա էլ ժամանակի ընթացքում կմարեն: Մինչդեռ պարտատերը՝ Վարդանյանը, պնդել է իր տվածի պես գումարն ամբողջությամբ վերադարձնել, երբ չի ստացել, դիմել է Պետրոս Իսրայելյանին: Վերջինս համաձայնել է գործը գլուխ բերել, սակայն, երբ պարզել է, որ ընդամենը 2 հազար դոլարի պարտք-պահանջ է, տեղեկացրել է Վարդանյանին, որ չի կարող նրան օգնել, քանի որ գործ ունի մարդկանց «քցելու» երեւույթի հետ, դրանից հետո Արոն նրանից է պահանջել իր պարտքը: Իսրայելյանից ստանալու գործը ստանձնել է Մուշեղ Մուշեղյանը: Նշված գեղեցկության սրահում փողը ստանալու բազարների ժամանակ կողմերը չեն հասկանում միմյանց, վիճում են,եւ վերջապես եզրափակում կրակոցներով: Սա, իհարկե, մահացածին առնչվող վերջին՝ ամենաթարմ դրվագն է, որը կարող է ամենեւին էլ կապ չունենալ Արա Վարդանյանի մահվան հետ: Սպասենք փորձաքննության արդյունքներին: Անի Սահակյան