Քոչարյանը մտադիր է «գլխից բռնել»
Երկրորդ նախագահ Ռոբերտ Քոչարյանն իր տարեվերջյան ասուլիսում անդրադառնալով Երեւանի նախկին քաղաքապետ Հայկ Մարությանի մասին շրջանառվող լուրերին՝ հերքել է իր եւ Մարությանի կապը, որի մասին ակտիվորեն տարածում էին իշխանականները, նախեւառաջ՝ Նիկոլ Փաշինյանի Հայկական ժամանակ թերթը:
Ռոբերտ Քոչարյանը նաեւ իր գնահատականն է տվել քաղաքապետի շուրջ ստեղծված իրավիճակին՝ իրավացիորեն շեշտելով, որ 2018-ին, երբ Երեւանում քաղաքապետի ընտրություններ էին անցկացվում Հայկ Մարությանի վարկանիշն անհամեմատորեն ավելի մեծ էր, նրան ավելի շատ մարդ էր ճանաչում, քան Նիկոլ Փաշինյանին: Ուստի ըստ երկրորդ նախագահի՝ դեռ հարց է՝ ում են ձայն տվել՝ Փաշինյանին, թե Հայկ Մարությանին:
Ընդունենք, թե չընդունենք Մարությանին, ասվածը աքսիոմատիկ ճշմարտություն է, Հայկ Մարությանը որքան մերժելի պաշտոնյա էր, այնքան սիրված դերասան: Իսկ նոր քաղաքապետը ըստ երկրորդ նախագահի լեգիտիմ չէ, իշխանությունները պարտավոր էին նոր ընտրություններ անցկացնել եւ հաշվի նստել երեւանցու քվեի հետ:
«Կարծում եմ՝ իշխանությունները կգնային ընտրություններին, եթե վստահ լինեին, որ կհաղթեն։ Չեն գնացել ընտրությունների, որովհետև գիտակցում են, որ Երևանում կունենան լրջագույն պրոբլեմ և Երևան քաղաքում չեն կարող նույն մոդելը կիրառել, ինչ Վանաձորում, Գորիսում կամ մեկ այլ տեղ։ Միշտ մայրաքաղաքն ավելի ըմբոստ է եղել», - ասաց Ռոբերտ Քոչարյանը՝ նշելով, որ եթե անցկացվեն ընտրություններ՝ անպայման մասնակցելու են։
Քոչարյանը նշեց, որ չեն քննարկել և չի կարող ասել, թե քաղաքապետի ընտրություններին մասնակցելիս ով կլինի իրենց թեկնածուն.
«Եթե լինեն ընտրություններ՝ գտնելու ենք այն թեկնածուին, որը երևանցիների կողմից ընդունելի և ընկալելի կլինի,- ասաց նա։
Այստեղ հարց է առաջանում՝ այդ դեպքում՝ ինչու Ռոբերտ Քոչարյանը իր գլխավորած «Հայաստան» դաշինքի միջոցով ակտիվ մասնակցություն չունեցան անցած երկու ամիսներին Հայաստանում տեղի ունեցած ՏԻՄ ընտրություններին:
Հաշվի առնելով Ռոբերտ Քոչարյանի մոտեցումները եւ բնավորությունը, պատասխանը պարզ է՝ ՏԻՄ ղեկավարները ի պաշտոնե առնչվում են, եթե չասենք համագործակցում այս իշխանությունների հետ, քանի որ համայնքների ֆինանսական հատկացումները կառավարության միջոցով է լինում: Ուզեն, թե չուզեն, կամա, թե ակամա իրենք դառնում են Նիկոլ Փաշինյանի ենթակա- գործընկերները, եւ ոչ թե հակակշռող կամ վերահսկող գործառույթներ ունցող պաշտոնյաներ:
Իսկ Ռոբերտ Քոչարյանը քանիզս է հայտարարել, որ ինքը Նիկոլ Փաշինյանի իշխանության հետ համագործակցության եզրեր չի տեսնում որեւէ տարբերակով, ուստի նրա ծրագրում ամբողջական իշխանափոխությունն է եւ ոչ թե այսպես կոչված «ներքեւից», այլ ՝ ամենավերեւից՝ Քոչարյանը որոշել է գլխից բռնել, ինչպես սիրում էր կրկնել դասականը:
Իսկ Երեւանի պարագան այլ է, Քոչարյանի դիտարկումներից զատ՝ Երեւանը նվաճելը կնշանակել նվաճել Հայաստանի կեսը:
Անի Սահակյան
Հետևեք մեզ Viber-ում
