Ռուսաստանն ու Թուրքիան նոր հանդիպում են ծրագրում. գոհ վիճակ՝ «կայունությունից»

Թուրքիայի և Ռուսաստանի ԱԳ նախարարներ Մևվլութ Չավուշօղլուն և Սերգեյ Լավրովը այսօր կայացած հեռախոսազրույցի ընթացքում քննարկել են Ղազախստանում ստեղծված իրավիճակը։ Այս մասին ռուսական TACC գործակալությանը փոխանցել են Թուրքիայի ԱԳՆ-ին մոտ կանգնած աղբյուրները։ Թուրքիայի դիվանագիտական գերատեսչության տեղեկություններով, Լավրովն ու Չավուշօղլուն ղազախական ճգնաժամից բացի քննարկել են նաև երկկողմ հարաբերություններին, ինչպես նաև ՆԱՏՕ-Ռուսաստան խորհրդի առաջիկա նիստին, Բոսնիա-Հերցեգովինայում և Կովկասում ստեղծված իրավիճակին վերաբերող հարցեր։

Թուրքիայի և Ռուսաստանի ԱԳ նախարարներ Մևլյութ Չավուշօղլուն և Սերգեյ Լավրովը այսօր կայացած հեռախոսազրույցի ընթացքում պայմանավորվել են մոտ ապագայում «3+3» ձևաչափի նոր հանդիպում անցկացնել, հաղորդում է Ռուսաստանի դիվանագիտական գերատեսչությունը։

«Նախարարները դրական են գնահատել Անդրկովկասում իրադրության կայունացմանն ու համագործակցության զարգացմանը նվիրված «3+3» ձևաչափում կազմակերպված առաջին հանդիպումը, որ կայացել էր 2021 թվականի դեկտեմբերի 10-ին Մոսկվայում։ Պայմանավորվածություն է ձեռք բերվել մոտ ապագայում նախապատրաստել հաջորդ հանդիպումը՝ նույն կազմով», - տեղեկացնում է Ռուսաստանի արտգործնախարարությունը։

Հիշեցնենք, որ օրերս Վրաստանը հայտարարեց, որ «3+3» ֆորմատով երկրորդ հանդիպմանը ևս չի մասնակցի...

Վրաստանը չի մասնակցի «3+3» ֆորմատով երկրորդ հանդիպմանը ևս, որը նախատեսվում է Թուրքիայում։ Այս մասին հայտարարել է Անկարայում Վրաստանի դեսպան Գիորգի Ջանջգավան Daily Sabah թերթին տված հարցազրույցում։ Թուրքական պարբերականը հայտնել էր, որ Անկարան բազմիցս կոչ է արել ստեղծել համագործակցության նոր հարթակ՝ «3+3», որը կմիավորի Թուրքիային, Ռուսաստանին, Իրանին, Հայաստանին, Ադրբեջանին ու Վրաստանին։ Այս ձևաչափով առաջին հանդիպումն անցկացվել է անցյալ տարվա վերջին Մոսկվայում, դրան Վրաստանը ներկա չէր։ Դեկտեմբերին Թուրքիայի արտգործնախարար Մևլութ Չավուշօղլուն հույս էր հայտնել, որ Վրաստանը կմասնակցի հարթակի երկրորդ հանդիպմանը։

Դեսպան Ջանջգավան պարզաբանել է, որ Վրաստանը Թուրքիան և Ադրբեջանը համարում է ռազմավարական գործընկերներ, Հայաստանը՝ պատմական և լավ հարևան, «սակայն Ռուսաստանը մի երկիր է, որն օկուպացրել է Վրաստանի տարածքի 20 տոկոսը»։

Երեկ, էլ հայտնի դարձավ, որ Հայաստանի և Թուրքիայի հատուկ ներկայացուցիչների առաջին հանդիպումը տեղի կունենա հունվարի 14-ին Մոսկվայում, ֆեյսբուքյան իր էջում այս մասին հայտնեց ՀՀ ԱԳՆ խոսնակ Վահան Հունանյանը։

Հայաստանի սահմանների շուրջ իրավիճակը, փաստորեն, Մոսկվան ու Անկարան համարում են կայուն... Մայիսի 12-ից ՀՀ ինքնիշխան տարածք ներխուժած ադրբեջանական զորամիավորումների ներկայությունը համարվում է նորմալ, իսկ այդ «կայունությունը»՝ փաստորեն «պարարտ հող», որպեսզի նորանոր հանդիպումներ կազմակերպեն Հայաստանի ու Ադրբեջանի ու Թուրքիայի իշխանությունների միջև:

Վերջնարդյունքը պարզ է՝ դելիմիտացիա-դեմարկացիա Հայաստանի ու Ադրբեջանի միջև, Լեռնային Ղարաբաղի կորուստ՝ Ադրբեջանի տարածքային ամբողջականության ճանաչման համատեքստում:

Ահա, սա է Մոսկվայի ու Անկարայի պատկերացրած իսկական «կայունությունն» Անդրկովկասում:

Մետաքսյա Շալունց