Նիկոլ Փաշինյանն ասաց՝ ծեծեք-ջարդեք ինձ, որ իշխանությունը վերցրեք
ՏԻՄ-երում իշխանությունների պահվածքը վերջին ամիսներին հուշում է, որ Նիկոլ Փաշինյանը որեւէ գնով իշխանությունը չի զիջելու ուրիշներին, ճիշտ հակառակը՝ նա պատրաստ է զոռբայությամբ, ճնշումներով, սպառնալիքներով, երբեմն էլ մարդկանց բանտ նստեցնելով զավթել համայնքներում իշխանությունը:
Օրինակ` չնայած Առուշ Առուշանյանը բանտից էլ համոզիչ հաղթանակ է տարել, բայց նա թքած ունի ժողովրդի ընտրության վրա եւ շարունակում է քաղաքական նկրտումներով Առուշանյանին փակված պահել: Մամուլը գրում է, որ իշխանությունը օրենք է ուզում փոխել, որ նրա փոխարեն իր ուզած մարդուն ժամանակավոր պաշտոնակատար նշանակի:
Դեկտեմբերի 5-ի ընտրություններից հետո իշխանությունը համատարած ռեպրեսիաներ սկսեց բոլոր այն համայնքներում, որտեղ ՔՊ թեկնածուները չէին հաղթել կամ իշխանության օգտին կոալիցիաներ ստեղծվելու նախադրյալներ չկան: Առաջին <զոհերից> մեկը Վարդենիսի ընդդիմադիր թեկնածուներից մեկն է, նա մի քանի շաբաթ է կալանավորված է, Վանաձորում գրեթե հաղթած Մամիկոն Ասլանյանին են մեկ շաբաթ առաջ կալանավորել, Թալինում իշխանությունները խառնել էին կրիմինալ տարրերին, Չաղ Ռուստամի արկածների մասին մի քանի շաբաթ է մամուլը գրում է, Վեդիում իրավիճակի անելանելիությունը իշխանություններին մղեց նոր ընտրությունների, մի շարք համայնքներում սպառնալիքներով կոալիցիաներ են ձեւավորել: Իսկ այն, ինչ այս օրերին կատարվում է Փարաքարում, պարզապես զարհուրելի է:
Քաղպայմանագիրն ամեն ինչ անում է, որ խլի իշխանություն 48 տոկոս ձայն ստացած Ապրելու երկիր կուսակցության թեկնածուից: Աննախադեպ իրավիճակ է ստեղծվել, գրեթե հաղթած թիմը պնդում է, որ հենց իրենց թեկնածուն պետք է ստանձնի համայնքի ղեկավարումը, քանի օր ընտրվել է օրենքի տառին համապատասխան, ՔՊ-ն դաշնակից թիմի հետ ունենալով մանդատային առավելություն պնդում է իր թեկնածուի լեգիտիմությունը: Թեկնածուների երդմնակալության օրը Փարաքարը վերածվեց բողոքի արենայի, փողոց էին դուրս եկել երկու համայնքապետերի կողմնակիցները, տասնյակ ոստիկաններ իրավիճակը հանդարտեցնելու պատրվակով պարզապես անցան ջարդարարության, մի խոսքով՝ իսկական սոդոմ-գոմոր, որի հեղինակը Նիկոլ Փաշինյանն ու իր հայրենավաճառ իշխանությունն են: Այս մարդու գերագույն նպատակը հային հայի դեմ հանելն է, երկրում խժդժություններ անելը: Այս մարդու գործողությունները ՏԻՄ-երում վկայում են մի բանի մասին, ավելի ճիշտ դրանցով նա ուղիղ ասում ՝է, որ ոչ մի ճանապարհով չի պատրաստվում իշխանություն հանձնել, հակառակը՝ ծեծով, ջարդով ինքը վերցնելու է իշխանությունը բոլոր համայնքներից, եւ ուրեմն նույնն էլ մեսիջ է հղում իր ընդդիմադիրներին:
Անի Սահակյան
Հետևեք մեզ Viber-ում
