Երիտասարդ փոխնախարարի հետ խնդիր չի ունեցել, իր անձնական որոշումն էլ չի մեկնաբանում

Հրապարակը գրում է.Սոցապնախարար Արտեմ Ասատրյանը մեր լրագրողին վստահեցրել է, որ պաշտոնանկ եղած փոխնախարար Աշոտ Մարգարյանի հետ բացարձակապես որեւէ խնդիր չի ունեցել, բայց հրաժարվել է հայտնել հեռացման պատճառը․ «Ես կարծում եմ, որ անձնական որոշումները մեկնաբանության կարիք չունեն»։ Մինչդեռ ազատված փոխնախարարի մտերիմները համացանցը հեղեղել են գրություններով, թե նախարարը հնարավորություն չի տվել նրան իրականացնելու իր ռեֆորմները։ «Բոլորին հարաբերական հնարավորություն է տրվում իրականացնելու եւ իր ծրագրերը, եւ իդեաները»,- փիլիսոփայել է նախարարը։ Ի դեպ, խոսակցություն կար, որ Կարեն Կարապետյանը Մարգարյանին նախապատրաստել է նախարարի պաշտոնի համար, ինչի պատճառով սոցապնախարարը ջանք չի խնայել երիտասարդ կադրի դեմ կոմպրոմատներ հավաքելու ուղղությամբ եւ հասել է այն բանին, որ նրա համացանցային պահվածքը ճակատագրական է դարձել։ «Դուք ստեղծում եք խնդիր եւ փորձում քաջաբար հաղթահարել, մի ստեղծեք այդ խնդիրը եւ մի հաղթահարեք»,- հեգնել է նախարարը։ Ափսոսո՞ւմ եք երիտասարդ փոխնախարարի հեռացման համար։ Հարցն անպատասխան է մնացել։